A THLENG AW RERO MI SANAH ZIANGTIN KAN NUNG DING?

Kum a cem zawngah a liamciami caan pawl kan zohkir sal ṭheu. Cutikah kan san hi zamrangzet in a thleng aw rero tihi kan hmu thei ciomi a si. Nidanglai ahcun rocket san, computer san kan tiih san hi a hercak zet ah kan ruat. Kan Laimi dinhmun hrangah cun a zamrang tuk zomi a si ko. Culawng si loin atu cu Information Technology timi IT san kan thleng ih hmakhatte ah leitlun khuihmun ih thilcangmi khal theih thei a si thlang. Hitivek caan sungah caan tawkfang kan hmang thlang. Leitlun khuazakip ih ummi pawl khal pakhat le pakhat hmel rori hmu awk ih biak-aw theimi web camera timi khal a suak thar vivo thlang. Kan ruahban dah lomi pawl an si. Cuticun kan tikcu caan hi a thleng-awcak zet ih a ṭhangso ngaingai ti kan hmu thei a si.

Hiti ih a thleng awmi pawl sungah hin kan duh lozetmi thil tampi a um ding. Kan hrangah siatnak lam in fehpimi siamtharmi tampi an um ko ding. Asinain kan duh zetmi le kan hrangah a ṭhahnemzetmi thil khal tampi a um ve ko ding. Lungawi thathozet ih kan cohlang ih kan hmang rero mi thil khal tampi a um ve ko ding. A hmunmi thil a um nawn lo tluk a siih a thar in a airol cingcing. Tuisun thilthar a suak tiih kan neihmi khal thaisun ahcun a hlun ah a cang ta mai. Model thar a phunphun in a suak cingcing. Cumi pawl cu hi lei khawvel ih kan nun sungih nitin kan hmuhtonmi, a thleng aw rero mi thil pawl an si.

           

Cuti ih a thleng aw rero mi san ih a ummi kan si vekin minung kan thinlung siseh, thilri le ziangzongza khal a hngetmi a um thei lo. A thleng aw cingcing. Cumi lakah a thleng aw dah lomi thil khal a um ve ko. Cutin a thleng aw rero mi kan san hi Saam cangantu cun, “Khuahlan laipi ah leilung hi na rak seemsuah; Na kutzung in van pawl hi na tuah. An zate in an hloral  ṭheh ding. Asinain nang cu kumkhua in na hmun ding; An zate in hnipuan bangtuk in an  ṭet thluh ding; Hnipuan vekin na thleng hai ding ih an hloral  ṭheh ding. Sikhalsehla nang cu nangmah keel thotho na si; Na nunnak cu cem ti a nei lo” tiah Pathian ih sinak kha fel zetin a hmufiang thei (Saam 102:25-27). Pathian lawng hi a keel te’n a awh ringring. A duhdawtnak khal kumkhua in a hmun ringring a si (Saam 136).

           

Cuih tlunah kan Bawipa Jesuh Khrih khalin, “Lei le van a cemral ding na in ka  ṭongkam cu a cem dah lo ding,” tiah in sim (Mat. 24:35). Pathian thu le a  ṭongkam hi minung cun kanmah le duh daan a phunphun lakin kan pom cio, kan rel cio. Asinain kanmai’ pom le rel vek si loin A thunung  ṭongkam cu kumkhua in a hnget ringring a si, ti in simfiang duhmi a si.

1. Thleng awknak timi cu a um ringringmi a si.           

Ni le thla, caan pawl hi a herliam vivo. Nithla siarnak khal nikhat hnu nikhat thleng vivo a  ṭul. Pathian kutsuak hi leilung boruakpi hi a her aw rero ih nitin siamthar rero a si. Kan leilungpi hi cawl men loin a her rero ih a sungum thil ziangkim khal a thleng awk rero. Kan nunnak khal nikhat hnu nikhat, thlakhat hnu thlakhat, kumkhat hnu kumkhat a thleng awk vivo vekin kan kum khal a tar vivo. Leilungpi a seemsuah ihsin thleng awknak timi hi a um ringring. Cuti ih thleng awknak a um ruangah  ṭhansonak tampi a suahpi ih minung le leilung ih a ummi zate hrangah  ṭhathnemnak tampi a um.

