Sunday, December 30, 2012

HLO


(Luka 15; Galati 6:1-5)

“Hlo” timi hi kan theih ciomi ongfang a si. A olzawng in kan sim asile “hlo” timi cu “a umnak ding hmun ah a um lo ih, a um lonak ding hmun ah um kha a si,” tiah kan sim thei. Minung pawl kan umnak ding hmunah kan um lo, kan um lonak ding hmun ih kan um ruangah Pathian hmai ah kan hlo a si cu! Ziangruangah cutin kan hlo, ti hi kan zoh sal tikah minung kan siih lei lam lawnglawng zohin kan feh ruangah a si. Thuhimnak pakhatte ka tarlang ta ding. Veikhat laiah mi pakhat a caw hlo a hawl. Lamzin ah mi pakhat thawn an tong aw. Cumi pa in “Ziangmi na hawl rero?” tiah a sut tikah, “ka caw a hlo ih ka hawl” tiah a sawn. “Ziangruangah na caw a hlo thei?” tiin a sut bet tikah, “Caw timi cu hrampi lawng zohin a feh vivo ruangah a hlo si ko ding,” tiah a sawn. Minung khal cuvek kan si. Lei tisa duhnak dungah kan thlun vivo tikah Pathian hmai ihsin kan hlo. Kan umnak ding hmun ih kan um lo tikah kan hlo kha a si ko. Cuih a hlomi minung pawl hawl dingah vancung sunlawinak hmuahhmuah tanta in Jesuh cu minung pianzia lakin hi leitlun ah a rung um. A hlomi pawl hawl dingah a ra a si.
Baibal sungah hlo daan a phunphun ih nganmi kan hmu thei. Luka 15 sung kan siar tikah hlo phun 3 thuhla kan hmu thei. Asile minung pawl ziangtin kan hlo thei timi thuhla mallai in ka tarlang hnik ding.

Friday, December 21, 2012

CHRISTMAS ZIANGTI'N KAN HMANG?


Pathian zaangfah lamhruainak in Runtu Jesuh Khrih suahcam Christmas kan thlengsal lala thlang. Kumtin tein Christmas caan ah rundamtu Bawi Khrih cu hmuak in lungawizet in caan kan hmang cio ṭheu. Mi tampi cun keimah misual in rundam dingah Pathian cu tisa nei minung ah a rungcang ih keimah misual hawl dingah le tlen dingah a ra tiin sunglawizet in caan kan hmang. A remcang daandaan zoh in ei-in thawn suahni lawmnak a phunphun in kan hmang. Mi hrekkhat cun zu le sa thawn nomnak men in caan kan hmang. Mi hrekcun December 25 ni hi Christmas ni taktak a si lo tiin thupi ah a rel lomi khal tampi kan um. A ni ah buaipi rero tu tampi an um. Cu khal cu mah le pom daan cio in a si ih mawhthluk theih a si cuang lo. Asinain a tlangpi thu in zumtu tamsawn cun kan thupitter. Kan caan hman daan belte cu a bang aw cio lo men ding.

Friday, December 14, 2012

RAALPI SUNGIH CHRISTMAS


      A caan cu 1914 kum raalpi veikhatnak ah a si. Britist raalkap pawl le German raalkap pawl an do aw rero hnu thla malte sunglawng a rei hrih. France ram sungah Britist raalkap le German raalkap pawl khatlam le khatlam leikhur an lai ih pukpi tank thawn an do aw rero laifang caan a si.
        Leikhur pawl sung ahcun zinghnam khal an tam zet. Ciarbek khal a khat. Raalkap bur pahnih karlak ah thingkung khal mal lai cu a kho. Leikhur sung khalah pukpi tank ih a kah ngahmi lei kuar khal tampi a um. Thil cangvai an hmu vete’n an kap aw cingcing. Raalkap bur pahnih cu an naih aw ngaingai.
         Jesuh Khrih suah ni Chrismas a nai deuhdeuh. Khristmas ni thlenhlan nikhat duh ahcun raal an do-awknak hi mallai cu a dai ṭhepṭhep.

