Baibal Caanghril: “Ka duhdawtmi
pawl, thu pakhat hi hngilh hlah uh: Bawipa ih zoh daan ahcun ni khat le
kum thawngkhat an dang aw lo; amah ih hmai ahcun an bang aw a si. Bawipa
cu a thukammi kimter dingah a khul a fung a si tiah mihrek in ruat hman
hai sehla, a khul a fung a si lo. Nan parah thinsaunak a neih ruangah a
si sawn; ziangahtile pakhatte hman siatralnak tong lotein mi hmuahhmuah
an sualnak ihsin an kir sal theinak ding a duh ruangah a si.
Sikhalsehla Bawipa ih Ni cu rin lopi ah fifir bangin a ra ding. Cuih Ni
ah van pawl cu huuk celcel in an hloral dingih vanih a ummi hmuahhmuah
tla an kaang dingih an siatral ttheh ding. Cule leilung cu a parih a
ummi thil hmuahhmuah thawn a hloral ding a si” (2 Piter 3:8-10).
Tulai leitlun thilcangmi tampi zohin mi tampi cun Bawi Jesuh ratsalnak caan a nai tuk zo ruangah a si, tiah an tiih a palh ka ti lo. Zirhnak a phunphun an tuah. Ruahnak a phunphun an suahpi. Ziangahtile Nepal ram ah nasazet in ling a hnin. ISIS pawl le ral-awknak a luar sinsin. Buainak thawn a khat sinsin. Cumi cu Bawi Jesuh ih simmi thawn kan zoh tikah Jesuh ratsalnak ding a nai vivo timi cu a fiangzetmi a si (Mat. 24). Mi hrekkhat in Jesuh Khrih rat ding ni cekci khal an rak simphuang rero. Cutin an phuang ngam hi mangbangza a si. Ziangahtile Bawi Jesuh hmanin cuih ni ding a thei lo. “Pa lawngin a thei” a ti (Mat. 24:36). Bawi Jesuh hnak hmanin thu thei sawn kan um hi mangbangza na ti ve lo maw? Piter ih simmi Bawipa ih Ni thuhla kan zoh tlang hnik ding.
1. Pathian ih caan khiah kan thei lo.
Pathian ih thutthennak ni cu ziangruangah a thleng hrih lo a si pei? timi thusuhnak a um tikah kan theih ding a ttulmi cu Pathian ih tikcu le caan khiah hi zohman in kan thei lo timi hi a si. Pathian cu minung pawlih tikcu caan vekin hna a ttuan lo. Minung pawl cu ni le leilungpi her awknak zohin tikcu caan kan hminsin. Pathian ih tikcu caan cu cumi parah hram a bun lo, ti kha kan thei cio a ttul. Curuangah Pathian hrangah nikhat hi kum thawngkhat a si theiih kum thawngkhat khal hi nikhat a si thei thotho. Pathian in tikcu caan a sau ter thei ih a tawi ter thei a si. Pathian ih caan khiah kan thei lo ruangah ralringtein tim cia in hngak ringring ding kan ttul.
2. Thinsau zetin in hngak lai.
Piter in, “Bawipa cu a thukammi kimter dingah a khul a fung a si tiah mihrek in ruat hman hai sehla, a khul a fung a si lo. Nan parah thinsaunak a neih ruangah a si sawn; ziangahtile pakhatte hman siatralnak tong lo tein mi hmuahhmuah an sualnak ihsin an kir sal theinak ding a duh ruangah a si” a timi kan hmu thei. Pathian in a sersiammi minung pawl a duhdawt zet ruangah hremhmun ah thlen ding in siang lo. Curuangah minung pawlin Jesuh Khrih cu zumin nunnak an ngah theinak dingah thuthangttha in phuang ter. Zum lotu pawl hnenah tettikhaan dingah caan ttha in pek. Thinsau in in hngak ringring. Pathian in minung pawl sual thutthen ding a duh lo ruangah siirnak nei theinak dingah tikcu caan a sauter hrihnak a si.
