THLALANGTE PAKHAT

Veikhat cu innkhaan tumpi pakhat sungah mi tamnawn hmunkhatah an khawm tlang. Cuih hmunah cun mi hminthang tampi an tel ve. Thu thei tampi an ra ve ih rinsantlak deuh hlir an si. Cu pawl lakah kei khal ka ve tel ve. Culaifang ah thu theih hiar zetmi pakhat ka neihmi kha ka sup aw thei lo ih Dr. DeRose timi mi tampi ih rinsan zetmi hnenah hiti’n thu ka hei sut. “Dr. DeRose, nang hi hmuhtonnak tampi na nei zo. Thu tthattha tampi hmangin mi zirhtu na si. Nunnak timi ih a sullam hi ziang a si? ti i sim thei pei maw?” ka ti. Cuih thu ka sut tikah innsung ih a umtu pawl cu hnihsuakza capoh pakhat ngai ngah vekin an hni siamso. A hrek in an theihmi vekin simfiang dingah an tum ve.

Dr. DeRose cun innkhan sungih a ummi pawl kha daite ih um lawk dingah a kut a hei zap/hmuh. Cule ka mithmai kha tthate’n a zoh ringring. “Theih duh ngaingai ruangah thungai thlak in thu i sut maw?” tiah ka mit rori i zoh. Theih hiar/duh tuk ruangih cuih thu ka suhmi a sizia kha ka mithmai ah a hmu ngah a si hmang. Cuticun a bawngbi zal sung a hei pur ih a peisa bawm a suah. Cuih paisa bawm sungah a retmi thlalang fate zet pakhat a hei lak. Cule hitin a sim: “Na thu suhmi ka lo sawn ding” tiah i ti ih a tanglam vekin thu saupi in sim.

“Leitlun Raalpi veihnihnak a suak laiah nauhakte ka rak si. Kan innsaang hi kan farah zet. Khuapi thawn a hlat awzetmi khua fate ah kan um. Nikhat cu kan khua lamzin parah thlalang a kuaimi pawl ka tong. Germany Motor cycle pakhat cu cuih hmun ah a tuahmawh ngahsual pang (accident) dah ih cumi ih ta a sarmi thlalang kuaite kha a si.

Thlalang kuai pawl a zate’n ka sar thluh sal ih zom-aw leh thluh sal dingah a phunphun in napi’n ka zuam rero na’n ka zom ngah thei hrimhrim lo. Curuangah cuih thlalang kuai pawl lak ihsin a tum nawn pakhat lawng ka lak. Cuih thlalang kuaite kha a hluumte ah a cangsuak thei dingah nitin lungto parah ka tat ringring. Nauhakte pakhat ka si vekin cuih thlalang hlumte cu ka leknak ah ka hmang ringring. Cuticun a rei tikah ka thinlung sungah thu ka ruat ngahmi pakhat cu "himi thlalang fate hmangin khurkua sung, innthim sung tivek pawlah nitleu ka kuat thei ding ual" tiah ka ruatsuak ngah. Cutikah ka kiangkap ka hei thlir hnik ih khui hmun pawl hi a thim biknak hmun a si, tleunak a thlen lonak hmun khui ah an um ti kha ka hawl. Cuih a thimnak hmun pawl ah a phunphun in nitleu kuat thei dingah ka zuam ttheu. Cumi hi ka nauhak laiih lehnak tampi lakah i nuamter zetmi leknak phun khat ah a cang a si.

Cuih thlalang hlumte cu ka ret ringring. Ka hung upa vivo hnu khalah caan lawng ka neih tikah cuih thlalang hlumte cu ka suah ttheu. Ka nauhak lai ih ka tuah dahmi vekin a thimnak hmun pawlah nitleu cerh thei dingin ka tuah phah ttheu. Kum upa ka si vekin ka ruahnak khal a kau vivo ih nauhak lai ruah vek a si nawn lo. Himi ka lek dah ttheumi hi ka nunnak tthansonak hrangah ziang ka tuah le a ttha ding timi khihhmuhtu a si lam ka theifiang aw deuhdeuh. Keimah rori hi tleunak cu ka si lo. Tleunak hramthoknak hmun khal ka si lo, ti cu ka theifiang aw ko. Asinain rintlaknak, zawnruah thiamnak, theithiam theinak, khawruah thiamnak timi nun tleunak pawl hi a um ngaingai mi a si. Cumi pawl kha an nunih a nei hrih lotu pawl hnenah keimah in ka kuat sin thei a si, tiah ka theifiang aw.

Kei hi tuisun ah thlalang kuaite pakhat men ka si. A thok pek ah cuih thlalang hi a hlum maw, a pheng maw, ziangvek thlalang a si ti ka thei lo. Asinain atu ah amai’ sining te’n a sinak vekin thimnak hmun pawlah tleunak a kuat thei. Cumi cu ka sining te hmangin ka kiangkap ih um thimnak sungih a tlanglengmi pawl, minung pawl thinlung sungah tleunak ka kuat thei ve. Cuticun cu pawlih nun a thleng ter thei, midang khalin ka hmuh vekin an hmu thei ve ding ih ka tuah vekin an tuah ve ding. Cumi cu atu ka tuah rero ttheumi a si. Midang in zianghman a thupi lo tiah an ruat thei men. Asinain ka hrangah a thupi zet. Ka hrangah nunnak timi ih a sullam khal a si”.

Veikhat lai ah Yale University ih Professor Charles R. Brown cun, "Nunnak timi hi ziang a si?" timi sullam thawn peh aw in, “Kei ka hrang ahcun himi thusuhnak ih a sawnnak cu hminthang zetmi mi pakhat hnenin ka ngah. Cu pa ih a zirhmi cu ‘Nunnak timi cu midang va rian hi a si,’ ti a si,” a rak ti dah. Cuih hminthang zet a timi cu "Jesuh Khrih" a si. Paul cun, “Nun timi hi ziangso a si? Kei ka hrangah cun nun cu Khrih a si,” a ti (Filipi 1:21). Casiartu zumtu unau nang teh ziangtin na ruat ve? Na hmuh daan le na nun ih na tepmi pawl in hlawm vivo ve hram aw...
Duhdawtnak thawn,

Rev. Dr. CJ Hrang Hmung.

 

(Ref. Robert Fulghum ih nganmi "The Mirror" timi cahram parah ka hmuh daan thawn ka ngan betmi a si)