Tuesday, December 11, 2012

A HMAISABIK CHRISTMAS


(Mat. 1:22-23; Luk. 2:8-14)

          Tikcu le caan a hung herliam vivo. Ṭhaal caan sa hemhem kan lan hnu fuur caan ah ruahpi napi in a sur ih ruahti in toihmi thawn kan ciar hiamhiam. Cuihsin thlatang khuasik caan cu kan vun thleng. Pathian zaangfah lamhruainak in Runtu Jesuh Khrih suahcam Christmas kan thlengsal lala thlang. Kumtin tein Christmas caan ah rundamtu Bawi Khrih cu hmuak in lungawizet in caan kan hmang ṭheu. Unau sungkhat hrekkhat ih mual in liamsan mi khal a um. Harsatnak tampi kan ton caan khal a um. Asinain himi Christmas caan ah Mi tampi cun keimah misual in rundam dingah Pathian cu minung ah a rungcang ih keimah in hawl dingah a ra a si, tiin sunglawizet in caan kan hmang thei sal. Khuadang hmundang ih a umtu pawl khal sungkim thei dingin mah le innsang cio ah an tlungsal cio. A remcang daan zoh in ei-in a phunphun thawn suahni lomnak kan hmang. Nuam kan ti cio. Kan lungawi cio. Kan Bawipa Jesuh Khrih a sunglawi hleice ee!

Friday, November 30, 2012

RUNTU JESUH SUAHNAK THUTHANG

(Matthai 1:21; Isa. 7:14)


          Sersiamtu Pathian le a sersiammi leilung minung pawlih sualnak ruangah an karlak ih pehzomnak a catih ṭhen awknak a suak. Cuticun Pathian le minung karlak ah pehzomnak a um thei nawn lo. Curuangah Pathian in pehzomnak a um sal dingin a phunphun in khawkhannak a tuah. Pathian le minung karlak ih a cat zomi pehzomawknak nei sal thei dingin kum tampi sung hna a ṭuan. Pehzom awk thei dingah a phunphun in hna a ṭuan. A duhdawtmi minung pawl kumkhua hloral ding in siang hrimhrim lo ti a fiang. Cutiih pehzom theinak dingah le minung pawl runtu dingah Messiah a rat leh ding thu hi Jesuh suah hlan kum 700 leng lo ah Profet Isaiah hnenah a rak sim cia zo. Thungaithlak in kan ruat tikah Pathian in Jesuh Khrih (Messiah) thlah dingih a timtuahnak hi cuhnak hman in a rei deuh thei men a si. Ziangahtile Pathian in a duhdawtmi minung pawl hi amai’ hmuihmel kengih sersiammi a si ruangah cuih minung pawl thawn pehzom pawlkomnak nei sal dinghi a duh bikmi a si. Hloral lanta ding hi a siang hrimhrim lo. Curuangah Thukam hlun kan siar tikah a hrilmi profet tampi hmangin a fapa Jesuh a thlah ding thu hi a phunphun in a sim cia rero. Asinain Jesuh rat ding thu thawn peh awin thuthang an ngah daan cu a phunphun in a rak um. Pakhat le pakhat a bang aw lo. Ziangvek thuthang pawl hi zovek pawlin ziangtin an ngah cio tiah a tanglam bangin zoh tlang cio uhsi. Thuthang an cohlang daan tampi a ummi sungin mallai kan tarlang hnik ding.

Monday, November 26, 2012

KAN RUAHSANMI CU PATHIAN LAWNGAH A SI

Baibal sirhsan:-

“Ziangah so hitluk lawmmam in ka riah a siat? Ziangah so hitluk lawmmam in ka thinlung a bang? Asinain ka ruahsanmi cu Pathian lawng a si. Amah cu ka thangṭhat sal ding. I Runtu le ka Pathian cu!” (Saam 42:5, 11).
         
