THAWNGTLA PAKHAT IH THLACAMNAK

(Kol. 1:9-12)

          Zumtu diktak cun nitin kan nunnak ah thlacam hi nei lo theih lo, neih ṭul tengtengmi kan hriamhrei pakhat a si. Thinlung tak le thungaithlak ih thla kan cammi hi Pathian in ziang siar loin in retsan men dah lo. Kan duhmi kip cu in pe lo khal a si men thei. Asinain kan ṭulmi cu a tikcu can a kim tikah in pe tam sawn ṭheu.

          Kolose cakuat kan siar tikah Paul ih thlacamnak thuhla kan hmu thei. Himi hin nitin Khristian Nun ih kan neihṭulmi thu tampi in zirh. Kan nun ram cio ah lakin nunpi thei cio ve ding a ṭul ngaingai. Thla kan cam tikah kan sinak hmuah tanta in tangdornak thinlung thinsaunak thawn Bawipa kan pan ahcun in kan thlacammi in theisak a si. Jesuh in tahṭhimnak a simmi bangin Farasi le Siahkhong pa ih thlacamnak khalah tangdornak thawn thla a camtu hi a hlawhtling a si tiah kan hmu thei (Luk. 18:9-14). Pathian hnenah kan ṭulmi kan dil tikah Farasi pa bangin puarthaunak thinlung thawn thla kan cam pamg lo dingah ralrin a ṭul ngaingai. Siahkhongpa bangin tangdornak thawn thlaza camtu kan si cio ding a thupi zet a si.

KEIMAH IN KA LO HRIL

Baibal Caanghril: Johan 15:11-17.

        Baibal Thianghlim sung Thukam Thar kan siar tikah Jesuh ih thuhla thawn pehpar in dungthluntu pawlih nganmi le simmi pawl an bang aw deuh lo. A dang deuh ih an ngannak tete a um phahphah. Cumi thu pawl famkimzet in kan ngan thei lo ding nain mallai tarlang hmaisa ka duh. 

SANTILUAN le PIPU ZUMNAK

Baibal sirhsan: Hebru 13:7-8.

Pathian thu a lo simtu, hlanih nan hotu pawl kha ciing ringring uh. An nun sungih an umtlan daan le an thihnak thuhla pawl kha ruat sal uhla an zumnak khal cawng ṭha uh. Jesuh Khrih cu mizan, tuihsun le kumkhua in a hmun ringring a si.

Thuhmaihruai

Kan leilungpi hi a thleng-aw cak nasa. Nitin kan nunnak kan zoh tikah a thleng-aw cakzetmi san an kan nung rero. Santiluan cakzet sungah kan um. Cuti ih kan um tikah veitampi cu santiluan thlun vivo in sanman daan kan zir vivo. Zirding a ṭulnak khal tampi in a um ve. Thilṭha tampi a suahpi ih lungawi um zet. Asinain kap khatlam ah kan zoh tikah santiluan kan thlun ruangah hlanlai kan pi, kan pu, kan nu le kan pa pawlih zumnak hi ziang siar lo ih um mai ding cu kan si lo. Mihrek in an rel ṭheu ka theihmi cu “kha bang hlanlai thuhla, zumnak maimai a thupi lo, atu cu santhar sungah kan um zo. San thawn mil aw ih nun ding a thupi sawn” ti bang tla an si. A diknak a tampi ko ding nain pipu pawlih zumnak hi ol-ai tak ih hngilh mai ding le ziang siar lo ih um san men ding cu a si hrimhrim lo tiah ka ruat. Asile thulu ka tarlangmi vekin ka kheng ban lo tla a si thei men. Sikhalsehla a cang thei tawkin ka tarlang tum hnik ding.

SUALFORHNAK LE HNIKSAKNAK

(Temptation and Test)

          Hi leitlun kan nunnak ah a bang aw thluhmi thil a um thei lo. Kan hmel a bang aw lo, kan ruahnak, kan duhnak a bang aw thluh thei lo. Bang aw zik vekin a um na’n a bang aw thei ngaingai dah lo. Cutin a bang aw lomi tampi sungah zumtu hmuahhmuah in kan ton bang rep tlangmi cu a tlangpi thu in thil phunhnih a um. Cumi pawl cu thlemnak (temptation) le hniksaknak (test) tla an si. Zumtu nitin kan nun ah hi thil phunhnih hi a tong lo zo hman kan um lo. Kan thei le thei lo thu lawng a si ko ding. Ziangahtile hi thil phunhnih kan ton tikah zaran hrangah cun theihthiam a harsa ngaingai. Khuimi deuh hi thlemnak a siih khuimi deuh sawn hi hniksaknak a si timi thu hi theihthiam dingah a harsatzetmi a si.

