(Filipi 2:1-11)
Kan Bawipa Jesuh Khrih in “Thilrit a phurmi le zonzaih a tuartu pawl, ka hnenah ra uh, colhdamnak
ka lo pe ding. Ka kawn hi phurhnik uh. Kei cu nunnem le tangdornak thinlung
neimi ka si. Ka hnen ihsin zir uhla colhdamnak nan ngah ding. Ziangahtile keiih
kawn phurh cu a nuam ih ka thil khal a zaang a si.” a ti (Mat. 11:30).
Himi Baibal ca kan zoh tikah Bawipai’ kawn cu phurh a
nuam ih zaang khal a zaang, tiah kan hmu thei. Cutiih a si theinak ding ahcun
minung ruahnak, khawkhannak le kan thazaang in a tlin thei lo ding. Curuangah cuih
kawn kan phur theinak dingah Jesuh hnenah kan zir hmaisa a ṭul. Kan ṭhum aw
hmaisa a ṭul. Kawn phur daan timi tawhfung kan thei tik lawngah phurh a nuam
dingih kan phurh khal a zaang ding a si. Cumi tawhfung thawn a ram le a felnak
cu kan nunnak ah kan dinsuah thei ding ti cu a fiangzetmi a si.
Tuisun ah mi tampi cu rethei harsazet in an nung. Duh
le duh lo khalle a khaa-mi tidai (tidai-khaa) an in rero (retheih harsat tuar
ciocio ah tuar hleice vekih ruah awtu pawl). Kannih zumtu pawl cun kha bang tidai-khaa
pawl hi in ve ding kan si lo. Ziangahtile kannih cu Jesuh Khrih thawng in nehtu
kan si. In nehsak thluh zo. Paul in, “Hi bangtuk a si ko na’n kannih in
duhdawtu ih thawngin hi thil hmuahhmuah tlunah kannih cu nehtu hnakin kan uak
deuh a si,” a ti (Rom 8:37). Curuangah kan tuarmi hmuahhmuah Khrih thawn kan
tuar tlang ti hi kan hngilh lo ding a thupi. Pathian in leitlun tleunak dingah
in retmi kan si ruangah tidai-khaa in ding kan ṭul lo. Kan ṭulmi le kan duhmi tidai
thlum, tidai thawte lawng in dingmi kan si. Midang in ziangvekin tikha an in
khalle kannih zumtu pawlcun tidai thlum, tidai thaw lawng in ding kan si. ‘Tidai
thlum’ timi cu ‘a ram le a felnak a si’ tiah ruatin kan nun lamtluan ah fehpi
ding kan ṭul. Midang hnen khalah cuih tidai thlum cu va zem thei vivo dingin
kan nung ding a ṭul a si. Va zem vivo tu ding khal kan si. Cutin kan nung thei
a si ahcun kan taksa nun le kan thlarau nun ah thinnuam thlangamnak thawn kan
khat thei ringring ding.
“Kawn” timi cu…
“Kawn phur” timi cu Laimi pawlin kan theizetmi a si
ko. Nu pawlin bawm an phur tikah bawmhri kha “lu” par in an phur. Pa pawlin an
phur tikah cun tamdeuh phur thei ding tiah liang parah “kawn” retin an phur ṭheu.
Cuti cun thilri tam deuh in phur theih a si. Lu ih phur vek si loin liang parah
phur a si tikah phurh a nuam zet, tam deuh le phur theih a si fawn. Ṭong dang
in kan sim asile “Kawn” timi cu harzet in “Lu” ih phur dingmi hmuahhmuah
sawngtu a si. Cuvekin Jesuh Khrih ih pekmi “kawn” kan phur tikah phurh a rit
kona’n a zaangih phur a nuam. Ziangtluk tam kan phur khal le phur theih a si.
Ziangahtile duhdawtnak parah hrambun ih phurmi a si ruangah.
Thuṭhimnak ah nauhak nu te pakhat cu kum 7 hrawng a
um. A zaang parah a ṭapa kum 2 hrawng cu a nu ih fialnak vekin a pawk. A pawk
thei fangfang na’n a pawk ṭenṭo. A pawk rei tikah a bangzet. Asinain a tuar ṭenṭo
ih a pawk ko. Ziangahtile a duhdawtmi a ṭapa a siih duhdawtnak thawn a pawk
ruangah a pawk theinak a si. A thinlung a ṭhum aw ih duhdawtnak in a khuh
ruangah a si. Ka pawkmi hi ka ṭapa a si ti a theifiang tuk ruangah a si.