          BC 541 kum laiah Babilon ram ih siangpahrang cu Nabonidat (Nabonidus) a si. Nabonidat siangpahrang san laiah Israel miphun pawl hi Babilon kut hnuai ah ral kaih an tuar laifang a si. Jerusalem biakinnpi khal siatsuahnak a tuar ih khua kulhnak khal siatbal thluh in harsatnak phunkim an tuar lai caan a si. Hih caan laifang ah Babilon ram khal saklam Persia ram ih Sairas siangpahrang thazaang a cak thok ve ruangah ram hnih ral do awk ding thu a suak phahphah. Cutikah Babilon ralkaih a tuarmi Israel mi pawl cu an thin a phang ngaingai. Pursum leilawn hrangah zianghman an ṭuan thei fawn lo, thubuai tampi a suak ih ral a phunphun a um ruangah humhimnak zianghman a um lo.

Monday, November 19, 2012

JESUH KHRIH IH THINLUNG PUT

(Filipi 2:1-11)

Kan Bawipa Jesuh Khrih in “Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding. Ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding. Ziangahtile keiih kawn phurh cu a nuam ih ka thil khal a zaang a si.” a ti (Mat. 11:30).
Himi Baibal ca kan zoh tikah Bawipai’ kawn cu phurh a nuam ih zaang khal a zaang, tiah kan hmu thei. Cutiih a si theinak ding ahcun minung ruahnak, khawkhannak le kan thazaang in a tlin thei lo ding. Curuangah cuih kawn kan phur theinak dingah Jesuh hnenah kan zir hmaisa a ṭul. Kan ṭhum aw hmaisa a ṭul. Kawn phur daan timi tawhfung kan thei tik lawngah phurh a nuam dingih kan phurh khal a zaang ding a si. Cumi tawhfung thawn a ram le a felnak cu kan nunnak ah kan dinsuah thei ding ti cu a fiangzetmi a si. 

Monday, November 12, 2012

NETABIK THUCAH PATHUM


Alexander (Alexander the Great) ralbawi (siangpahrang) cu ram tampi a do neh vivo hnu ah a innlam panin a tlungkir sal. Cutin a tlun phah lamzin ah besiazet natnak a ngah. Cuih natnak a tuar cun ka nung thei nawn lo ding tiah a thei aw. Cutikah ram a nehmi pawl, a neihmi thilri le hriamnak pawl lennak pawl hi a lakmen an si tiah a theifiang aw vivo. A netnak ah a nu ih mihhmaite zohin cibai buk duhzetnak thinlung a nei. Sikhalsehla a tuarmi a natnak in inn a thleng thei nawn lo ding ti a theifiang aw fawn. A cakzetmi, ral ṭhazetmi siangpahrang pa cu a mithmai thiisen um cuca loin a thaw cem ding caan hngak rero in a um.

Sunday, November 11, 2012

LAI NUNPHUNG LE LAI KUMTHAR PUAI

(Chin Culture and Chin New Year)

          Chin Christian Community of Philippines (CCC_P) ih tawlrelmi 2012 kum “Lai Kumthar puai” ah thuhla ngan thei dingah duhsaknak tumpi thawn ṭuanvo in peknak parah ka lungawi ngaingai. Lai Nunphung le Lai Kumthar Puai thu hi Laimi pawlin kan theih ṭulzetmi pakhat a si tiah ka ruat. Hi thuhla ka ngan tikah ka theih ban tawkte ngan ka tum hnik ding. Duhthusam vekin famkim zet in ka ngan thei lo ding, ti cu ka thei aw cia ko. Asinain a cang thei tawkin ka khawlkhawm cia dahmi le ka ngan dahmi cahram tete pawl khawm sal in “Lai Nunphung le Lai Kumthar Puai” tiah thulu bun in ka ngan a si. Cun, himi cahram sungah “Chin” le “Lai” khuimi sawn hman ding timi thu ah kan hman tambikmi tiin ka ruahmi “Lai” hi hmang sawn dingah ka hril deuh a si. Ziangahtile kum reipi kan hman rero mi a siih kanmah le kanmah kan kawh awknak ih kan hman thawt cia mi a si ruangah ka hman deuhnak a si. Cuin tlunah ‘Lai Kumthar puai’ thu lawng si loin ‘Lai Nunphung’ thu hi tam deuh in ka rak ngan. Ziangahtile “puai” timi hi “nunphung” sungih kan neihmi pakhat a si tiah ka ruah ruangah a si. A famkim lonak parah ngaithiam ka lo dil.

