Baibal
Caanghril:
“Fala
him pakhat in fa a vun dingih fapa a hring ding, a hmin ah Immanuel tiah an ko
ding (Immanuel timi cu ‘Pathian kan hnenah a um’, tinak a si)” {Matthai 1:23}.
Christmas
timi hi a danglam zetmi a si. Ziangahtile ziangkim sersiamtu huham nei Pathian in
a sinak hmuah tanta in minung sinak ih rung pian caan a si. A hloralmi minung
le Pathian karlak ih a cat zomi kha pehzomnak a thar ih kom salnak caan a si.
Christmas ruangih zumtu lungput le kan ruah daan khal a bang aw lo cio ko ding.
Tulai ahcun Christmas tuah le tuah lo ding thu khal ah zirhnak a phunphun in a
suak vivo. Kanmah le ruahnak in kan hmang vivo. A hrek in Christmas a ṭul lo
tiah duh lo lam in a ṭangtu tawkfang an um. Mi tamsawn cun a thupitukmi a si
tiah hman tengteng dingin timtuahnak nasazet kan nei sinsin. Cuticun Christmas
in a thupitnak hmun tampi a nei ti hi el theih a si lo ding.
Cutin
thu tampi a ummi sungin Christmas ih thuthup thukzet pakhat cu “Immanuel” (a
sullam cu “Pathian kan hnenah a um” tinak a si) a si lo le minung pawl thawn
hmunkhat ih um dingin a rung ṭumtu Pathian thu hi a si. Mi tampi in “Pathian
kan hnenah a um” timi hi Christmas caan ah a thar in kan mang sal ṭheu. Cumi cu
a diknak zawn hmun tampi a um. Asinain kan theih ringring a ṭulmi cu Pathian hi
Christmas caan lawngah a thar in kan hnenah a um thar sal si sawn loin kan
hnenah cat loin a um cia ringring zo timi hi theih dingah a thupi ngaingai a
si.
1. Kan hnenah um dingin Pathian a rung ṭum.
Pathian le minung karlak ih a hlat awzetmi cu Pathian amah rori minung lakih a
rung ṭum tikah hmunkhat ah kan um tlang thei sal. Hi thu hi hlanlai kum tampi
ihsin rak sim cia zomi a si. Profet Isaiah in, “Atu ah Bawipa amah rori in
khihhmuhnak a lo pe ding. Nunau no pakhat in fa a vun ih fapa a hring dingih a
hminah ‘Immanuel’ tiah an sak ding,” tiah Pathian kan hnen ih a um ding daan a
rak sim cia (Isa. 7:14). Khuahlan kum reipi lai ihsin Profet Mikah khalin, “Maw
Bethlehem Efratah, nang cu Judah peng ah khuafate bik pakhat na si nain na
sungin Israel uktu ka suahter ding. A suahseemnak cu khuahlan lai, a liam zomi
san ihsin a rak thok zo a si,” a rak ti ve (Mik. 5:2). Bethlehem khua ih a
suakmi naute hi naute menmen a si lo, hlanlai kum reipi ihsin a rak um cia zomi
rundamtu Bawi a si. Sikhalsehla cutin kum reipi sung rak simsung cia mi naute a
suak ngaingai tikah mi tampi in zianghman ah an siar lo. Minung hnenah um
dingin a rung ṭumtu Pathian cu zianghman ah an siar duh talo a si cu. Theithiam
duh loin an um san men.