Cuvek ṭhiamṭhiam in nitin kan nunnak ah harnak tampi
kan ton ko ding. Asinain in duhdawttu Jesuh Khrih kan duhdawt ve ruangih kan
phurmi a si ruangah a phurh a zaang ih a nuam theinak a si. Kan thinlung in
amah Jesuh kan duhdawt taktak ahcun kan phurmi thil pawl cu a rit nawn lo.
Ziangahtile kannih phurmi le tuarmi cu a mal te, kan sualnak ruangah kan tuarmi
an si. Sikhalsehla Jesuh ih in phursakmi cu amai’ sualnak ruangah si loin
kanmah misual pawl in duhdawtnak ruangah in phursakmi a si. Jesuh in hitin
minung pawlih kan thilrit in phur sak thluh theinak hi minung parih a
thinlungput a dik ruangah a si. Jesuh Khrih ih thinlungput hi ziangvek tla an
si timi hi kan zoh vivo hrih pei.
Mai’ duhnak lawng si loin:
Pathian Fapa Jesuh Khrih kan zum tikah Pathian ih fa
sinak kan co ve ih tlunah kumkhua nunnak kan ngah. Kanmai’ tuahṭhatnak le
zuamnak in a si lo, zaangfahnak zumnak thawngin rundamnak kan co (Efe. 2:8). Curuangah
rundam fa kan sizia hi kan nitin Khristian
nun ah nunpi le langter dinghi a thupi zet. Cuticun Pathian hnenih thluasuah tinkim
dongtu kan si ding. Pathian thu vekin nun ding hi a thupizet ih cuti ih nun
theinak dingah cun zawnlung thungainak hi a thupi zetmi a si. Pathian hmaiih
kan thinlungput umtu daan khal a thupizetmi a si.
Filipi 2:4 sungah Paul in, "Nanmah duhnak lawng si loin midang in an hrangah a thupi bik ih an
ruahmi kha a hmuhzia thiam ve uh" tiah a simmi kan hmu thei. Ṭongdang
in kan sim asile mai’ zawn lawng ruat loin midang zawn ruat ve ding, tinak a
si. Himi Baibal caang hi minung sinak le kan dinhmun lam zohih kan ruat ahcun
thlun ding a harzetmi a si. A dikzet. Kanmahte hman ei khop, in khop fangfang
nei ih midang va zawnruah ih va pek sin ding timi hi thil harsazet a si ko
ding. Asinain himi ṭongkam hi Baibal ca ih in zirhmi a si. Kan nun ah tuah dingih
in fialmi a si. Tuah kan tum ahcun kan tuah theimi khal a si. Rundamnak a ngah
zotu cun kan nun ih langter dingmi zumtu kan sinak ‘rah’ pakhat a si fawn. Pathian
in a cang thei lomi tuah in fial dah lo. A cang thei lo kan timi cu kanmah minung
lamin tuah kan tum lo le thlun kan tum lo ruangah a si sawn. Kan tuah tum ahcun
kan tuah thei thluhmi a si ko. Kanmai’ duhnak lawng kan zoh tikah cun midang
hrangah kan zohsak nawn lo, kanmai’ zawn lawng kan zoh ṭheu. Sikhalsehla midang
hrang zawnruat ih zohsak ding khal kan tuah duh cun kan tuah thei thotho mi a
si.
Pathian ṭongkam pawl theifel thei dingah Baibal siar
le thei men in a ngah lo, Thlarau Thianghlim ih zirhnak le kaihhruainak a um a ṭul.
