Saturday, April 27, 2013

PATHIAN THLUASUAH CO TIMI...


Baibal Sirhsan: Seemtirnak 32:26-29.
         
Seemtirnak 32:26-29 sungah Jakob le vancungmi an buan awknak thuhla kan hmu. Himi thu kan siar tikah Jakob cu a netnak ah thluasuah a co, ti’n kan hmu thei. A hmin khal hi Jakob si nawn loin “Israel” timi hminthar a ngah. Israel timi Hebru ong in “Pathian thawn an buan aw” ti thawn a aw suah a bang aw. Himi thuanthu kan siar tikah kum 97 a simi Jakob hi ziangtluk a cak hrih timi kan hmu thei. Anih hi leknak lam ah taima mi a si maw, a si lo ti cu a fiang lo. Asinain vancungmi thawn zaanvar an buan aw. Ziangahtile pipu san ih Pathian thukamcia kimnak a si. Jakob in ziangti’n ro a co timi mallai zohhnik sehla:

Friday, April 26, 2013

MINUNG LE AALU

Robert H. Schuller timi canganthiam hminthangzet in, “Minung hi Aalu (potato) thawn an bang aw” tiah a ti. Cuti ngelcel ih tahṭhimnak a pekmi hi khuimi zawn teu ah a si pei? Ziangvek thuhla ruangah minung le aalu hi a tahṭhim a si pei? Ziangmi dinhmun sinak zawnah minung le aalu hi an bang aw a si pei? ti pawl ruahding tampi a um.

Tuesday, April 23, 2013

THEIH ṬULMI ZATE PHUNHREK IHSIN KA ZIR THLUH ZO



Leitlun ka nun sungah ziangtin tlangleng ding, ziang ka tuah ding, ziangtin ka cangvai ding timi pawl thawn peh awin ka theih ulmi hmuahhmuah cu ka phunhrek lai ihsin ka zir thluh zomi an si. Kan zir thluh cio zomi a si ko.
Fimnak le thiamnak, khawruah theinak timi pawl hi phunsang tlawng timi tlangsang par ah lawng ummi a si lo, khuahlan tualleng tlawng kan kailai ihsin a rak um rero zomi a si sawn. Tualleng tlawng, phunhrek hrawng ka kai thok ihsin leitlun nunsungih thlun ul dingmi le theih ulmi pawl ka zir ngahmi an tam ngaingai. Cu pawlcu mallai tarlang hnik sehla:
1.  Ziang tinkim ah midang thawn hlawm-awtlang thiam ding,
2.  Midang parah a dik lomi tuah lo ding,
3.  Thawi (vuak) aw lo ding,
4.  Thil pakhat ka tham asile ka laknak hmun ah ret kir sal ding,
5.  Hnawmbal ter pang le thianfai sal ding,
6.  Mai’ thilri lo cu lak lo ding,
7.  Mah ruangah midang an tuahmawh pang ahcun ngaidam dil sal ding,
8.  Rawl ei hlanah kut kholhfai ding,
9.  Ek-in ihsin lenglam suah hlanah tidai toih ta ding,
10.         Rawl ei tikah a sa, a hlummi ei tikah a thaw cuang,
11.         Ca maltete in siar ding (tampi siar hrih lo ding),
12.         Thluak in maltete lawng ruat hrih ding (thu tampi ruat thei hrih lo),
13.         Zuk suai ding, hlasak ding, laam ding, lek ding, hnaquan ding, cumi pawl cu maltete in nitin tuah vivo ding,
14.         Cuheh ah sun ah caan malte sung itthat ding,
15.         A leng suak tikah mawaw fehvak zoh in lamzin tan ding,
16.         Leitlun thilmak a phunphun zoh thiamin hliakhlai thiam ding, tivek pawl phun tampi in a um (A dang betding tampi khal a um hrih ko ding)
hate’n kan ruat a si ahcun thil ziangkim hi kan nauhakte lai ihsin tlawng ah simaw, biakinn lam ah simaw thu le hla tamsawn cu kan zir zo ti sehla kan palh lo ding. Asinain cuih kan zir zomi thu pawl hi kan ruat dah lem lo khal a si men thei. Kan hanglian vivo, fimthiamnak khal kan zir sang vivo nan kan nauhak lai ih kan zirmi pawl cinken ha, cinken tlakmi tampi a ummi cu ruatkir salin cinken le thlun ding tampi a um. Leitlun kan nunsung caantawite ah kan ram, kan miphun, kan khua, kan innsang hrangah hatnak tuah cio ding cu kan duh ciomi a si ko ding. Cumi pawl hrangah tualleng tlawng, phunhrek hrawng kan kai hrawng  ihsin kan zir thluh zomi cu an si. Kan hngilh zo ahcun thukhat. Ziang ti-awk ha.
Vei tampi cu fimthiamnak sang sinsin kan zir, kan kum a tam sinsin tikah thilthar le sanman thilri pawl lawng hi kan hrangah a ha a si hmang tiah kan ruat heu. Asinain hiti ih hatnak ding pawl hi a zate si lo hmanah a tam sawn cu zirnak hmaisabik kan neih lai ihsin kan zir thluh zomi cu an si. Atu kan zir rero mi pawl hi kan nunnak ah ziangvekin in hathnempi? Ka miphun, ka khua le ram, ka innsang hrangah teh hanak a suahpi maw? Ka dinhmun hi ziangvek teu ah ka um tivek pawl hi mah le mah cekfel aw in zohkir thiamsal kan ul ringring tiah ka ruat. Grik mifim Plato cun, “Know thyself” tiah mah le mah theih awk hi a thupizet tiah a sim. Kan nun sungih kan theih ulmi tampi cu phunhrek lai ihsin kan zir thluh zo kan ti si khawh, cumi cu phunsang, zirsang kan neihmi parah kan bet vivo thei maw tihi ruahhat kan ul sawn ding a bang. Cumi kan hmusuak theiih kan nunpi thei ahcun nunman nei minung kan si ding ticu a fiang ko ding. Ziangtin nan ruat ve cio????

- CJ Hrang Hmung

(Lailun Thuthang, June. 2009; Kum 2, Vei 5;
Lailun Mekazin, A vei (5) nak, 2009)