Baibal Caanghril:
“Milai Fapa cu a hlomi pawl hawl dingah le rundam dingah a ra” (Luk. 19:10)
Baibal siarbet: Luk. 19:1-10.
Zakia ih thuhla hi Sunday School nauhak kan si lai ihsin kan thei dah ciomi a si. A thuhla hla ih an phuahmi khal kan sak rero dah ko ding. Himi Siahkhong Zakia ih nunnak kan zoh tikah zumtu pawl kan zir dingmi tampi a um tiin ka ruat. Curuangah Zakia ih nun hmangin tuni ah thazaang thar lak cio dingah ka lo sawm hngai.
1. Zakia ih sinak pawl (Luk. 19:2-4)
Bawi Jesuh cu Jordan tiva nisuahnak lam ihsin an feh vivo. Jerusalem khua ihsin peng 16 hlatnak Jerikho khua ah a thleng ih khuasung in a feh vivo. Siahkhong hotu Zakia in Bawi Jesuh a ratnak thu a thei. Ziangahtile Bawi Jesuh cu siahkhong pawl le misual pawlih rualpi a si tiah a hmin a thang ruangah a si (Mat. 11:19). Curuangah Zakia in Bawi Jesuh hmu dingah a duh ngaingai. Zakia cu milian zet a si. Rom acozah hnenah siah tampi a pe theitu pawl cu Rom ram sungah siahkhong theinak khuan an nei. Siahkhong pawl cu Rom acozah hnen ihsin thlahlawh an ngah lo. Curuangah mipi hnen ihsin sumsaw tampi ngah thei dingin siah an khong ttheu. Cule Rom acozah hnenah pek dingih an khiahmi an pek hnu ah a hleimi pawl cu siahkhong pawlin an lak thluh. Curuangah Siahkhong pawl cu mipi bum in hna an ttuanih an lianzetnak a si. Curuangah mipi pawlin siahkhong pawl hi an hua ngaingai (Mat. 2:13-14).
2. Bawi Jesuh thawn an tong aw (Luk. 19:5-6)
Zakia cu mi ttha lo a si. Duhham zetih nungtu khal a si. Duhdawttu le rualpi ttha a nei lo. Milian a si ko nain mi tampiih hnongmi a si. Zohmanin an kom duh lo. Cuihtlun ah Zakia cu mi niamte khal a si. Zakia cun Bawi Jesuh thuhla a thei. Bawi Jesuh cu misual pawlih rualpi a si timi thu a rak thei ngah ve. Curuangah Bawi Jesuh hmu ngah ding a duh ngaingai. Bawi Jesuh tong dingah a sinak vekin a pan ve mai. A niamtuk ruangah mipi lakin a hmu thei lo. Curuangah theipi kung parah kaiin Bawi Jesuh ratnak lam cuanin a um. Bawi Jesuh cu cuih hmun a thlen tikah tlunlam a zoh ih, “Zakia, zamrangin rung ttum aw, tuihsun na inn ah ka tlung ding” a ti. Zakia in Bawipa cu lungawi zetin a cohlangih a inn ah a tlunter.
Jericho khua ah mifel le mittha tampi an um ko ding. Sikhalsehla cu pawl inn ah Bawi Jesuh cu a tlung lo. Misual pai’ inn ah a tlung sawn a si. Bawi Jesuh in ngaithiamnak le sunloihnak a co tikah nang misual na si ti ttul loin Zakia ih thinlung cu a thleng aw thluh. Bawi Jesuh in a sualnak pawl a ngaithiam thluh ti a hmu tikah lungawizet in a innah a tlunter a si. Himi hi Zakia thinlung a ttum awk ruangah a si. Bawi Jesuh ih sawmnak bangin Zakia cu zamrangin a ttum. Cuticun Jesuh thawn an tong aw. Bawipai’ kawhnak aw theiin a hmaiah kan tthum awk a ttul. Cutik lawngah Bawipa Jesuh thawn kan tong ngah tengteng ding a si.
3. Mi pawlih an hmuh daan (Luk. 19:7)
Bawi Jesuh cu Zakia inn ih a tlun an hmuh tikah Jericho mi pawlin an mawhthluk nasa: “Hi pa hi misual pa ih inn ah a tlung ual” an ti. Bawi Jesuh in a sualnak a ngaidam zo nain an khua mipi pawl cun misual tiin an hmu thotho. Midang ih in hmuh daan hnakin Bawipai’ hmuh daan le zangfahnak hi a thupi sawn.