Thursday, November 8, 2012

PATHIAN IH RALTHUAM KIM

(The Christian in Complete Armour)
 
Zumtu hmuahhmuah hrangah Jesuh Khrih cu kan ziangkim a si tiah Paul in Efesa cakuat sungah a ngan. Khristian nun hi raal tampi in a kimveel ruangah ralringte’n nung ding ah a forh hngai. Kawhhran in a raalpa satan ih sualforhnak phunkim a tuar heu. Zumtu pawl ih kan ral hi tisa nei minung an si lo, hmuh theih milai khal an si lo. Khristian pawl ih ral tum bik cu satan, minung ih tisa hiarnak le duh hiarnak pawl tla an si. Jesuh Khrih thawngin nehtu dinhmun ah kan um zo ko nan satan cu in ra do thei thotho. Kawhhran sungah zumfeknak a nei mi siseh, zumnak thazaang a mal pawl siseh mi zovek khalin satan ih tukforhnak a tuarlo kan um lo. Cutikah zumtu cun do lo theih lo in satan raal cu do a ul.

Friday, October 26, 2012

MAH LE MAH THEIH AWKNAK LAMZIN


(Ways to Self-Knowledge)

          Midang thawn kan pehzom awk tikah an thu le hla ṭhate ih theifiang dingah kanmah in mi kan pehtlaih daan le kan nun kan theifiangawk hmaisat a ul. Kanmah le kanmah kan theih awk hmaisa ahcun midang thawn kan pehzom awknak hrangah a ṭhahnemzet a si. Mahte nun theih awknak dingah cek-awk daan phun (4) a um. Pastor, Zirhtu, Baibal tlawngta le Khristian mi pitling pakhat si dingin, tuahṭhat-awk le remṭhat-awk theinak ding ruahsanmi a si. Himi mah le mah theihawknak lamzin (4) cu, “Johari Window” tiah an ko. Himi “Johari Window” timi hmin hi a hram a thoktu American miphun ‘Joe’ le ‘Harry’ tei’ hmin pahnih kommi a si.
            Pumpak kan nun cio ah kanmahte’n kan theih awmi le theih-aw lomi nun a um. Cuvek thotho in kan nun daan khal midang in in theihmi a um ih, in theih lomi nun khal a um. Cuih nun phun (4) cu hibang pawl tla hi an si.

Monday, October 22, 2012

CASIAR KAN ZAANGZEL TUK MAW?

Casiar kan zaangzel tuk maw?
(Dr. S. Parkes Cadman ih ca siar daan)

Laimi pawl hi casiar zaangzel pawl kan si tiah mi tampi in an sim qheumi ka thei. Cumi lakah kannih Falam mi hi casiar zaangzel sinsin pawl kan si hmang. Kawl qongqhim ah “Cabu calai minung ih rualpi, fimthiamnak ca sungah a um” (Sar-oke sarpay luh meikswe, Alingmar sar hma shih) an timi hi a dik zet. Casiar paihzet pawl cu an casiarmi ruangah fimnak tampi an ngah. Cuih fimthiamnak an ngahmi cu a takin an hmang ih qhansonak an ngah. Mi hminthang zetzet ah an cang. Kannih Laimi pawl hi casiar kan zaangzel, casuakmi khal lei kan paih lo, a siar sinsin cu simrel ding a um nawn lo. Curuangah midang kan unau Laimi pawl van an ban thlangnan kannih cu mi dungah kan um ringring lai.

Sunday, October 21, 2012

ZIANG LO TUAHSAK DINGSO NA DUH?

Canghril:-
“Ziang lo tuah sak ding so na duh?” tiah Jesuh in a sut. Mitcaw pa in,

“Sayapa khua hmuh thei sal ka duh,” tiah a ti.
(Marka 10:51-52).