Kan nun sung muril taktak ah in ciahneh ding a ṭul. Kanmai’ duhnak thupi sawnah
ret loin midang ih an ṭulnak kha a hmuhzia thiam dinghi a thupi ngaingaimi a
si. Cucu Jesuh ih thinlungput um daan hramthoknak a si. Hinah hin “midang” a ti
tikah mai’ Kawhhran sungih zumtu pawl lawng simduhmi a si lo. Hmun dangdang,
Pawl dangdang umtu zumtu zate hrangah a si ti hi kan theithiam a ṭul. Hlan deuh
ahcun zumtu pawl hi Pawl bang awk lo le biaknak bang awk lo ahcun kan komaw
thei lo, kan biak aw thei lo. Hmuh daan le ruah daan a bang lo tik ahcun a dangdang
ciar in kan um. Kanmah le zawn cio lawng kan ruah cio ruangah a si. Ruahnak le
hmuhnak kap khat lawng zoh in kan rak nung cio. Curuangah biaknak dang (Sakhua
dang Budhist, Hindu tvp.) pawl in, ‘zumtu Khristian an ti awk ih anmah le anmah
hman an rem-awk fawn cuang lo’, tiah soisel le hmuhsuamnak ah in hmang ṭheu.
Kan Bawipa Jesuh Khrih cu a nun a liam hlanah a sinak
hmuahhmuah a tanta ih hi leilungah a rung ṭum, timi thu hi kan thinlung ah
cingkeng ding a thupi ngaingai a si. Jesuh ih rundamnak in thleidannak
zianghman a nei lo. Minung zate hrangah a si. Cun, minung hrangih a tuarnak
ding caan a nai taktak tikah minung tisa ih ummi a si vekin tuar lo ding a duh.
Curuangah, “Ka pa, a cang thei a si ahcun hi tuarnak khuathai hin I luatter
hram aw! Asinain ka duh vekin si hlahseh, na duh vekin si ko seh”, tiah a ti
(Mat. 26:39). Amai’ duhnak kha tanta in minung kan zate luatnak hrangah a nun
liam dingin thu a ṭhencatnak kan hmu thei. Cumi ih in zirhmi cu mai’ duhnak hi
kan nei cio ko na’n ‘midang hrangah’ timi thinlungput neih ding a thupitzia le
a hmuhzia kan thiam ṭulmi in sim a si.
Pe siannak thinlung thawn nung ding.
Paul in rundamnak a ngah cia mi pawlih kan thinlung
put daan thu thawn peh aw in, “Nan
thinlung put daan cu Khrih Jesuh ih thinlung put daan vekin siseh”, tiah a
ti (Fil. 2:5). Himi Baibal caang kan zoh tikah Pathian in kannih zumtu pawl hi
Khrih thinlung put daan vek neih ter in duh a si, timi a fiang nasa.
Cuih thinlung put daan vek kan neih tikah ziangvek
thluasuah kan co thei pei? 1 Siangpahrang 17 sungah Profet Elijah le nuhmei nu
ih thuhla kan hmu thei. A thuhla um daan cu a tawinak in kan tarlang ding. Pathian
in profet Elijah ih ei-in hrang tawlrel saktu dingah nuhmei nu ih inn ah a
thlah hngai. Elijah cawmtu dingah Pathian in nuhmei pakhat a hmang. Milian inn
ah a thlah lo. Minung ruah daan in kan ruat asile profet ropi pakhat a si
ruangah milian inn ah va thlah awm tak cu a si ko. Sikhalsehla minung ih
ruahnak le Pathian ih ruahnak hi ziangtik lai caan khalah an bang aw lo, a dang
aw a si (Is. 55:8-9). Zianghman a si lo tiih ruahmi mi farah zonzai te, nuhmei
nu sawn a hmang tariai. Pathian ih thil ti daan hi a caan caan ah theih a har ngaingai.
Hinah ahhin ‘a farah ruangah le nuhmei a si ruangah
Pathian in a thlah’ timi hnakin ‘cuih nuhmei nu ih a thinlung put ah tangdornak
a neih ruangah’ timi sawn a si thei. Minung ih kan ruahmi ‘farahnak’ kan timi
hi Baibai ih zirhmi thawn an bang aw ṭheu lo. Minung ih kan ruah ṭheumi ‘farahnak’
timi cu vei tampi ahcun sumsaw nei lo pawl, thilri zianghman nei lo pawl an si ṭheu.
Asinain kan Baibal cu kan thinlung lam a sim duh sawn ṭheu. Mi farah zet si
cingin thinlung siava tak tampi kan um thei. Cuvekin milian zet si ko nain
tangdor zet ih a nungtu tampi an um ve. Himi thu ih kan hmu theimi cu Jesuh
Khrih ih thinlung put vek a simi ‘tangdor nun’ hi minung zate hnenah um dingin
Pathian in a duh. Milian hnen ah siseh, mi farah hnenah siseh, nuhmei hnenah
siseh, zovek hnen khalah cuih ‘tangdor nun’ cu a um thei thluhmi a si. Cuih
thinlung put vek a nei lomi milian le nuhmei, mi menmen tampi kan um thei.