4. Zakia cu a sual a sir (Luk.19:8)
Inn an thleng tikah Zakia cu a tuahmi thil hmuahhmuah ruangah a sir awk ngaingai. Amah cu mi hrokhrawl le mibumhmang a sizia pawl Bawi Jesuh hnenah a phuang hnu ah a hlanih a nun hlun hmuahhmuah hlon thluh dingin thu a kam aw. “Bawipa, i ngai hnik! Ka neihmi ih hrek cu mifarah ka pe ding; cule ka bummi an um ahcun a let li in ka sam sal ding” tiah Bawi Jesuh hnenah thu a kam.
Dingfel lomi pawl cu daan thukham in dingfel thei dingah ziangtluk kan tuah khalle Pathian tel lo ahcun zianghman a danglam cuang lo ding. Sikhalsehla Zakia cu Bawi Jesuh a hril ngahmi ruangah dingfel nunin a nung ngah. Sirnak thinlung a nei taktak a si, timi kha Bawi Jesuh in fiangzetin a thei. Cuihni rori ah Zakia ih nun cu a danglam aw thluh viarvi. A inn ah siseh, a thinlung sungah siseh Bawi Jesuh a luh ngah ruangah a thlengaw thluhnak a si. Bawi Jesuh cu kan thilung sungah kan cohlang taktak tikah kan nun hi a hlan vekin kan nung thei nawn lo (Thup. 3:20). Nun thar sungah siam tharmi kan si thluh a si (2 Kor. 5:17).
5. Zakia cu Bawi Jesuh hnenin ngaidamnak a ngah (Luk. 19:9-10)
Bawi Jesuh in Zakia ih sirnak ttongkam a theih tikah “Tuisun hi pa ih inn ah rundamnak a ra thleng zo, ziangahtile hi pakhal hi Abraham ih tesinfa a si ve. Milai Fapa cu a hlomi pawl hawl dingah le rundam dingah a ra,” a ti. Zakia cu sualthim khurthukpi sungah siseh, zum lonak ah siseh a hlo dahmi a si. Sikhalsehla a tu ahcun rundamnak a co fel ngah sal a si. Misual pawl sual sirin rundamnak ngah theinak dingah Bawi Jesuh cu hi leitlun ah a rung ttum. Curuangah siahkhong pa hnenah a fehnak a si. Zakia hnenah feh loin sirnak khuan pe lo sehla Zakia cu a hlo rero hrih ko ding. Anih khal cu a dang Judah mi pawl vekin Abraham ih tesinfa a si ve. Atu ahcun zumnak ruangah Abraham ih tesinfa ngaingai ah a cang sal zo a si (Gal. 3:7).
Tlangkawmnak
Zakia vek misual pawl rundam dingah Bawi Jesuh cu hi leitlun ah a rung ttum a si (Mat. 18:12; Mar. 2:17). Bawi Jesuh in in rundam ih kan sungah a nung taktak ahcun kannih khal cuih rundamnak thuthangttha cu a hlo cuahco mi a dang misual pawl hnenah phuang loin kan um thei hrimhrim lo ding. Bawi Jesuh in Zakia cu rundamnak co ngahtu le Abraham ih tesinfa in a hmu. Cumi cu a thupibik ah a thinlung a tthum aw thei ruangah a si. Amai’ sinak a hmufel ngah ih Pathian hmaiih a dik lozia a theifiang ngah ruangah a si. Cumi cu sirnak thinlung ngaingai thawn thleng aw tahratin zumnak a neihmi vekin a nung ruangah rundamnak a co ngah a si. Bawi Jesuh in, “Milai Fapa cu a hlomi pawl hawl dingah le rundam dingah a ra,” a ti (Luk. 19:10). Kannih mihlo le misual pawl rundam dingah Bawi Jesuh a rung ttum zo. Zakia bangin kanmai’ sinak theifiang awin Bawipa hmaiah sirnak thinlung ngaingai thawn tthum aw cio ding kan ttul. Cuticun rundamnak co ngahtu le Abraham ih tesinfa kan si thei ve ding a si.
Duhdawtnak le duhsaknak thawn,
Rev. Dr. CJ Hrang Hmung, PhD.,
Camkhat Yangon.
July 18, 2015|Saturday|6:30 pm.
