“Hi bangtuk a si ko nain kannih in duhdawtu ih thawngin hi thil hmuahhmuah tlunah kannih cu nehtu hnakin kan uak deuh a si... Nun timi hi ziangso a si? Kei ka hrang ahcun nun cu Khrih a si. Curuangah thih khalle a hlawk sinsin… Nan thinlung put daan cu Khrih Jesuh ih thinlung put daan vekin siseh… Curuangah hmuitinmi lamah zuam man ngah dingin dingtein ka tlan.” (Rom 8:37; Filipi 1:21; 2:4; 3:14; 4:13).
Thuhmaihruai
Zumtu pawl cu rundamnak kan co ngah hnu ah um men dingmi kan si lo. Rundam fa kan sizia hi kan nun daan in langter vivo ding kan ttul. Kan nunnak hi Jesuh Khrih ah hram bun tahratin tthanglian vivo ding kan ttul. Jesuh Khrih thawn cat bang loin pehzom ringring kan ttul. Cutikah Jesuh Khrih ih nehnak thawngin kannih khal nehtu hnakin kan uak deuh ding a si (Rom 8:37). Kanmai’ cahnak le thil titheinak parah Khrih ih cahnak le thil ti theinak in komsak ruangah nehtu kan si theinak a si. Nehnak nun kan nei theinak hi Jesuh Khrih ruangah a si.
1. Kan nunnak cu Jesuh Khrih a si.
Nehnak nun kan nei theinak dingah Jesuh Khrih kan ttul. Jesuh Khrih tel locun nehtu kan si thei dah lo ding. Cumi a theifiangtu Paul in “Kei ka hrang ahcun nun cu Khrih a si” tiah a tinak a si. Jesuh Khrih ruangah ka nung. Jesuh Khrih ruangah kumkhua nunnak ka co thei. A thi dingmi kan nunnak runsuah dingah Jesuh Khrih cu vancung sunlawinak tanta in hi leitlun ah a rung ttum. A thi cuahco mi kan nunnak in runsuak theinak dingah a nunnak a pek. Cumi a theifiangtu le nun ih a congahtu cun rundamtu Jesuh Khrih hrangah rin-um zetin kan nung ve ding a si.
2. Kan zohtthim dingmi cu Jesuh Khrih a si.
Leitlun ah zohtthim ding a tlakmi tampi an um. Cumi pawlih nunnak zoh in thazaang kan lakmi tampi a um ko. Sikhalsehla minung kan zohtthimmi pawl cu khatlam ah zohtthim tlak an si ko nain khat lam ah famkim lonak tampi a um ttheu. Leitlun minung kan si hnuhnu cu ziangkim ah a famkim thluh ti a um thei lo. Kanmai’ duhnak thupi terin kan fehpi ttheu. Jesuh Khrih cu amai’ zawn a ruat dah lo ih a Pa ih duhnak thlunin thihnak tiang a tuartu a si. Paul in a zohtthim bikmi cu Jesuh Khrih lawng a si. Curuangah, “Nanmai’ duhnak lawng si loin midang in an hrangah athupibik ah a ruahmi kha a hmuh zia thiam ve uh. Nan thinlung put daan cu Khrih Jesuh ih thinlung put daan vekin siseh,” a ti (Fil. 2:4-5). Zumtu pawl kan nunnak ah zohtthim ding kan neihsun cu Jesuh Khrih lawng a si.
3. Kan hmuitinmi cu Jesuh Khrih a si.
Minung kan nunnak ah hmuitinmi kan nei cio. Cuih hmuitinmi vekin kan hlawhtlin theinak dingah a phunphun in kan zuam cio. Harsatnak le hnaihnoknak tampi karlak ah hmuitinmi lam panin kan zuam rero. Paul ih nehnak nun a neih theinak pakhat cu a liamcia caan ih a tonmi harsatnak pawlin a nunnak le hmailam ih a hmuitinmi ah hnaihnoknak a pek thei lo ruangah a si. Cumi fiangternak ah Paul in, “Ka tuahmi cu pakhat lawng a si: ka dunglam ih a luan ciami thil kha hngilhsan tahratin ka hmailamih a ummi kha baan dingah ka dawh rero a si. Curuangah hmuitinmi lamah zuam man ngah dingin dingtein ka tlan. Cuih zuam man cu Pathian in Khrih Jesuh sung ihsin kumkhua nung dingah in run kawhnak kha a si,” a ti (Fil. 3:13-14). Paul ih hmuitinmi cu Jesuh Khrih lawng a si. Cuvekin kannih zumtu pawl khal Paul vekin Jesuh Khrih lawng hi kan hmuitimi si ding a thupi.
4. Cahnak in petu cu Jesuh Khrih a si.
David in mi cakzet Goliath a do tikah amai’ cahnak thawn a nehmi a si lo. Pathian ih cahnak thawngin a si. Baibal sung kan zoh tikah Israel mi pawl hi anmai’ cahnak ruangah si loin Pathian ih cahnak huham thawn nehnak an co vivo tiin hmun tampi ah kan hmu thei. Paul khalin Jesuh Khrih thawn an ton awk hlanah cun leitlun lam sinak in kan zoh tikah ziangkim tithei dinhmun ah a um. Sikhalsehla cumi pawl hi Jesuh Khrih thawn an ton awk tikah zianghman a si lozia fiangtein a hmu ngah. Cutikah Paul in, “Cahnak i petu Khrih sungin ziangkim ka ti thei” tiah a ti (Fil. 4:13). Zumtu kan nunnak ah ziangtluk kan fim, kan cak kan ti khalle Pathian tel locun zianghman san a tlai lo. Curuangah cahnak in petu taktak cu Jesuh Khrih a si timi hi cingkeng ringring ding a thupi.
Thunetnak.
Zumtu kan ti aw ko nain vei tampi ah Jesuh Khrih tel lo zumtu tampi kan um thei. A hmin men zumtu kan pung vivo. Kan nunnak kan zoh aw tikah Jesuh lawng hi kan nunnak a sizia thei sal uhsi. Kan zohtthim ding umsun hi Jesuh Khrih lawng a si. Jesuh Khrih zohtthim in hmuitinmi lam ah zuam man laksawng ngah dingah kan pan vivo a ttul. Cutin zuam man ngah dingin kan tlan tikah kanmai’ cahnak ring loin Jesuh Khrih ih cahnak kan ring sawn ding. Ziangahtile cahnak in petu cu Jesuh Khrih a si. Jesuh Khrih in nitin kan nunnak ah nehnak famkim in co ter thei a si. Nehtu kan si theinak hi Jesuh Khrih ruangah a si. Curuangah Paul in kannih in duhdawtu ih thawngin hi thil hmuahhmuah tlunah kannih cu nehtu hnakin kan uak deuh a si, a ti theinak a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
May 30, 2015|Saturday|11:30 pm.
No comments:
Post a Comment