3. Bawipa ih Ni cu rin lopi ah fifir bangin a ra ding.
Theih ttulmi pakhat cu “Bawipa ih Ni cu rin lopi ah fifir bangin a ra ding. Cuih Ni ah van pawl cu huuk celcel in an hloral dingih..” timi thu hi a si. Thukam Hlun ih hmanmi ttongfang vekin kan sim a sile misual pawl le a ral pawl a siatsuah ni a si (Is. 2:12; 13:6-9; Ezek. 13:5; 30:3; Joel 1:15; 2:1, 11, 31, etc.). Thukam thar sungah Bawipa ih Ni thawn pehpar aw in a simmi tampi a um. Zum lotu Israel pawl thu a tthen ding (1 Thess. 5:2; 2 Thess. 2:2). Bawipa a ratsal tikah Pathian thu a thei lotu le thuthangttha a ngai duh lotu pawl kha thu a tthen ding (2 Thess. 1:7-10). “Fifir bangin a ra ding” timi cu rin lo caan ah Jesuh a rat ding thu sim duhmi a si. “Vanih a ummi hmuahhmuah tla an kaang dingih an siatral ttheh ding. Cule leilung cu a parih a ummi thil hmuahhmuah thawn a hloral ding a si” timi thu ah van ih a ummi arsi, thlapi pawl kha an kaang thluh ding tinak a si. Culawng si loin leilung le a parih ummi thil hmuahhmuah khal a kaang thluh dingih a hloral thluh ding. Ziangkim siatsuah thluh a si leh ding, timi sim duhnak a si.
Thunetnak.
Bawipa Jesuh in, “Curuangah ralring tein um uh, ziangahtile Milai Fapa cu nan rin lo laifangah a ra ding a si” (Mat. 24:44) a ti. Bawi Jesuh a ra sal tengteng ding timi cu a fiangih kan zummi khal a si. Amah lawngte ziangtikah a ra ding timi cu a cekci in simmi a um lo. Bawi Jesuh in a thei ve lomi a rat ding ni cu minung pawlih zumhmang in an sim, an relmi zumin kan thinlung vaivuan ter duh hlah uhsi. Timtuah in, ralring cia in um ringring ding hi a thupi sawn. Jesuh rat ding ni cu Jesuh amah lala in a thei lo. Paul in khal a thei lo. Piter in khal a thei lo. Zo khalin kan thei lo. Ka thei, a titu pawl khal an zumhmang men a si. Bawi Jesuh in, “Pa lawngin a thei” a ti. Curuangah “Pa lawngin a theimi” cu a ni ah buaipi loin kannih zumtu pawl cun nitin kan nunnak ah ralring in, timtuah in, tiar aw cia in zumfeknak thawn hngak hlap ringring cio ding kan ttul a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
May 16, 2015|Saturday|11:00 pm.
Tulai leitlun thilcangmi tampi zohin mi tampi cun Bawi Jesuh ratsalnak caan a nai tuk zo ruangah a si, tiah an tiih a palh ka ti lo. Zirhnak a phunphun an tuah. Ruahnak a phunphun an suahpi. Ziangahtile Nepal ram ah nasazet in ling a hnin. ISIS pawl le ral-awknak a luar sinsin. Buainak thawn a khat sinsin. Cumi cu Bawi Jesuh ih simmi thawn kan zoh tikah Jesuh ratsalnak ding a nai vivo timi cu a fiangzetmi a si (Mat. 24). Mi hrekkhat in Jesuh Khrih rat ding ni cekci khal an rak simphuang rero. Cutin an phuang ngam hi mangbangza a si. Ziangahtile Bawi Jesuh hmanin cuih ni ding a thei lo. “Pa lawngin a thei” a ti (Mat. 24:36). Bawi Jesuh hnak hmanin thu thei sawn kan um hi mangbangza na ti ve lo maw? Piter ih simmi Bawipa ih Ni thuhla kan zoh tlang hnik ding.
1. Pathian ih caan khiah kan thei lo.
Pathian ih thutthennak ni cu ziangruangah a thleng hrih lo a si pei? timi thusuhnak a um tikah kan theih ding a ttulmi cu Pathian ih tikcu le caan khiah hi zohman in kan thei lo timi hi a si. Pathian cu minung pawlih tikcu caan vekin hna a ttuan lo. Minung pawl cu ni le leilungpi her awknak zohin tikcu caan kan hminsin. Pathian ih tikcu caan cu cumi parah hram a bun lo, ti kha kan thei cio a ttul. Curuangah Pathian hrangah nikhat hi kum thawngkhat a si theiih kum thawngkhat khal hi nikhat a si thei thotho. Pathian in tikcu caan a sau ter thei ih a tawi ter thei a si. Pathian ih caan khiah kan thei lo ruangah ralringtein tim cia in hngak ringring ding kan ttul.