Leitlun thuhla lawng ruatin mai’ ṭhathnemnak lawng ruat ih hmai a feh vivo tu
hrangah cuih thinlung put cu a nun ah a um thei hrimhrim lo ding. Ziangahtile a
thinlung sungah ‘keimah’ timi in a uk ruangah a dang cu a ruat thei nawn lo a
si. Keimah timi thinlung in in uk sung cu ‘tangdornak’ timi kan nun ah a cam
thei dah lo ding.
Sikhalsehla Jesuh Khrih ih thinlung put vek a neitu ih
hrang ahcun ei in hrangah siseh, hnipuan sinfen le umnak hrangah siseh phan
ding a um lo. Donhar rero ding khal a um lo (1 Pit. 5:5-7). Hitin kan ti tikah
thinphang loin, um huahhi men ding tinak cu a si fawn lo. Kan tuah dingmi cu
kan tuah kel te’n kan tuah thotho ding hi a thupi. Profet Elijah in nuhmei nu
hnenah ‘Zaangfahnak in tidai inding i pe aw”, a ti. Tidai suak dingih nuhmei nu
a feh lai ahcun “Rawl ei ding khal i rak ken aw,” tiah a hei auh bet. Cutikah
nuhmei nu hnenah sangphut malte le olif siti malte lawng a nei thlang. Cuih
sang cu suangin an ei ṭheh cun a fapa
thawn an nufa cu thih hngak in um dingmi an sizia Elijah hnenah a sim. Cutikah
Elijah in, “Phang hlah! Va feh awla na
rawl cu va suang aw. Asinain hmaisa bikah na neihmi sungih hlom khat fate in la
awla ka hnenah rak keng aw. Cule a taangmi cu nangmah le na fapa hrangah suang
aw. Ziangahtile a hi thu ahhin Israel ih Pathian Bawipa in, ‘beel sungih
sangphut cu a cem dah lo dingih palang sungih hriak khal a cem dah lo ding,
Bawipa keimah in ruah ka surter ni a thlen hlanlo cu,’ a ti a si” tiah a
sim (1 Siang. 17:13-14). A tawinak in kan sim asile nuhmei nu in Elijah ih
simmi vekin a tuah. Cuticun paam sung hmuahhmuah Elijah hrang siseh, nuhmei nu
te nufa hrangah siseh, rawl ei ding an nei ringring. Nuhmei nu in amai’ hrang
hnakin midang hrangah ruat in a nunpi. Cutiih a nunpi ruangah Elijah hrangah le
rawk khop in a um thei, an nufa khal rawl khop thotho in an um tlang thei a si.
Cuih nun cu Pathian in tuini kan nunnak cio khalah neihter in duhmi cu a si.
Pathian ih pek termi vekin midang hrangah pe siangnak thawn nung dingmi kan si.
Jesuh Khrih cun kannih misual pawl hrangah a nunnak tiang hman a pe siang a si.
Pathian ih duhnak vekin tuah ding.
Pathian ih siannak vekin Solomon siangpahrang bawipa
in Biakinnpi cu kum sarih sung a sak a si (1 Siang. 6:38). Solomon hi Pathian
ih hrilmi siangpahrang pakhat a si. Pathian hnenin thluasuah hmuifu tampi a
dongtu khal a si. A thok pek ah Pathian duhnak vekin tuah le nungtu a si. Asinain
neta lamih a nun kan zoh tikah Pathian thu ah tlaksamnak tampi a nei ti kan hmu
thei. Jerusalem biakinnpi kha kum sarih sung a sak ṭheh timi hi minung hmuh
daan ahcun sunloih tlak, lawm tlak a si. Sikhalsehla Solomon ih nun daan le
Nuhmei nu ih nun daan cu an dang aw ngaingai. Solomon in biakinn a sak laiah a
fimthiamnak neih hmuah suah in a sak, kan ti ding. Cuih inn a sakmi cu Pathian
ih thluasuah pekmi fimnak ruangah a si. Asinain amai’ umnak ding inn a sak tik
ahcun kum hlei thum a rei a si (1 Siang. 7:1). Himi kan zoh tikah Solomon ih
nun ah Pathian a ṭihzah kan ti ko ding nain a si tuk lo hmang tiah ruah a theih.