Asinain khatlam ah  ṭhansonak a um vekin siatralnak lam in thlenter theitu thil khal tampi an um ve. Kan duh khalah siseh, duh lo khalah siseh, a thleng aw rero cu a si tamai. Thleng awknak a um lo ahcun  ṭihnungza rapthlakza tampi a suak thei men. Thleng awknak a um lo ahcun kan nun khal hi kan ningzet men ding. Amah kel ringring timi cu kan duh ding zum a um lo nasa. Thleng awknak timi cu minung kan  ṭhatnak hrangah a si. Thleng awknak ruangah nitin in  ṭhanlen ter ih pitling nun ah in fehpi.

           

Kumpi kumkhat sung kan nunnak kan zohkir sal tikah thleng awknak tampi kan tong ko ding. A hrekkhat thleng awknak pawlcu kan duhmi a si ko ding. Asinain kan duh lomi thil tampi khal cu duh lo cing khalin kan tong thotho mi an si. Cumi pawl khal cu Pathian ih remruat a siih kan el theimi a si fawn lo. A thokpek ih kan rel zo vekin kan tlanlennak hi leilungpi hi nitin a thleng aw rero ruangah a si.

2. Asinain kan “Bawipa cu ziangtik hmanah a thleng awk dah lo”.           

Saam cangantu in Pathian parah ziangtluk a rinsan timi thu hi hngetzetin a sim. A dinnak hmun hrampi cu Pathian ah a ret. Baibal in “thihnak a um lo,” a ti lo. Asinain “thihnak horkuam sung zawh hman ningla maw Bawipa ka  ṭih lo ding,” a ti sawn. “Ral do awknak a um lo,” a ti lo ih “midang in in siatsuah dingin an rat khal le Bawipa lawng ka rinsan ding” tiah a ti. Leitlun thil ziang hmuahhmuah cu a herliam vivo ih a thleng awk rero ko hman sehla kan biakmi Pathian cu kumkhua in a hmun ringring a si.

           

Curuangah a liamcia zomi kan nunnak kan zohkir sal tikah thleng awknak tampi kan tong, kan liampi zo ti cu kan tonteh ciomi a si. Taanta ding thil tampi kan nei vekin pehzom ih fehpi vivo ding le neih vivo lai dingmi thil tampi a um ko ding. 

           

“Thukam” timi hi a thupizet. Zianghman ka tuah nawn lo ding tiah thukamnak kan tuah  ṭheu. Asinain kan pelhsal ringring. A hleice in kumtinte’n kumcem zaan ah Pathian hnenah thukamnak tampi kan tuah ṭheu. “Bawipa, tui’ kumthar sungah cun ṭhatlonak hmuahhmuah ka tansan dingih na duhnak vekin ka tuah, ka nung thlang ding”, tvp. a phunphun kan ti ṭheu. Kan thinlung sungih a suakmi hmuahhmuah kan sal ih Pathian hnenah ‘thu kan kam a si’ kan rak ti ṭheu. Sikhalsehla caan a reihlan ah kan pelhsal ringring cu teh. Rei hman a daih dah lo. Kanmah keel ah kan cang sal lala. Kan hngilh pang maw, kan hngilh hrim maw cu thei ve hlah. Thukam pelh hmang pawl cu zohman in kan zum ngam dah lo si khawh. A thukam vekin a tuah ṭheu lotu cu rinsantlak an si dah kel lo ti cu kan thei cio ko. Cuvek in Pathian hnen ih thu kan kammi kan pelh ringring ahcun Pathian in teh in zum ngam thei nawn pei maw? tihi ruah ding a um.