Tuisun
khalah cubangtuk ṭhiamṭhiam in Pathian kan hnenah a um lam a thei lotu zumtu
tampi kan um pang maw, ti hi ruatṭhat dingmi a um a si. Kan hnenah um dingin
Pathian a rung ṭum taktak ti hi kan zum ngaingai thlang lo ding maw? Maw kan
zum duh cuang hrih lo so? Mi tampi in Pathian kan hnenah a um taktak timi hi
kan hngilh ṭheu maw? a si lo le kan pom thei ngaingai lo a si pei maw? Thla kan
cam tik khalah Pathian hi hmun hlatpi ih a um vekin kan thlacammi ṭongkam ah
kan hmang ṭheu. Ka thlacam tikah hiti’n kan cam tam ṭheu in ka thei: “Maw
Bawipa, a tu biakkhawmnak kan thok thlang ding ruangah kan hnenah um hram aw…”,
tiah Pathian kan hnenih um dingah kan sawm ṭheu. Kan palh a si ka tinak a si
lo. Asile himi thlacam daan hi kan ruatṭhat asile Pathian hi kan sawm tik
lawngah kanhnen ih a umcop ding vek a bang, sawm lo cun kan hnenah a um lo vek
a si, nan ti ve maw? Sikhalsehla Pathian cu kan hnenah a um ringring tiah
khuahlan kum reipi ihsin kan thei zomi a si. Curuangah thla kan cam tik khalah
hiti’n cam sawn thlang sehla: “Maw Bawipa, a tu biakkhawmnak kan thok thlang
ding ruangah kan hnenah na um ringring a si timi thu a thar in in thei
ter hram aw…”, ti sawn dingmi kan si, tiah ka ruat.
Pathian
ih sinak pakhat cu theological ṭong kan hmang asile “omni presence” ti a siih a
sullam cu “hmunkip ah hmakhatte ih um Pathian” tinak a si. Curuangah Pathian hi
kan sawm tik lawngah kan hnenah ummi Pathian a si lo. Kan hnenah catbang loin a
um ringringtu Pathian a si sawn. Kan sawmcop ruangih Pathian kan hnenah a um
a si lo ih kan sawm hlanpi, kan theih lo lai khalah kan hnenah a um ringring zotu
Pathian a si sawn. Himi hi kan theih a ṭul zetmi a si tiah ka ruat. Ziangahtile
Pathian cu kanmah minung hnenah um dingin vancung sunlawinak hmuah tanta in a
rung ṭum zo a si cu!
2. Pathian in kan ṭihphannak pawl in hlonsak.
Ṭihnak le thinphang in a umtu tuukhal pawl hnenah vancungmi pawlin ṭih lo
dingih a sim bangtuk in tuini kan hnen khalah in sim hrih a si. Kan hnenah um
dingin a ṭumtu Pathian kan neih ahcun ṭihphan ding zianghman a um hrimhrim lo.
Ziangahtile kan Pathian cu duhdawtnak a siih cuih duhdawtnak in ṭihphannak a
hlo ter (1 Joh. 4:18). Kan ṭihphannak a hlotertu ding thuthangṭha cu “Nan
hrangah rundamtu a suak zo” timi thu hi a si. Jesuh Khrih khalain “ṭihphannak
nei hlah uh” timi ṭongfang vei tampi a sim. Cumi cu Pathian kan kiang naite ah
a um ringring ti langternak a si.
Thihnak hi kan ṭih cio ko lo maw? Mi hrekkhat cu thih ka ṭih lo kan ti ṭheu.
Ṭhate’n kan ruat ahcun thih a ṭih lotu kan um ngaingai lo ding. Asinain kan
Bawipa Jesuh cu thihnak nehtu Bawi a siih thihnak ih huham cahnak parah
thuneitu khal a si. Sual thuṭhennak co ding kan phang maw? Cuih Bawipa cu
minung kan sualnak ihsin rundamtu a si ruangah ṭihphan ding a um lo. Paul in,
“Ziangahtile Pathian ih in pekmi Thlarau in ṭihhrutmi ah in tuah lo; cahnak
huham, duhdawtnak le mah le mah uk-awk theinak in in khatter sawn a si,” a ti
(2 Tim. 1:7). Ṭih phan ding zianghman a um lo, timi hi kan Baibal ih in sim
ringring mi a si. Zumtu pawl hrangah thazaang in pek ringringmi ṭongkam a si.
Baibal
ca sung kan siar tikah Pathian in ṭihphannak nei lo dingin vei tampi in zirh.
Baibal thiam pawl cun “ṭih hlah, phang hlah, donhar hlah” timi ṭongfang pawl hi
vei 365 tiang tarlang in a um a si, tiah an sim. Cumi ih a sullam cu kumkhat ah
ni 365 a um ruangah nitin te’n Bawipa Pathian in ṭih lo dingah thazaang in
peknak a si tiah kan thei thei a si. Ziangahtile kan biakmi Pathian cu “mi zan,
tuini, thaizing ziangtik hmanah a thleng aw dah lo Pathian a si” (Heb. 13:8).