Ziangahtile Solomon tei’ san kan zoh tikah innsaknak thilri pawl hi tulai vekin
ol te’n ngah theih a si hrih lo. Amai’ inn cu caan sau deuh a sak timi cu a inn
hrangih a ṭulmi thilri ṭhaṭha hawl in a khawl ruangah a rei deuh a sak tinak a
si thei. Biakinn saknak hrangah cu ol te’n ngah theihmi thilri ṭha lem lo pawl
a hmang tiah ruat theih a si. Ca thianghlim in, Pathian ṭihzahnak cu fimnak ih
hramthoknak a si a ti (Thuf. 1:7; Saam 111:10). Solomon in hitiin a tuahmi
thawn peh awin Pathian a thin a heng ding ti a phang hrimhrim lo. Cumi cu Solomon
ih a netalam lam a nun daan kan zoh asile kan fiang thei ko ding.
Tuisun Pathian hna a ṭuantu pawl kan zoh tikah tamsawn
cu Pathian lungkim lo ding hnakin mipi, minung pawlih lungkim lo ding hi an
phang sawn. Pathian hmai ih hmaiṭha ngah hnak in minung hmai ih sunloih co ding
kan duh sawn, kan lungkim sawn a bang. Minung mit hmuh ih lawm co hnak cun
Pathian lungkimmi si ding a thupi sawn lo maw? Pathian lungkim tiang ṭuan ding
le tuah dingah kan zuam ṭul lo maw? Solomon siangpahrang bawipa cu Bawipa
Pathian ih duhnak hnakin amai’ duhnak sawn thupi ah a ret deuh ruangah a netnak
lamah ziang dinhmun a thleng ti cu kan thei cio ko ding ka zum. Tuini ah
Pathian ih hmangzetmi zumtu tampi khal Pathian ih in khaisang ruangah ti hi
thei nawn loin kan um ahcun ka tlak tikah tlaksiatnak nasa zet a si thei.
Zianghman kan si lo na’n Pathian ih khaisang copmi kan si zia hi hngilh hlah
uhsi. Ziangvek dinhmun ihsin ka ra ti hi ṭhate’n zoh kirsal in Pathian duhnak
vekin tuah ringring dingah kan ap awk a ṭul.
Mi tampi cun Pathian mi pawlin siangzet ih an pekmi
par in anmai’ ṭhathnemnak hrangah duh tawkin hmang an ngam. Ka hrangah ka ṭhathnem
tak ah, an tiih Pathian ta a simi khal duhduh in an hmang men. Pathian hrangih
a pekmi cu mah duhduh ih hman dingmi a si lo. Pathian hmin maw, biaknak pawlkom
hmin in maw kan ngahmi sumsaw hi mai’ pumpak ṭhathnemnak men ah hman dingmi a
si lo. Pathian mithmai zohin nun kan thiam a ṭul. Nun kan zir a ṭul. Kanmai’ ṭhatnak
hnakin midang hrangah a hmu zia thiam ih nunpi kan ṭul. Cuticun midang parah
duhdawtnak kan neihzia a lang thei ding. Pathian duhnak vekin kanmai’ zawn kan
ruat awk hnakin midang hrangih a ṭha mi kha theihpi sakin kan nung asile
Pathian sunlawinak langtertu kan si ding. Kan theih cio vekin, “Khrih cu
Pathian sinak a nei ringring. Asinain Pathian bang dingah hramhram in a tuh dam
lo” (Fil. 2:6) timi in Khrih cu Pathian
duhnak bangin tuahtu a sinak a langter a si. Kan tuahmi ziangkim hi Pathian
duhnak le sunlawinak hrangah tuah ding kan ṭul. Kan ei mi, kan in mi hi
ziangvek a si? Kan nunnak hrangah a ṭha maw? Mi mithmuh ah teh zoh mawimi a si
maw? tihi ṭhate’n kan ruat a ṭul. Paul in, “Curuangah nan ei ah siseh, nan in
ah siseh, ziangthil nan tuahmi kipah Pathian sunlawinak hrangah tuah uh… Ka
tuah vekin tuah ciar uh. Keimah ih hrangah ṭhathnemnak ruat loin mizapi ṭhathnemnak
kha ka ruat ih rundamnak an ngah theinak dingah mi hmuahhmuah lungawinak tuah
kha ka zuam a si,” tiah amai’ nun zohṭhim in in zirh bet hrih a si (1 Kor.
