Mi tampi kan thin in hnaihnok ter
qheumi qongfang pakhat cu “a tlai tuk zo so khaw,” timi hi a si.
Phun hra ong lo ruangih tlawngkai
peh nawn in hna a quantu mi pakhat in a hnaquan quanmi parah a lung a kim thei
lo ding. Tu ah ca phun sang kai in, degree khal ngah in zirnak sang nei sehla
hnaquan qha ka ngah thei ding nan si khawh, tiah a ruat ko ding. Sikhalsehla
atu cu a tlai tuk zo sisi, tiah a ti ko ding.
Mai’ innsang nupi, pasal parah
rintlak ih nun lo ruangah cuih innsang cu a nuam thei nawn lo. Pakhat le pakhat
rintlak lo ih nung zo cun, ziangtin a nuam thei nawn ding. Cuih innsang cu a
thokpek ih kan neihmi duhdawtnak thawn a khatmi dinhmun ah thlen tarsal kan duh
ko ding. Asinain atu ahcun a tlai tuk zo ual, titu khal kan um ko ding.
Zu in tuk ruangih hnaquan banter a
tongtu in cuih a zu in bansan in a nunnak a thar in thok a duh ko ding. Asinain
zu nih i neh tuk zo; a tlai tuk zo e, zianghman ka si nawn lo, tiah a hmu aw
thei men.
Innsang tampi kan zoh tikah nupi le
pasal karlak ah a to aw dah lo innsang a malzet ko ding. Amal bik qong cuh aw
in thu kan el aw dah ko ding. Cuvek caan lai ah kan thin a sa dutdo ih zokhal
in sup kan duh lo ruangah qong lo ding qongfang tampi kan qong ngah pang ko
ding. Kei ka palh, tiah ka ti duh qheu lo. Asinain kan thin a dai sal tikah cun
ka palh deuh, I ngaithiam hram aw ti ding kan duh lo. Duhtawk ka qong ngah zo a
cang thei nawn lo, a tlai tuk zo tiah kan ruat caan tampi a um ding.
Cuti ih a qongtu pawl hnenih ka sim
qheumi cu, “A liam cia ih kan sual, kan palhnak pawl rem sal dingah ziangtik
khalah a tlai lo. Ziangvek thuhla a va si khalle a thok ihsin thok theinak caan
kan nei ringring. Curuangah kan palhnak parah zir thiam in, a thar in kan thok
sal thei ko,” tiin.
Veikhat lai ah Robert Shaw timi
awnmawi tumthiam pa thawn kan pahnih karlak ah thil cangmi pakhat a um dah.
Culai ah kei hi New York khua ih biakinn pakhat ah pastor ka quan pek a si.
Robert Shaw in biakinn ah awnmawi bur (music
group) nei thei sehla a qha ding. Cubang awnmawi bur pakhat ka hoha rero ih
keimah in ka tawlrelpi thei ko ding in ti.
Robert Shaw ih ruahnak cu ka lungkim
zet. Kawhhran sungih mino tampi in an duhzet ding tiah ka ruat. Ka ruah vekin
mino pawlin an duhzet. Asinain sungtel hrekkhat in an duh lo. Cumi lakah kum
upazet pahnih khalin an duh lo. Awnmawi bur ih hlasak le awnmawi tummi hi kan
kawhhran ih tuah daan thawn a mil aw lo an ti. Anmah thawn buai dng ka duh lo
ruangah thinnuam lo zet in Shaw hnenah kan awnmawi burte kan colh a qul ding
tiah ka sim. Anih khal a thin a nuam lo zet.
Himi thu in ka thin nuam loin i um
ter ringring. Mah le mah rin-awknak ka neih lo mi parah ka lungkim aw lo nasa.
Shaw thawn khal kum sawmnga zikte kan tong aw nawn lo.
Nikhat cu Shaw ih thuhla nganmi
cahram pakhat ka siar ngah. Ka siar phah in thu ka ruatmi cu kha lai ih awnmawi
bur thu ah ka palh ti hi a si. Cumi ka palhnak parah remsalmi ka nei hrih lo ti
khal ka mang sal. Cuticun ka thinlung sungah a um vekin ca pakhat ka ngan ih ka
kuat lohli. Kha lai ih ka palhmi parah in ngaithiam hram aw, timi ca te a
si. Rei lote ah Shaw hnen ihsin cakuat pakhat ka ngah ve. In ti ve mi cu ‘hi
vek cakuat duh nung ka siar ih ka lungawi. Kha lai ah keimah khal ka palh ve
ko’ tiah a cakuat sungah a telh.
Hi ca ka siar ngah cun ka thin a
nuamzia hi relcawk a si lo. Kum reipi sung ka thin sungih a tang ringringmi le
ka hnak i doh ringringmi ka palhnak parih ngaithiam ka dilmi hi a lak a si lo.
Kum tampi a rei zo ko nain a tlai cuang lo tiah fiangzet ih ka theih ngahmi thu
pakhat a si.
Na thinsung khalah cubangin a um ve
ko ding. Mi pakhat khat parah kan ti sualmi, kan palhmi a um ih cumi hrangah
zianghman kan tuahsuak lomi a um thei men. Ka palh a si tiah kan thei ahcun kum
ziangzat a rei khalle a tlai zo, ti a um dah lo. Caan remcang kan neihmi hman
thiam a thupi sawn a si. Ziangah tile ziangvek thuhla khalah ‘a tlai tuk zo’ ti
a um lo ruangah a si.
Duhdawtnak thawn,
Rev. Dr. CJ Hrang Hmung
(Norman
Vincent Peale nganmi ‘Who says it’s too
late?’ remcang zawng ih lehmi a si)
Zinghmuh Pulpit/Nov, 2010.
No comments:
Post a Comment