SIAHKHONG ZAKIA NUN IHSIN ZIRNAK

Baibal Caanghril:
“Milai Fapa cu a hlomi pawl hawl dingah le rundam dingah a ra” (Luk. 19:10)
Baibal siarbet: Luk. 19:1-10.

Zakia ih thuhla hi Sunday School nauhak kan si lai ihsin kan thei dah ciomi a si. A thuhla hla ih an phuahmi khal kan sak rero dah ko ding. Himi Siahkhong Zakia ih nunnak kan zoh tikah zumtu pawl kan zir dingmi tampi a um tiin ka ruat. Curuangah Zakia ih nun hmangin tuni ah thazaang thar lak cio dingah ka lo sawm hngai.

NA DUH VEKIN SI KO SEH!

Baibal caanghril:
“Zokhal keimah thlun a duhtu cu amah ih duhnak kha taan in a thinglamtah phur in i thlun seh” (Matthai 16:24).

Tulaiah zumtu kan tam zet thlang. Zumtu kan ti tikah a hmin men ih zumtu si ding cu a olzetmi a si. Sikhalsehla dungthluntu diktak a si lole zumtu diktak si ding cu thil ol a si lo. Dungthluntu diktak kan si theinak ding ahcun zumtu nitin kan nunnak ah ol-ai zetin a cang theimi a si fawn lo. Zumtu diktak kan si ruangah kan duh daan vekin ziangkim hi a tluang zutzo ding ti khal a si lo. Kan zawh dingmi zin hi a harzetmi a siih kan nunpi dingmi khal hi kanmai’ duhnak vekin a cang thei thluh lo dingmi a si. A hmin men in zumtu pakhat kan ti awk ih zumtu nun ih tuah ttulmi pawl zianghman tuah loin um dingah le thlahdah nun thawi’ mai’ duhtawk ih um le nun hi a ol ih a nuam nasa. Zovek minung khalin kan duhmi a siih zumtu pawl khalin cutin si thluh ding hi kan saduhthah cu a si. Sikhalsehla zumtu menmen si loin kan zummi Bawipa thawn feh tlang in a duh daan thlunih amah thawn pehzom awknak qha kan nei theinak dingah in hmuhmi lamzin cu lamzin har le kotka fiak a si (Mat. 7:14). Cumi cu kan Bawipa Jesuh ih in zirhmi le in hmuhmi lamzin khal a si.

HRIL DING PAHNIH

Hi leitlun kan nunnak ah hril ding tampi a um. Atu san thar ahhin hril ding a tam sinsin. Kan nunnak ah kan hrilmi ih zirin a sia, a ttha kan co sal leh ding. Cumi cu “cituh rahseng” tiah kan ti ttheu. A tthami kan tuah le thil ttha kan sengsal ding ih, a ttha lomi kan tuah ahcun thil ttha lo kan sengsal tengteng ding ti cu a fiangzetmi a si. Baibal in “Milai cun an tuhmi vek cekci in an khawm ding. Tisa duhnak ih a tuhtu cun thihnak a khawm ding; Thlarau duhnak ih a tuhtu cun kumkhua nunnak a khawm ding,” (Gal. 6:7-8) a ti. Kan tuhmi ziang a si timi tthatein kan ruat a ttul, kan theifiang a ttul.

THO IN DINSAL UHSI

Baibal Caanghril:
“Cutikah ‘Tho uhsila dinsal uhsi’ an ti. An tim an tuah ih hnattuan cu an thok lohli” (Nehemiah 2:18).