Kan nunnak ah Pathian thlarau in in uk taktak ahcun ṭihphan ding zianghman a um
lo. Cuih ṭihphannak hmuahhmuah cu Pathian in a hlonhlo thluh zo ih Amai’ pekmi
huham cahnak thawngin ziangkim ti theinak thazaang kan nei a si (Fil. 4:13).
Immanuel Pathian in kan ṭihphannak zate’n in hlonsak thluh zo a si.
3. Ruahsannak thar in nei ter.
Christmas timi cu ruahsannak tharthawh salnak caan khal a si. Kan hnenah a umtu
Pathian thawngin ruahsannak a karh thar ter. San thuanthu thoknak ih a umtu
Pathian cu san thuanthu netnak khalah a um ringring ding a si. Kan biakmi
Pathian in kan thinlung sungih a hnokmi pawl in sialsak thluh. Bawipai’
lamhruaimi pawl cu ziangbangtukin kan ruahsannak a cem hmanah Amah in thazaang
a tlung ter sal. “Sikhalsehla Bawipa a rinsantu cu an tha a tlung sal ding.
Muvanlai vekin thlapharh in an zam ding. An tlan khal le an tha a bang lo ding.
An feh rero khalle thacem in an sawn dah lo ding,” (Is. 40:31). Emau lamzin
parih a beidong cuahcotu zumtu pahnih pawl khal an ruahsannak a cem hmanah
“Lamzin kan feh tlang laiih kan hnenih a ṭong le Ca Thianghlim a simfiang rero
laiah khan kan sungah meisa kang vekin a um tho lo maw kha?” (Luk. 24:32) tiah
an sinak dik an hmu-aw salih an ruahsannak khal a cak sal ti’n kan hmu thei.
Minung kan si vekin vei tampi ah kan nun cau in kan um ih kan bei khal a dong
ṭheu ko ding. Kan ti thei patawp suahin kan ṭang cio ko nain zianghman cangvai
thei lo ko ih kan um caan khal a um ko ding. Sikhalsehla Pathian kan hnenah a
um ringring ih kan sinak ziangvek khal in tuarpi ve a si ti kan theithiam ahcun
kan hna a ngam ruangro ko ding. Kan ruahsannak khal tharthawhsal in a um
ding.
Thunetnak
Christmas timi cu Pathian minung hnenah a rung ṭum timi thuthangṭha a
si. Cuihtlunah ṭihphannak kan neihmi pawl in hlonhlo sak thluh ih tlunah
hmailam hrangah suangtuah dingmi ruahsannak in neiter. A thimmi kan
lamzin cu kumkhua a tleumi thawn in ai-rawl sak thluh fawn. Kan nun lamzin cu a
tleu ringring zo a si.
Pathian cu kan hnenah kumkhua in um dingah a ra zo. Bawi Jesuh van a kai zik
khalah “Cule ka thupekmi hmuahhmuah thluh dingin va zirh uh. Hngilh hlah uh,
san a cem lai hlanlo nan hnenah ka um ringring ding” tiah in ti a si (Mat.
28:20). Curuangah Pathian cu kan hnenah a um ringring a si, ti thei in thinlung
hnangamte in amah rinsan ih kan nung ahcun kan thazaang a tlung sal dingih
ṭihphannak hmuah khal a hlo ding a si. Pathian a rinsantu pawl cu ziangtik lai
khalah Pathian in thluasuah a pek ringring a si.
Christmas
caan lawngah Pathian kan hnenah a um si sawn loin kan hnenah um ringring dingah
Pathian a ṭum zo a si, timi thu hi hngilh nawn hlah uhsi. Cumi cu kan nunnak
taktak in cohlang rori ding a ṭul. Kan zum taktak a ṭul a si. Ziangtik lai caan
khalah Pathian kan hnenah a um ringring a si, ti thei in a nunpi tu zumtu kan
si cio theinak dingah thlaza cam phah in…
Duhdawtnak le duhsaknak thawn,
Rev. CJ Hrang Hmung, DMin., PhD.
No comments:
Post a Comment