Thuhmaihruai
Kan Bawipa Jesuh Khrih hi leitlun a um laiah mangbangza thil tampi a tuah timi thu hi kan thei cio mi a si. A hleice in Judah peng le Galilee peng sungah Thuthangha sim le phuang in a um laiah mangbangza tampi a tuah. Minung sung ihsin khawsia a dawi sak, Mitcaw pawl khua a hmu ter, Kut le Ke a zengmi pawl a dam ter, mithi pawl a tho ter. Cumi mangbangza pawl a tuah tikah vei tampi ahcun tumtahnak nei cia ih tuahmi a si lem lo. Khual a tlawng phah vivo lai ah a ulnak vekin a rak tuahmi tla an si. Mi harsa pawl a bawm tikah mipi in thei hai seh, tiah laar duhnak thawn sunglawi zetin a tuah dah lo. Amai' uan kel hnauan pakhat vekin a rak tuah menmi pawl an si heu.

THLALANGTE PAKHAT

Veikhat cu innkhaan tumpi pakhat sungah mi tamnawn hmunkhatah an khawm tlang. Cuih hmunah cun mi hminthang tampi an tel ve. Thu thei tampi an ra ve ih rinsantlak deuh hlir an si. Cu pawl lakah kei khal ka ve tel ve. Culaifang ah thu theih hiar zetmi pakhat ka neihmi kha ka sup aw thei lo ih Dr. DeRose timi mi tampi ih rinsan zetmi hnenah hiti’n thu ka hei sut. “Dr. DeRose, nang hi hmuhtonnak tampi na nei zo. Thu tthattha tampi hmangin mi zirhtu na si. Nunnak timi ih a sullam hi ziang a si? ti i sim thei pei maw?” ka ti. Cuih thu ka sut tikah innsung ih a umtu pawl cu hnihsuakza capoh pakhat ngai ngah vekin an hni siamso. A hrek in an theihmi vekin simfiang dingah an tum ve.

Friday, October 19, 2012

ATU KAN DINHMUN IH ZIANG KAN BANG?


Kan Lairam ah Pathian thuthangṭha a thlen hnu kum 100 kan lan zo. Khristian kan sinak khal kum 100 a kim zo. Hlanlai ah kan Laimi ih kan uar awknak bik cu miphun dang lakah rintlak sinak kan neihmi hi a si. Hlan ih Laimi pawl cu dingfel zetin an nung ih rinsan a tlakmi, thuphanper lomi, mirelsiat hmang lomi tiah miphun dangih theihmi le rintlan nun neimi kan si. Curuangah kan Laimi hminsinnak khalah “Vapual” hi kan rak cuangter.

A THATNAK LAMIH HMU THIAMTU (Optimist)


Minung hi kan bangaw ṭheh lo. Kan pianzia a phunphun in a umih kan ruahnak khal a phun dang cio a si. Kan thinlungput um daan khal a bang aw lo, a dang cio. Kan kiangkap ih thil cangmi khal kan hmuh daan a dang aw ṭheu. Ka rualpa pakhat hi ziangkim a ṭha lam in a hmu thiam ṭheu. A ṭongmi pawl hi capoh ṭongkam vek a bang na’n ṭhate’n ruat tikah a dikzetnak tampi a um. A sim ṭheu dahmi cu hitin a si: Thuṭhimnak ah, mi pakhat khat in a hnenah, “Na va thau ve” an ti asile anih cun, “Na mit a thau” a ti. “Mit thau” ti cu a um thei lomi a si. Kan mit cu amah kel a si ko ding nain na hmuh daan men a si ko, ti thawn a bangaw vekin lak theih a si. “Na hmel a sia tuk aw,” ti tik khalah “Na mit a sia ruangah a si ko” a ti thotho.