10:31, 33).
Midang hrang ih nung ding.
Johan 6 kan siar tikah nauhak pate pakhat ih thuhla
kan hmu. Cuih nauhakte cu Puithiam a si lo. Daan thiam saya khal a si lo.
Farasi mi khal a si lo. Nauhak menmen lawng a si. Sikhalsehla cuih nauhakte ih
thinlung sungah midang hnak ih hleifuanmi duhdawtnak thinlung a nei ti kan hmu
thei. A neihmi sang 5 le nga 2 kha midang ei ding hrangah pe ding a siang zet. A
kenmi sang le ngasa cu amah khop hrang cu a si ko. Sikhalsehla cuih a kenmi
sang le ngasa ruangah mi tampi hrangah ṭhathnemnak a thlenpi thei. Cuih nauhak
pate cu amai’ zawn hnakin midang hrang zawn a ruat theitu a si. Tuini ah zumtu
tampi le Pathian hnaṭuantu pawl cu khuapi sungah kan um lo ruangah maw? asilole
khuate ih hnaṭuan le ṭhanglianmi kan si ruangah maw? midang pawlih mit hmuh ah
zianghman lo ih ruahmi khal kan si thei men. Asinain thinnau le beidong in um
men ding a si lo. Minung mit hmuh ahcun khuate fa, zianghman lo vek kan si ko
ding nain thlarau thuhla ah Pathian kan ṭihzah ih kan nun in uk ringring ahcun
thazang cahnak kan nei thotho. Khuapi, khuate sung um tiah umhmun lawng a dang
nain thlarau thu ah kan bang aw thluh thotho. USA kan thleng ruangah vanram
kainak a si cuang lo ih, Lairam khua fate ih kan um ruangah vanram kan sunnak a
um cuang lo. Thlarau nun a neitu cu khuivek hmun ah kan va um khalle kan nunah
lungawinak in a khat ringring ding. 2 Korin 8:9 sungah “Kan Bawipa Jesuh Khrih
ih mi a zaangfah zia cu nan thei: Amah cu a lianzet na’n nanmah ih ruangah mi
farah ah a cang; cuticun a farahnak thawngin milian ih nan cannak dingah a si,”
tiah kan hmu thei.
Jesuh Khrih cu kanmah misual pawl tlending ah
harsatnak phunkim tuar dingin minung ah a piang. Cule thinglamtah ah thihnak harsabik
tuarin a nunnak a liam. Jesuh Khrih ih nun kan zoh tikah hi leitlun ṭhatnak
hrangah, a sersiammi minung pawl ṭhatnak hrangah a nung a si ti a fiang. Cuih
nun cu kan nunnak cio ah neih ter in duh. Cumi cu a sunlawinak langtertu dingih
in duh ruangah a si. Cutin Khrih ih thinlungput hi kan thinlung sungah a nung-ngah
ahcun Pathian sunlawinak langtertu kan si. Paul in “Kei ka hrangah nun cu Khrih
a si” a ti (Fil. 1:21) tikah Paul ih nun sung hmuahhmuah ah Jesuh hmel langter
ringringtu a si ti kan hmu thei.
Luka 19 sungah Zakia timi siahkhongtu pa ih nun thuhla
kan hmu. A dik lo zawngih nungtu a siih Pathian in a sualnak a ngaithiam thei
lo ding tiah an ruatmi pa a si. A nun sungah amai’ duhnak lawng thlun le tuah
in a nungtu a si fawn. Sikhalsehla Jesuh Khrih hmai ih a din tikah a thleng aw
thluh viarviar. A nunzia a hmu aw thluh ih a puarthaunak pawl hlit tahratin a
thinlung cu tangdortein a ṭhum aw thei a si cu. Hiti ih a thleng awk hi Jesuh
thawn an ton awk tikah si loin cumi hlan ihsin a thinlung thup sungin Pathian
duhnakcu Thiang Thlarau thawngin a nung cia zo ruangah a si. Asinain cutin a
thinlung thup sungih a thleng aw cia mi cu a thei aw hrih cuang lo. Jesuh thawn
an tong aw ngaingai tikah a langfiang. Midang hrangah nungtu ah a cang. Cuticun
zohman ih sim ṭul loin a neihmi a hrek cu mifarah pawl hneah a zem thluh hngai.