Thuhmaihruai
Kan khua, kan ram, kan miphun le kan pawlkom pawl kan zoh tikah hmun tampi ah kan tthangso ko nain khat lam kapah ttumsuk rero mi tampi a um. Fehpi vivo dingmi tampi a um. Remtthat sal a ttulmi tampi a um. Cumi remtthat ttulmi pawl hi zianghman siar loin kan ret men ahcun a sungah ngetin a siat sinsin dingih a hloral thluh leh ding a si. Curuangah kan ram, kan miphun duhdawt in tthatnak dingah dinsal kan ttul. Cumi hrangah kan zatein ttuanvo kan nei. Nehemiah cabu kan siar tikah hminsin tlak thupi zetmi pakhat cu, Nehemiah hi nasazet in Pathian a rinsan ih a hnenah thla a cam ringring timi a si. Ziangruangah hitin Pathian hnenih thla a cam ringring timi kan zoh tikah a ram le a miphun a duhdawt tuk ruangah a si. Curuangah Nehemiah ih nun kan zoh tikah (1) Pathian a rinsan ih a duhdawt, (2) Miphun, khua le ram a duhdawt, (3) Thlacam ringringtu a si, (4) Tumtahmi vekin a tuahsuak tengteng, timi pawl kan hmu thei.

NEHNAK NUN IN PETU JESUH KHRIH

Baibal Caanghril pawl:
“Hi bangtuk a si ko nain kannih in duhdawtu ih thawngin hi thil hmuahhmuah tlunah kannih cu nehtu hnakin kan uak deuh a si... Nun timi hi ziangso a si? Kei ka hrang ahcun nun cu Khrih a si. Curuangah thih khalle a hlawk sinsin… Nan thinlung put daan cu Khrih Jesuh ih thinlung put daan vekin siseh… Curuangah hmuitinmi lamah zuam man ngah dingin dingtein ka tlan.” (Rom 8:37; Filipi 1:21; 2:4; 3:14; 4:13).

Thuhmaihruai
Zumtu pawl cu rundamnak kan co ngah hnu ah um men dingmi kan si lo. Rundam fa kan sizia hi kan nun daan in langter vivo ding kan ttul. Kan nunnak hi Jesuh Khrih ah hram bun tahratin tthanglian vivo ding kan ttul. Jesuh Khrih thawn cat bang loin pehzom ringring kan ttul. Cutikah Jesuh Khrih ih nehnak thawngin kannih khal nehtu hnakin kan uak deuh ding a si (Rom 8:37). Kanmai’ cahnak le thil titheinak parah Khrih ih cahnak le thil ti theinak in komsak ruangah nehtu kan si theinak a si. Nehnak nun kan nei theinak hi Jesuh Khrih ruangah a si.

PITER IH SIMMI JESUH RAT DING NI

Baibal Caanghril: “Ka duhdawtmi pawl, thu pakhat hi hngilh hlah uh: Bawipa ih zoh daan ahcun ni khat le kum thawngkhat an dang aw lo; amah ih hmai ahcun an bang aw a si. Bawipa cu a thukammi kimter dingah a khul a fung a si tiah mihrek in ruat hman hai sehla, a khul a fung a si lo. Nan parah thinsaunak a neih ruangah a si sawn; ziangahtile pakhatte hman siatralnak tong lotein mi hmuahhmuah an sualnak ihsin an kir sal theinak ding a duh ruangah a si. Sikhalsehla Bawipa ih Ni cu rin lopi ah fifir bangin a ra ding. Cuih Ni ah van pawl cu huuk celcel in an hloral dingih vanih a ummi hmuahhmuah tla an kaang dingih an siatral ttheh ding. Cule leilung cu a parih a ummi thil hmuahhmuah thawn a hloral ding a si” (2 Piter 3:8-10).

DUHDAWTTU KA NU

Baibal Caanghril:
“Nupi tthatthum khi ziangtluk in ngah a har! Ruby lungvar mankhung hnakin man a nei deuh!” (Thuf. 31:10).
Baibal siarbet: Thuf. 31:10-31

Thuhmaihruai
Tuni hi leitlun Nu Ni a si. Nu ni ah kanmah le kan nu ciar kan mang cio ko ding. Nu le pa um lo sehla hi leitlun ah kan seem lo ding. Nu nih in pai lo sehla leitlun ah nunnak caan kan nei thei lo ding. Leitlun ah minung pakhat sinak in kan nunnak ding hrangah Nu in a nunnak uimi zianghman nei loin a thap aw thluh ruangah leitlun ah duh tawkin kan tlangleng theinak a si. Nu kan nei cio ih anmah thuanthu cio cu relnuam, ngainuam kan ti cio ko ding. Nu ni ah Nu sunloihnak ca a phunphun, qongkam a phunphun, biazai a phunphun le hla a phunphun thawn kan cawimawi cio. Kei khal Nu ni ah ka ciing ban tawk ka nu ih thuhla pawl kha Nu ni ah a tawinak in ka tarlang ve ding.