          Curuangah Bawipai’ Thlarau Thianghlim hnen ihsin kan ngahmi fimnak siar lo cun theihthiam a har ngaingai. Ziang a si khalle hi thil phunhnih ih um daan cu hitin rel tum hnik sehla; “Thlemnak” cu duh a nung lomi kan ral a siih “Hniksaknak” cu kan hrangah duhnungza a si, tiah kan ruat ahcun a palh lem lo ding. Hi thil phunhnih thu hi a tanglam bangin a tawizawngin kan zoh tlang hnik pei.

MIFIM SI KAN CU ZO.

Atu kan san ah fimthiamnak hi a sang tuk zo. Nitin ser tharmi thil a phunphun a suak thar ringring. Cumi sungah kan theih ban lomi thil tampi a um ko ding. Kan thei ban cawk nawn lo. Pathian thu khal hi khuahlan kum thawng tampi lai ihsin an sim cia rero zomi a si. Atu khalah sim a si rero lai. Hitin sim le phuannak ah mi tampi hip theinak dingah thu a phunphun hmangin simphuang san a si. Zirhsual tampi a thleng thei. Curuangah fimkhur zetin thleidan thiam ding kan ṭul. Mi aa vekin um a theih nawn lo, mifim si dingah napin zuam kan ṭul ding. Mifim kan si theinak dingah kan ṭulmi ziang a si ti theiin zirh awknak tampi lakin Baibal ih sim le zirh duhmi hi ṭhate’n kan theifiang a ṭul ding. Kan theifiang deuh theinak dingah Socrates ih thuhla tawite thawn a tanglam vekin tarlang ka tum hnik ding.

REMDAIHNAK IH THUTHUP

(The Secret of Peace)

Filipi 4:1-9

Duhdawtmi zumtu u le nau pawl, kum thar sungah kan lut zo vekin kan thinlung, ruahnak thar thawn kan lut cio koding tiah ka zum. Zumtu kan nun ah “Remdaihnak” thawn kan khah thei ding hi a thupi zet. Hi thu thawn thazang lak cio dingah ka lo sawm duh. Filipi 4:1-9 sung kan siar tikah remdaihnak/daihnak (peace) ngah thei dingin a dotdot kaiso vivo ding a ṭulzia Paul in a sim. Pathian hnen ih a ra mi a dikmi remdaihnak ngah theinak dingah dot 6 tiang kai vivo a ṭul zia, himi dot 6 kan kai lo ahcun Pathian parih kan tuah ṭulmi kan pelh, kan tlolh lawng si loin kan hnaṭuanpi le zumtu unau pawl khal kan tuahmawh theimi a si.

ATU KAN DINHMUN HI ZIANG KAN BANG?

          Kan Lairam ah Pathian thuthangṭha a thlen hnu kum 100 kan lan zo. Khristian kan sinak khal kum 100 a kim zo. Hlanlai ah kan Laimi ih kan uar awknak bik cu miphun dang lakah rintlak sinak kan neihmi hi a si. Hlan ih Laimi pawl cu dingfel zetin an nung ih rinsan a tlakmi, thuphanper lomi, mirelsiat hmang lomi tiah miphun dangih theihmi le rintlan nun neimi kan si. Curuangah kan Laimi hminsinnak khalah “Vapual” hi kan rak cuangter.

DUHDAWTTU "PA"

(Luka 15: 11 - 32)

 