Cuih siannak thinlung a neihmi cu Pathian in a hmu ringring. Curuangah Jesuh cu
Zakia inn ah ṭhum awin zan a riak a si, tiah kan hmu thei. Jesuh ih thinlungput
bangin Zakia in a nunah a ṭhum aw thei ruangah Jesuh thawn an tlangleng tlang theinak
a si.
Thunetnak
Jesuh thawn pehzom pawlkom in kan um theinak dingah
cun kan thinlung put kan rem awk hmaisa a
ṭul. Kan hngalnak, kan puarthaunak le ‘keimah’ timi sinak hmuahhmuah kan ṭhum
aw ding a ṭul. Kan “kawn” kha Jesuh hnenah kan ṭhum-aw a ṭul. St. Augustine in
a sim dahmi cu, “Zumtu diktak ih nun ah a neih dingmi thupi pathum lawng a um;
Cumi cu a pakhatnak ah ‘tangdornak’ a si. A pakhnihnak ah ‘tangdornak’ a si. A
pathumnak khalah ‘tangdornak’ a si,” tiah “tangdornak” ih thupitzia a sim dah.
Curuangah Jesuh Khrih in thinlung put kan zoh tikah amah le amah a khaisang aw
dah lo. Mi parah thuneihtu dinhmun a la dah lo. Renmi si loin riantu dinhmun ah
a ṭhum aw. Pathian duhnak a thei ih amai’ duhnak cu a tansan ih midang duhnak a
hmu sak thiam. Amai’ hrangah a nung lo ih midang hrangah a nung. Midang hrangah
a nun tiang pek ding a pamhmai lo. Duhdawtmi u le nau, Bawi Jesuh ta ka si a ti
awtu pawlin tui caan ah ziangvek thinlung put kan keng? Bawi Jesuh ta kan si
taktak ahcun Bawi Jesuh ih thinlung put vekin kan nunah keng ve, nung ve ding
kan si lo maw? Kanmah le kanmah kan cekfel awk a ṭul thlang a si.
A netnak ah “tidai le meisa” thawn tahṭhim ka duh.
Tidai ih sinak kan zoh tikah a sannak hmun ihsin a niamnak hmun ah a luang
ringring. Ziangtik khalah tidai hi a so lam ah a luang ti kan thei dah lo.
Cuvek thotho in meisa alhkhal in a niamnak ihsin a sannak lamah a kai ringring.
Meisa alh cu a niamnak lamah a alh ti kan thei dan lo. Meisa a kang tikah tidai
thawn kan mit ṭheu. Cutin kan mit tikah meisa ziangtluk in tum khal hmansehla a
netnak ah tidai hmangin kan mit thei. Sang lam a cuhtu meisa hlio cu niam lam a
pantu tidai in tuini tiang a neh ringring lai. Meisa alh in a neh dah lo. Jesuh
Khrih khal a sangbik van ihsin minung hnenah a niamnak bikah a ṭum ih in hawl. Bawi
Jesuh suahnak Bethlehem cawkuang umnak hmun hi leilung zaren hnakin pi 200 a
niam hrih tiah an simmi ka thei dah (Keimah cun ka zingzoi man hrih
lo). Asinain cuih a niamnak in tuini tiang mi hmuahhmuah tlunah nehnak a co.
Curuangah kannih zumtu pawl khal Jesuh ih thinlung put le sinak hi kan nun uktu
ah kan hmang ahcun kan nunnak hi a sunglawi dingih man neizetmi ah a cang thei
ding a si.
Jesuh Khrih ih thinlung put hi nitin kan pumpak nun ih
kan neih cio theinak dingah Pathian in thluasuah in pe cio hram seh! Amen.
Duhdawtnak thawn,
Rev. Dr. CJ Hrang Hmung
BTS
Sept. 1, 2011; 02:00 hrs.
No comments:
Post a Comment