“Milai Fapa cu a hlomi pawl hawl dingah le rundam dingah a ra” (Luk. 19:10)
Baibal siarbet: Luk. 19:1-10.
Zakia ih thuhla hi Sunday School nauhak kan si lai ihsin kan thei dah ciomi a si. A thuhla hla ih an phuahmi khal kan sak rero dah ko ding. Himi Siahkhong Zakia ih nunnak kan zoh tikah zumtu pawl kan zir dingmi tampi a um tiin ka ruat. Curuangah Zakia ih nun hmangin tuni ah thazaang thar lak cio dingah ka lo sawm hngai.
1. Zakia ih sinak pawl (Luk. 19:2-4)
Bawi Jesuh cu Jordan tiva nisuahnak lam ihsin an feh vivo. Jerusalem khua ihsin peng 16 hlatnak Jerikho khua ah a thleng ih khuasung in a feh vivo. Siahkhong hotu Zakia in Bawi Jesuh a ratnak thu a thei. Ziangahtile Bawi Jesuh cu siahkhong pawl le misual pawlih rualpi a si tiah a hmin a thang ruangah a si (Mat. 11:19). Curuangah Zakia in Bawi Jesuh hmu dingah a duh ngaingai. Zakia cu milian zet a si. Rom acozah hnenah siah tampi a pe theitu pawl cu Rom ram sungah siahkhong theinak khuan an nei. Siahkhong pawl cu Rom acozah hnen ihsin thlahlawh an ngah lo. Curuangah mipi hnen ihsin sumsaw tampi ngah thei dingin siah an khong ttheu. Cule Rom acozah hnenah pek dingih an khiahmi an pek hnu ah a hleimi pawl cu siahkhong pawlin an lak thluh. Curuangah Siahkhong pawl cu mipi bum in hna an ttuanih an lianzetnak a si. Curuangah mipi pawlin siahkhong pawl hi an hua ngaingai (Mat. 2:13-14).
2. Bawi Jesuh thawn an tong aw (Luk. 19:5-6)
Zakia cu mi ttha lo a si. Duhham zetih nungtu khal a si. Duhdawttu le rualpi ttha a nei lo. Milian a si ko nain mi tampiih hnongmi a si. Zohmanin an kom duh lo. Cuihtlun ah Zakia cu mi niamte khal a si. Zakia cun Bawi Jesuh thuhla a thei. Bawi Jesuh cu misual pawlih rualpi a si timi thu a rak thei ngah ve. Curuangah Bawi Jesuh hmu ngah ding a duh ngaingai. Bawi Jesuh tong dingah a sinak vekin a pan ve mai. A niamtuk ruangah mipi lakin a hmu thei lo. Curuangah theipi kung parah kaiin Bawi Jesuh ratnak lam cuanin a um. Bawi Jesuh cu cuih hmun a thlen tikah tlunlam a zoh ih, “Zakia, zamrangin rung ttum aw, tuihsun na inn ah ka tlung ding” a ti. Zakia in Bawipa cu lungawi zetin a cohlangih a inn ah a tlunter.
Jericho khua ah mifel le mittha tampi an um ko ding. Sikhalsehla cu pawl inn ah Bawi Jesuh cu a tlung lo. Misual pai’ inn ah a tlung sawn a si. Bawi Jesuh in ngaithiamnak le sunloihnak a co tikah nang misual na si ti ttul loin Zakia ih thinlung cu a thleng aw thluh. Bawi Jesuh in a sualnak pawl a ngaithiam thluh ti a hmu tikah lungawizet in a innah a tlunter a si. Himi hi Zakia thinlung a ttum awk ruangah a si. Bawi Jesuh ih sawmnak bangin Zakia cu zamrangin a ttum. Cuticun Jesuh thawn an tong aw. Bawipai’ kawhnak aw theiin a hmaiah kan tthum awk a ttul. Cutik lawngah Bawipa Jesuh thawn kan tong ngah tengteng ding a si.
3. Mi pawlih an hmuh daan (Luk. 19:7)
Bawi Jesuh cu Zakia inn ih a tlun an hmuh tikah Jericho mi pawlin an mawhthluk nasa: “Hi pa hi misual pa ih inn ah a tlung ual” an ti. Bawi Jesuh in a sualnak a ngaidam zo nain an khua mipi pawl cun misual tiin an hmu thotho. Midang ih in hmuh daan hnakin Bawipai’ hmuh daan le zangfahnak hi a thupi sawn.