SANGKA TE


Veikhat cu siizungpi pakhat ah mina pahnih cu khaankhat sungah an um tlang. An umnak khaan fate sungah sangkate pakhat lawng a um. Cuih mina pahnih cu na menmen si loin dam lo besiazet veve an si. Mina pakhat deuh cu sangkate kiangah an retih zaanlam tinte’n khua a cuan ringring. Cuticun a ni, zarh le thla in an rak um tlang.

KAWHHRAN KAIHHRUAI AWKNAK

Baibal Sirhsan: 1 Timote 3:1-16


Leitlun kan tlanlen caan tawite sungah kaihhruai awknak hi a thupizetmi a si. Mibur tawkfang umkhawmnak hmun ahcun kaihhruai awknak um ding hi a ul tengteng mi a si. Khawtlang nun ah siseh, Kawhhran le pawlkom a phunphun ah siseh, kaihhruai awknak a hat cun cuih khawtlang, Kawhhran le pawlkom pawl a hangso thei ding. Cuvek hiamhiam in Kawhhran sung khalah kan kaihhruai awknak a hat a si ahcun kan hangso tengteng ko ding. Curuangah kaihhruai awknak thu thawn tuisan ah a phunphun in zirh awknak a ummi sungin 1 Timote bung 3 sungah Paul in Timote hnenih a zirhmi thu thawn peh aw in zoh tlang cio uhsi. A famkim lo zet ding nain kanmah le Kawhhran ciar kan kaihhruainak hrangah hathnemnak mallai in pe theitu a si ko ding tiah ruahsannak ka nei.

HLAWHTLINNAK LAMZIN


Mi zovek khal in hlawhtlin thei ding hi kan duh cio. Kan hnattuanmi le kan tuahmi, kan tumtahmi pawlah hlawhtlin thei dingin a phunphun in kan zuam cio ttheu. Mah le pumpak in siseh, kan pawlkom hnattuannak ah siseh, kan tumtahmi le kan ttuanmi a hlawhtlin theinak dingah nasazet in ttan la in kan zuam ttheu. Minung kan si cun mi zovek khalin hlawhtlinnak a duh lotu cu kan um lo ding. Kan tuah, kan ttuanmi zate’n hlawhtling thluh sehla ti hi kan saduhthah cio a si ko ding. Kanmah keel kan awh hrih, timi hi a ttha vek a bang na’n tthansonak zianghman a um lo ti thawn a bang aw zik thei men. Hlawhtlinnak thu thawn hmuh daan a phunphun a um dingih ka hmuh daan mallai in tarlang ka duh ve.

Thursday, October 18, 2012

KAN TIKCU CAANTHA ZIANGTIN KAN HMANG?

Pathian zaangfah lamhruainak in kumpi kumkhat cu kan liam thlangih kumthar sungah kan lutsal lala thlang. Atu caan hi liamciami kumkhat sung Pathian ih in umpinak, lam in hruainak pawl ruat sal le zohkir in a zaangfahnak pakhat hnu pakhat siarphah in Pathian hnenah lungawi thusim ding caan a si. Ziangtluk caan remcang lo, caan harsa kan ti khalle kumpi kumkhat sungah khopkham te in kan ei, harsatnak tampi kan tong phah kona’n kan pahsuak, kan lansuak thei, himdam te in kan um, damcahnak caan tamsawn kan ngah. Ni 365 sung him le damtein a thla hnuai ah in kilkhawi ih atuvek caan qha sunglawi ngah in kan um thei hi lungawi thusim ding hrimhrim kan si.

NAN CAANTHA MAN NEI ZETIN HMANG UH



Baibal Canghril:
Curuangah nan nun daanah hin ralring uh. Mi aa bangin nung hlah uh; a fimmi bangin nung uh. Caan ha nan neihmi kip kha man nei zetin hmang uh; ziangahtile kan san hi sansia a si. Mi aa si hlah uh; Bawipa in tuahter a lo duhmi kha hawl tum sawn uh. (Efesa 5:15-17).