          Thuthangṭha Luka 15:11-32 sung ih  Jesuh zirhmi  tahṭhimnak hi “Fapa tlan hlo” thu tiah kan thei tam ṭheu ih a dikzetmi khal a si. Sikhalsehla hi thu hi ṭhatein kan siar asile “Fapa tlan hlo pa” ih thuhla hnakin “Duhdawttu Pa” ih thuanthu a si tihi kan fiang deuh cio ding ka zum. Jesuh ih tahṭhimmi pawl lakah Paisa hlo le Tuu hlo cu a neitu pawl in an hawl. An hawl tik khalah an hmu lai hlan lo an hawl vivo. Asinain fapa tlanhlo cu a pa hnen ihsin a tlaksuak tikah a pa in a hawl tariai lo. Cuih fapa tlan hlo cun amai’ thlennak hmun kip ah a duhtawk in a nung, a cangvai ih a nuamceen aw. Cuihsin hman ding paisa zianghman a neih nawn lo tikah amah le amah a dinhmun a zoh aw. Vok rawl petu dinhmun tiang a thlen ngah cun a pa’i inn ih hnenum pawl ih dinhmun a mang ruangro sal. A pa ih fapa dingah a tlak nawn lo hmanah a hnenum pawl ih dinhmun hman hi atu vok rawl pek dinhmun hnak cun a let tampi in an nuam ti a vun mang sal. Curuangah fapa dinhmun ah um thei nawn lo hman sehla hnenum pakhat dinhmun tal va um thei sal dingah a pa ih hnenah a tlungkir sal a si. Cutikah amai’ ruahnak vek si sawn loin a pa ih duhdawtnak tumzet in sualsir le sual phuang ih a kirsaal mi fapa tlanhlo kha a ngaidam. A sualnak hmuahhmuah a hniglh sak thluh ih  fapa dinhmun ah amah kelte’n a coter saal a si. Himi thu hi kan siar tikah a makzetmi  Pathian ih duhdawtnak thukzia kan hmu thei a si.

HLO

(Luka 15; Galati 6:1-5)

“Hlo” timi hi kan theih ciomi ṭongfang a si. A olzawng in kan sim asile “hlo” timi cu “a umnak ding hmun ah a um lo ih, a um lonak ding hmun ah um kha a si,” tiah kan sim thei. Minung pawl kan umnak ding hmunah kan um lo, kan um lonak ding hmun ih kan um ruangah Pathian hmai ah kan hlo a si cu! Ziangruangah cutin kan hlo, ti hi kan zoh sal tikah minung kan siih lei lam lawnglawng zohin kan feh ruangah a si. Thuṭhimnak pakhatte ka tarlang ta ding. Veikhat laiah mi pakhat a caw hlo a hawl. Lamzin ah mi pakhat thawn an tong aw. Cumi pa in “Ziangmi na hawl rero?” tiah a sut tikah, “ka caw a hlo ih ka hawl” tiah a sawn. “Ziangruangah na caw a hlo thei?” tiin a sut bet tikah, “Caw timi cu hrampi lawng zohin a feh vivo ruangah a hlo si ko ding,” tiah a sawn. Minung khal cuvek kan si. Lei tisa duhnak dungah kan thlun vivo tikah Pathian hmai ihsin kan hlo. Kan umnak ding hmun ih kan um lo tikah kan hlo kha a si ko. Cuih a hlomi minung pawl hawl dingah vancung sunlawinak hmuahhmuah tanta in Jesuh cu minung pianzia lakin hi leitlun ah a rung ṭum. A hlomi pawl hawl dingah a ra a si.

Baibal sungah hlo daan a phunphun ih nganmi kan hmu thei. Luka 15 sung kan siar tikah hlo phun 3 thuhla kan hmu thei. Asile minung pawl ziangtin kan hlo thei timi thuhla mallai in ka tarlang hnik ding.

CHRISTMAS ZIANGTI'N KAN HMANG?

Pathian zaangfah lamhruainak in Runtu Jesuh Khrih suahcam Christmas kan thlengsal lala thlang. Kumtin tein Christmas caan ah rundamtu Bawi Khrih cu hmuak in lungawizet in caan kan hmang cio ṭheu. Mi tampi cun keimah misual in rundam dingah Pathian cu tisa nei minung ah a rungcang ih keimah misual hawl dingah le tlen dingah a ra tiin sunglawizet in caan kan hmang. A remcang daandaan zoh in ei-in thawn suahni lawmnak a phunphun in kan hmang. Mi hrekkhat cun zu le sa thawn nomnak men in caan kan hmang. Mi hrekcun December 25 ni hi Christmas ni taktak a si lo tiin thupi ah a rel lomi khal tampi kan um. A ni ah buaipi rero tu tampi an um. Cu khal cu mah le pom daan cio in a si ih mawhthluk theih a si cuang lo. Asinain a tlangpi thu in zumtu tamsawn cun kan thupitter. Kan caan hman daan belte cu a bang aw cio lo men ding.