4. Zakia cu a sual a sir (Luk.19:8)
Inn an thleng tikah Zakia cu a tuahmi thil hmuahhmuah ruangah a sir awk ngaingai. Amah cu mi hrokhrawl le mibumhmang a sizia pawl Bawi Jesuh hnenah a phuang hnu ah a hlanih a nun hlun hmuahhmuah hlon thluh dingin thu a kam aw. “Bawipa, i ngai hnik! Ka neihmi ih hrek cu mifarah ka pe ding; cule ka bummi an um ahcun a let li in ka sam sal ding” tiah Bawi Jesuh hnenah thu a kam.
Dingfel lomi pawl cu daan thukham in dingfel thei dingah ziangtluk kan tuah khalle Pathian tel lo ahcun zianghman a danglam cuang lo ding. Sikhalsehla Zakia cu Bawi Jesuh a hril ngahmi ruangah dingfel nunin a nung ngah. Sirnak thinlung a nei taktak a si, timi kha Bawi Jesuh in fiangzetin a thei. Cuihni rori ah Zakia ih nun cu a danglam aw thluh viarvi. A inn ah siseh, a thinlung sungah siseh Bawi Jesuh a luh ngah ruangah a thlengaw thluhnak a si. Bawi Jesuh cu kan thilung sungah kan cohlang taktak tikah kan nun hi a hlan vekin kan nung thei nawn lo (Thup. 3:20). Nun thar sungah siam tharmi kan si thluh a si (2 Kor. 5:17).
5. Zakia cu Bawi Jesuh hnenin ngaidamnak a ngah (Luk. 19:9-10)
Bawi Jesuh in Zakia ih sirnak ttongkam a theih tikah “Tuisun hi pa ih inn ah rundamnak a ra thleng zo, ziangahtile hi pakhal hi Abraham ih tesinfa a si ve. Milai Fapa cu a hlomi pawl hawl dingah le rundam dingah a ra,” a ti. Zakia cu sualthim khurthukpi sungah siseh, zum lonak ah siseh a hlo dahmi a si. Sikhalsehla a tu ahcun rundamnak a co fel ngah sal a si. Misual pawl sual sirin rundamnak ngah theinak dingah Bawi Jesuh cu hi leitlun ah a rung ttum. Curuangah siahkhong pa hnenah a fehnak a si. Zakia hnenah feh loin sirnak khuan pe lo sehla Zakia cu a hlo rero hrih ko ding. Anih khal cu a dang Judah mi pawl vekin Abraham ih tesinfa a si ve. Atu ahcun zumnak ruangah Abraham ih tesinfa ngaingai ah a cang sal zo a si (Gal. 3:7).
Tlangkawmnak
Zakia vek misual pawl rundam dingah Bawi Jesuh cu hi leitlun ah a rung ttum a si (Mat. 18:12; Mar. 2:17). Bawi Jesuh in in rundam ih kan sungah a nung taktak ahcun kannih khal cuih rundamnak thuthangttha cu a hlo cuahco mi a dang misual pawl hnenah phuang loin kan um thei hrimhrim lo ding. Bawi Jesuh in Zakia cu rundamnak co ngahtu le Abraham ih tesinfa in a hmu. Cumi cu a thupibik ah a thinlung a tthum aw thei ruangah a si. Amai’ sinak a hmufel ngah ih Pathian hmaiih a dik lozia a theifiang ngah ruangah a si. Cumi cu sirnak thinlung ngaingai thawn thleng aw tahratin zumnak a neihmi vekin a nung ruangah rundamnak a co ngah a si. Bawi Jesuh in, “Milai Fapa cu a hlomi pawl hawl dingah le rundam dingah a ra,” a ti (Luk. 19:10). Kannih mihlo le misual pawl rundam dingah Bawi Jesuh a rung ttum zo. Zakia bangin kanmai’ sinak theifiang awin Bawipa hmaiah sirnak thinlung ngaingai thawn tthum aw cio ding kan ttul. Cuticun rundamnak co ngahtu le Abraham ih tesinfa kan si thei ve ding a si.
Duhdawtnak le duhsaknak thawn,
Rev. Dr. CJ Hrang Hmung, PhD.,
Camkhat Yangon.
July 18, 2015|Saturday|6:30 pm.
No comments:
Post a Comment