2. Thinsau zetin in hngak lai.
Piter in, “Bawipa cu a thukammi kimter dingah a khul a fung a si tiah mihrek in ruat hman hai sehla, a khul a fung a si lo. Nan parah thinsaunak a neih ruangah a si sawn; ziangahtile pakhatte hman siatralnak tong lo tein mi hmuahhmuah an sualnak ihsin an kir sal theinak ding a duh ruangah a si” a timi kan hmu thei. Pathian in a sersiammi minung pawl a duhdawt zet ruangah hremhmun ah thlen ding in siang lo. Curuangah minung pawlin Jesuh Khrih cu zumin nunnak an ngah theinak dingah thuthangttha in phuang ter. Zum lotu pawl hnenah tettikhaan dingah caan ttha in pek. Thinsau in in hngak ringring. Pathian in minung pawl sual thutthen ding a duh lo ruangah siirnak nei theinak dingah tikcu caan a sauter hrihnak a si.
3. Bawipa ih Ni cu rin lopi ah fifir bangin a ra ding.
Theih ttulmi pakhat cu “Bawipa ih Ni cu rin lopi ah fifir bangin a ra ding. Cuih Ni ah van pawl cu huuk celcel in an hloral dingih..” timi thu hi a si. Thukam Hlun ih hmanmi ttongfang vekin kan sim a sile misual pawl le a ral pawl a siatsuah ni a si (Is. 2:12; 13:6-9; Ezek. 13:5; 30:3; Joel 1:15; 2:1, 11, 31, etc.). Thukam thar sungah Bawipa ih Ni thawn pehpar aw in a simmi tampi a um. Zum lotu Israel pawl thu a tthen ding (1 Thess. 5:2; 2 Thess. 2:2). Bawipa a ratsal tikah Pathian thu a thei lotu le thuthangttha a ngai duh lotu pawl kha thu a tthen ding (2 Thess. 1:7-10). “Fifir bangin a ra ding” timi cu rin lo caan ah Jesuh a rat ding thu sim duhmi a si. “Vanih a ummi hmuahhmuah tla an kaang dingih an siatral ttheh ding. Cule leilung cu a parih a ummi thil hmuahhmuah thawn a hloral ding a si” timi thu ah van ih a ummi arsi, thlapi pawl kha an kaang thluh ding tinak a si. Culawng si loin leilung le a parih ummi thil hmuahhmuah khal a kaang thluh dingih a hloral thluh ding. Ziangkim siatsuah thluh a si leh ding, timi sim duhnak a si.
Thunetnak.
Bawipa Jesuh in, “Curuangah ralring tein um uh, ziangahtile Milai Fapa cu nan rin lo laifangah a ra ding a si” (Mat. 24:44) a ti. Bawi Jesuh a ra sal tengteng ding timi cu a fiangih kan zummi khal a si. Amah lawngte ziangtikah a ra ding timi cu a cekci in simmi a um lo. Bawi Jesuh in a thei ve lomi a rat ding ni cu minung pawlih zumhmang in an sim, an relmi zumin kan thinlung vaivuan ter duh hlah uhsi. Timtuah in, ralring cia in um ringring ding hi a thupi sawn. Jesuh rat ding ni cu Jesuh amah lala in a thei lo. Paul in khal a thei lo. Piter in khal a thei lo. Zo khalin kan thei lo. Ka thei, a titu pawl khal an zumhmang men a si. Bawi Jesuh in, “Pa lawngin a thei” a ti. Curuangah “Pa lawngin a theimi” cu a ni ah buaipi loin kannih zumtu pawl cun nitin kan nunnak ah ralring in, timtuah in, tiar aw cia in zumfeknak thawn hngak hlap ringring cio ding kan ttul a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
May 16, 2015|Saturday|11:00 pm.
No comments:
Post a Comment