MINUNG LE AALU

Robert H. Schuller timi canganthiam hminthangzet in, “Minung hi Aalu (potato) thawn an bang aw” tiah a ti. Cuti ngelcel ih tahṭhimnak a pekmi hi khuimi zawn teu ah a si pei? Ziangvek thuhla ruangah minung le aalu hi a tahṭhim a si pei? Ziangmi dinhmun sinak zawnah minung le aalu hi an bang aw a si pei? ti pawl ruahding tampi a um.

Roberth H. Schuller a tlanlennak US ram nitlaknak lam ih a ummi Idaho ramṭhenah lothlo pawl in aalu hmuandum tampi an tuah. Aalu hmaundum tuah dingin hmuan an thlo ṭheh cun aalu laksal ding pawl hrangah thluak baang terzetmi hnaṭuan pakhat a um. Cumi cu aalu cin dingmi a tum le a fate hril ih ṭhen ding hi a si. Aalu ciin ding hi cu an hrangah a harsa lo. Asinain aalu lak a cu thlang tikah thu harsa an neihmi cu aalu a tum le a fate hril ih ṭhen a ṭul thlang. Zuarnak ding hmun ah a rawi ih zuar dinghi a cang thei deuh lo. Aalu kha ṭhenthum ah ṭhen ih hril a ṭul. A man ding khal phun thum ah ret a si. Aalu tumbik pawl cu a man khal a dang hnakin a tam cuang. Curuangah khuapi sung bazaar ah fehin aalu pawl zuar ding an va phurh hlanah a tum le a fate ṭhen in an hrilih dip tumpipi sungah than a ṭul a si. Cumi cu baangzetin an ṭuan ṭheu.

Culaifangah Idaho lothlo pawl sungih lothlo pakhat pa ih tuah daan cu a phundang zet. A lo sung ih suakmi aalu pawl kha a tum le a te khal a ṭhen lo, dip sungah khal a than lo. Lo ih a ngahmi vekin cawleng parah a than ih cutin khuapi lam ah a fehpi ṭheu. Cule khuasung a thlen tik lawngah zamrangzet in dip sungah a than ih bazaar ah a va zuar ṭheu. A laktu dawr tumpi pawl khalin ol-ai zetin an cohlang. Cumi cu midang pawl in an theithiam thei lo. Annih pawl hmuah zonzaizet in aalu a tum le a fate hril in an ṭhen ih caan reipi an cemheu. Cupa cun zianghman caan cem ve loin a phurhmi aalu pawl kha le olzetin an co hlang ti cu an mang a bang.

Ziangruangah cutin thil a cang thei ti an thei hiar tuk ruangah an um thei lo ih cumi pa cu an sut. Cupa khal cun a tuah daan kha ol-ai zet in a sim ve ta mai.

A thil tuah daan a simmi cu hitin a si: “Cumi cu a ol tuk lawmmam nan so khaw! Ka lo ihsin khuapi sung feh ding ka tum tikah ka lo suak aalu hmuahhmuah a zate’n ka cawleng sungah ka thankom thluh. Cuihsin khuapi lam fehnak khuitawk lamzin hi ka zawh ding timi ka hril. Ka hrilmi lamzin cu a hrap le a sia bikmi lamzin kha a si. Lamzin ngil ka hril dah lo. Ka lo ihsin khuapi thlen tiang peng riat tluk a hlat ruangah zinsia ka zawh thawn khua ka thlen cun aalu a tumbik pawl cu a tluntabik ah, a lailak pawl cu a laifang ah, cuihsin a fate bik pawl cu a tangtabik ah anmahte ciar in an um thluh” ti a si.

Himi thuhla thawn pehpar aw in cangantu Roberth H. Schuller in Idaho ram lothlo pawlih aalu a tum le fate ṭhen daan a zoh tikah minung thawn a tahṭhim. Cuih a tahṭhimmi cu “minung pawl ih kan sinak pawl khal hi aalu thawn an bang aw” ti a rak si.

Lamzin siava tak, harsa tak an zawh tikah leng parih aalu a fate le a ṭha lo pawl cu a tanglam ah an thleng ih a ṭha bik le a tum bik pawl cu a tlunlam ah an thleng ṭheu. Cuvek ṭhiamṭhiam in minung kan nunnak khalah harsanak le retheih phunkim karlak ah tawkfang kan tan hnu ah a tuar thei lotu, mi ṭawnṭai pawl cu an sinak khal an dinhmun le sinak pawl hi zianghman lo ah an tla niam thluh. A tuar ṭenṭo thei pawl, mi taima pawl cu dinhmun sang le mikip ih rinsanmi ah an kai thleng vivo.

Cucu minung kan nun sungih kan sinak pawl a si tiah Robert H. Schuller in a hmun daan a sim ve mi a si.

Duhdawtnak le duhsaknak thawn,

CJ Hrang Hmung, DMin., Ph.D.,

(Robert H. Schuller nganmi “Tough Times, Never Last, But Tough People Do!” Cabu sungih ta a remcang zawngih lehmi a si)