NUNNAK HRANGAH BAIBAL CA THIANGHLIM

Baibal Caanghril:
          “Ca Thianghlim hmuahhmuah hi Pathian ih thawkhummi a si ih thutak zirhnak, zirhsual simhrinnak, a sualmi remsaalnak ah le dingteih nitin nunnak ih zirh awknak ah a ha. Cutiih Pathian hna a uantu cu mi tlamtling a si ding ih thil ha phunzakip tuah dingah thuam famkim neimi a si ding” (2 Timote 3:16-17).
          Bawipa ih daan cu a famkim, Nunnak thartertu a si. Bawipa ih thupekmi pawl cu rintlak an si, A fim lomi fimnak petu a si. Bawipa ih daan pawl cu a dikzet, A thluntu hrangah lungawinak a si. A thukham pawl cu a dikzet, Thinlung mit vaangtertu a si. Bawipa ihzah cu a thiangfai, Kumkhua in a hmun ringring. Bawipa ih thu hennak cu a dik, Ziangtik khalah a dik a si” (Saam 19:7-9).

Wednesday, October 3, 2012

LUNGAWI THUSIMNAK IH HUHAM

 Thuhmaihruai:       
Leitlun milai hmuahhmuah in lungawi thusim thiam lotu zohman kan um lo men ding. Nunnak a neitu milai hmuahhmuah in kanmah le sinak cio in lungawi thusim daan kan thiam ṭheh. Curuangah "Lungawi thusim" timi ṭongfang hi a nung Pathian a biatu zumtu (Khristian) pawl lawngih hman ṭheu mi si loin, a nung Pathian thei lo le a bia lotu pawl khalih hman vemi a rak si. Ṭhate'n kan ruatsal tikah zumtu pawl hnak hmanin zum lotu pawlin, "Lungawi thusim" hi an hmang tam deuh ṭheu a bang. Zumtu mi tampi cun kanmah tlunih thil ṭha a thlen tikah le kan duhthusam asilole saduhthah a kim tik lawngah lungawi thu kan sim ṭheu. Cucu mi zovek khalih kan tuah theimi a si. Asinain kan duhthusam vekih thil a cang sal lo tikah lungawi thusim ding hi kan ruat dah lem lo. Lungawi thu sim ding khal kan duh sal nawn lo.

Saturday, September 8, 2012

SAN SAU IN NUNG NA DUH MAW?

Kan unau Kawlmi pawlin an zirh awkmi cu “Pathian, Thu, Pastor, Nu le Pa, le Saya pawl ṭihzah upa sunloih uh” (Phaya, Taya, Tan-ga; Miba Saya kandawh bar) ti a si. Nu le Pa hi “Anandaw, ananda gaing-win” an tiih hmunkhat ah an ret ih an upatmi a si. Kannih Khristian zirh awknak khalah Nu le Pa ṭihzah upat hi a thupi ih nun ah kan neih ding a thupizetmi a si.

Thursday, August 16, 2012

NA DUH VEKIN SI KO SEH!



Baibal Canghril: Matthai 16:24; 26:36-39

Kan Pathian ih khuaruah daan hi minung ih kan ruahvek a si dah lo. Pathian ih khawkhannak khal minung duhnak vekin a si dah lo. Pathian in van tla khi leilung hnak in a sang bangtukin ka ruahnak le ka lamzin khal nan ruahnak le lamzin hnakin a sang a si, a ti (Is. 55:8-9). Curuangah kan Pathian in zumtu pawl in kaihhruai tum daan hi a phundang zet. Pathian ih in fehpi daan cu zumtu tampi in kan feh duh daan vekin a si dah lo. Kan tumtah cia mi vekin khal a si thluh dah lo.

Wednesday, February 29, 2012

KAWHHRAN HRUAITU PAWLIH NEIHTULMI SINAK LE AN HNATUAN


I. KAIHHRUAI AWKNAK (Leadership)

Kaihhruaiawknak timi thu hi a kauzet ih a thukzet fawn. Kaihhruaiawk daan a phunphun a umih caan tawite sungah zir thluh ding ti hi cu a har ngaingai mi thu a si. Asinain kan ti thei tawkte mallai in kan tarlang ve hnik ding.