           

Mi relsiatnak, iksiknak, mi huatnak, khawm paih lonak, Pathian thu ah nung duh lo ti pawl hi a ttha lomi pawl an si ti kan thei. Cuvek pawl cu a liamcia caan sungah taanta ding pawl an si. San thar, kum thar sungah kan luhpi loding a thupizet. Zu in, kuakfawp, khaini hmawm, kuanza ei tivek ritthei thil ziangkim hman rero pawl hin kan taksa kan siatsuah awk rero ti hi kan thei a ṭul. Atu ah in siatsuah hrih lo na’n a hmang ringringtu pawl cu a reihlan ah an taksa ruangpum ah natnak pakhat khat a suahpi thei. Kan taksa nunnak hrangah ṭhathnemnak zianghman a um lomi pawl an si. Cubang pawl hi a thleng rero mi san sungah hmang nawn lo thei sehla a ṭha.

Isaiah 55:1-2 sung kan zoh asile, “Bawipa in, ‘Ra uh, ti a haal mi hmuahhmuah ra uh, hinah tidai a um. Ra uh paisa a nei lomi pawl rawl ra lei uhla ei uh. Ra uh, sabit le cawhnawi ra lei uh; man loin nan ngah ding. Ziangahso rawl a si lomi hrangah paisa nan hman? Ziangahso pum puarter lomi thil hrangah nihlawh nan pek? I ngai uhla ka simmi vekin tuah uh; Rawl lakih a ṭhabikmi nan ei dingih nan nun a nuam ding,’” timi thu kan hmu thei. Pathian ṭongkam a si ih poisa lo ih um san men dingmi a si hrimhrim lo. Curuangah kan nunnak hrangah ṭhathnemnak zianghman a um lomi thil pawl cu kan hrial thei asile kan hrangah a ṭhazet ding. Cubang thil pawl cu kan hrangah ṭhathnemnak a um lo, siatsuahnak lawng an si ti kan thei ringring ah a ṭha. Curuangah Jesuh Khrih sungah thleng-awknak taktak kan neih a ṭul. Kan nun hi Jesuh Khrih ih ukmi taktak si a ṭul.

           

Kan sim zovekin kan san hi a hercak tuk. Kan tikcu caan hi theih lo karlak ah a herliam zutzo. Mah duhduh ih um men dingmi kan si lo. Kan nun hi in tlentu Khrih Jesuh thawn pehzom in kan um ringring lawngah san a man ringringmi kan si ding. Ziangahtile a thleng awk rero mi hi kan leilungpi ah a nung rerotu kan si kona’n kan biakmi Pathian cu a thleng awk dah lo, kumkhua in a hmun a si. Hebru cangantu in, “Jesuh Khrih cu mizan, tuihsun le kumkhua in a hmun ringring a si” (Heb. 13:8) tiah a sim.. Saam cangantu in, “Sikhalsehla maw Bawipa, Nang cu kumkhua in siangpahrang na si. Sankhat hnu sankhat nang cu an lo thei ringring ding,” a ti (Saam 102:12). “Bawipa cu ziangtik hmanah a thleng awk dah lo”. Curuangah a thleng awk rero mi san ih kan nun daan ding a thupi bik cu kan nunnak a neitu Bawipa thei in amah sungah um ringring hi a si (2 Kor. 5:17-21). Kan thilrit le kan zonzainak hmuahhmuah cu kan Bawipa Jesuh Khrih hnen ah tthum cio uhsi (Mat. 11:28-30). Ziangvekin san hi a thleng aw rero khal le Jesuh Khrih sungah cat loin kan um ringring ding a thupibik. Cumi cu a thleng aw rero mi san sungih kan nun daan ding a thupibik miangmo cu a si.

Duhdawtnak le duhsaknak thawn,

Rev. Dr. CJ Hrang Hmung

Vice Principal, Bethel Theological Seminary

Kalaymyo.

Lairawn Magazine, March, 2008.

BTS/110108/0020 am/