PATHIAN MI PAWLIH HRUK DINGMI HNIPUAN

Baibal Caanghril:
“Nannih cu Pathian ih minung nan si; a lo duhdawt hai ih amah ih hrangah a lo hrilmi nan si. Curuangah zawnruahnak, zaangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh.” (Kol. 3:12).

Thuhmaihruai
Zumtu pawl cu Pathian ih minung kan si. Pathian ih minung (Kol. 3:12) timi cu a hrante ih hrilmi pawl kan si, khawvel mi kan si lo. Cu pawl cu quanvo pakhat tuah ter dingih hmunkhat ih ret khawmmi pawl an si. Pathian ta kan siih kanmai’ ta an si (1 Kor. 6:19-20). Pathian ih duhdawtmi faate pawl kan siih a Fapa neihsun ih thiisen luangin tlencia zomi kan si. Curuangah sualnak sungih kan umsal tikah Pathian a ningna zet a si. Pathian ningna ter lo dingin kan nun kan ralring a ttul. Pathian kan duhdawt taktak a sile A ttongkam ngai in nunpi ding kan ttul. Pathian faate pawlin nitin kan nunnak ah hruk ttulmi tiah Paul ih a simmi pawl cu a tanglam vekin kan zoh ta hrih ding.

KHRIH IH TUARNAK A HLAWM AWMI

Baibal Caanghril:
“Ka duhdawtmi ka rualle uh, a harsazet hniksaknak nan tuar ruangah hin mangbangin um hlah uh; zohman ih an ton dah lomi harsatnak kan parah a thlengce ti in ruat hlah uh. Khrih ih tuarnak a hlawm-awmi nan si ruangah nan lung awi sawn uh. Cutiin nan ti a sile a sunlawinak a lang tikah nannih cu lungawinak in nan khat ding” (1 Pit. 4:12-13).

Baibal ca kan siar tikah harsatnak a tuar lo zohman kan um lo timi cu fiangzetin kan hmu thei. Ziangruangah Pathian in a faate pawl hrem le harsat a tuar siang a si pei? Minung hmaisabik (Adam) ihsin sualnak timi cu hi leilung ah a rung lut tikah minung pawl sualnak sungah kan nung ve thlang. Hi leilungpi hi sualthimpi ah a cang. Minung cu thimkhawzing sungah um kan duh. Tleunak a thlen tikah thimnak in a duh lo, a hua. Hlo ko ih tuah a duh. Tleunak ih faate pawl a siatsuah. Satan cu cuih thimnak hmun a uktu pathian a si (2 Kor. 4:4). Satan in Pathian faate pawl a hrem hngai. Sikhalsehla zumtu pawl cu Khrih thawngin nehnak cotu kan si.

JESUH KHRIH, KAN RUAHSANNAK

Baibal Caanghril:
“Cule hi ruahsannak in kan bei dong loin in tuah, ziangahtile Thlarau Thianghlim sung ihsin Pathian in a duhdawtnak cu kan thinlung sungah a burh zo. Cuih Thlarau Thianghlim cu Pathian ih in pekmi laksawng a si” (Rom 5:5).
Thuhmaihruai
“Ruahsannak” timi cu hmu ngah hrih lomi kha thinlung mit thawn a um taktak a si tiah hmu rori theinak a si. Cumi cu mi hrekkhat in “thli lakih innsak bangin” tiah an ti ttheu ih a zum duh lomi tampi an um. Asinain leitlun thil um daan pawl kan zoh tikah a um lomi zianghman a um lo, a um hrih lomi lawng a um a si, ti ding khop in thinlung mit ih a um ciami pawl a tak ih a kimnak tampi kan hmu thei a si.