Hruaitu qha cun hna an quan zikah nasa zet in thu an ruat hmaisa ta qheu. Midang hnenah thu va ron ding khal an ning a zak lo ih, midang ih thusimmi thlun  ding khal a qul can ahcun an hreh dah lo. Curuangah thu qhencatnak an tuahmi cu remqhat a qul sal ciamco lo ih, a si daan ding vekin a feh qheu. Hruaitu cu mipi hrangih hnaquantu an si vek in an thu qhencatmi hi mipi hrangah a thupizet a si, ti hi an theithiam awkzet qheu.

IMMANUEL/Pathian Kan Hnenah A Um

Baibal Caanghril:
“Fala him pakhat in fa a vun dingih fapa a hring ding, a hmin ah Immanuel tiah an ko ding (Immanuel timi cu ‘Pathian kan hnenah a um’, tinak a si)” {Matthai 1:23}.

Christmas timi hi a danglam zetmi a si. Ziangahtile ziangkim sersiamtu huham nei Pathian in a sinak hmuah tanta in minung sinak ih rung pian caan a si. A hloralmi minung le Pathian karlak ih a cat zomi kha pehzomnak a thar ih kom salnak caan a si. Christmas ruangih zumtu lungput le kan ruah daan khal a bang aw lo cio ko ding. Tulai ahcun Christmas tuah le tuah lo ding thu khal ah zirhnak a phunphun in a suak vivo. Kanmah le ruahnak in kan hmang vivo. A hrek in Christmas a ṭul lo tiah duh lo lam in a ṭangtu tawkfang an um. Mi tamsawn cun a thupitukmi a si tiah hman tengteng dingin timtuahnak nasazet kan nei sinsin. Cuticun Christmas in a thupitnak hmun tampi a nei ti hi el theih a si lo ding. 

A TLAITUKZO MAW?

Mi tampi kan thin in hnaihnok ter qheumi qongfang pakhat cu “a tlai tuk zo so khaw,” timi hi a si.

Phun hra ong lo ruangih tlawngkai peh nawn in hna a quantu mi pakhat in a hnaquan quanmi parah a lung a kim thei lo ding. Tu ah ca phun sang kai in, degree khal ngah in zirnak sang nei sehla hnaquan qha ka ngah thei ding nan si khawh, tiah a ruat ko ding. Sikhalsehla atu cu a tlai tuk zo sisi, tiah a ti ko ding.

KHRIH IH DAIHNAKIN IN UK SEH!


Baibal canghril: Kolose 3:12-17

Pathian lamhruainak in kumkhat hnu kumkhat kan liam vivo ih dam le cakin kan um thei hrih. Pathian ih zaangfahnak le a kutcak in lam in hruainak parah lungawi thu sim ding lawnglawng a khat. Harsatnak, lungawinak, riahsiatnak, nomnak a phunphun in kan tikcu le caan kan hmang cio. Ziang a va si khalle Pathian ih lamrhainak in hi ti vekin caan tampi kan hman theinak a si ti a fiang. 

Friday, February 24, 2012

A THLENG AW RERO MI SANAH ZIANGTIN KAN NUNG DING?



Kum a cem zawngah a liamciami caan pawl kan zohkir salheu. Cutikah kan san hi zamrangzet in a thleng aw rero tihi kan hmu thei ciomi a si. Nidanglai ahcun rocket san, computer san kan tiih san hi a hercak zet ah kan ruat. Kan Laimi dinhmun hrangah cun a zamrang tuk zomi a si ko. Culawng si loin atu cu Information Technology timi IT san kan thleng ih hmakhatte ah leitlun khuihmun ih thilcangmi khal theih thei a si thlang. Hitivek caan sungah caan tawkfang kan hmang thlang. Leitlun khuazakip ih ummi pawl khal pakhat le pakhat hmel rori hmu awk ih biak-aw theimi web camera timi khal a suak thar vivo thlang. Kan ruahban dah lomi pawl an si. Cuticun kan tikcu caan hi a thleng-awcak zet ih a hangso ngaingai ti kan hmu thei a si.