PATHIAN DUHNAK TUAH SAWN DING

Baibal Caanghril:

“Hi leilung le a sungih thilri hi tlaihsan hlah uh; hi leilung hi nan tlaihsan a sile Pathian duhdawtnak nan nei lo a si… Leilung le a sungih a ummi thilri, milai ih an tlaihsanmi pawl hi an hloral vivo zo; asinain Pathian duhnak a tuahtu cu kumkhua in a nung ding” 

(1 Joh. 2:15-17).

Minung hi kan nungdam sung hmuahhmuah leilung parah kan tlang kan leng. Baibal caanghril kan zoh tikah leilung ah kan tlangleng ko nain leilung thilri pawl duhtuk lo dingah le cuih lei thilri pawl ih ttemttawnmi kan si lonak dingah ralrin in peknak thu kan hmu thei.

1. Leilung tlaihsan lo ding.

Himi hmun ah “leilung” a timi cu “a thimmi ram” tinak a si. Leilung ta a simi thilri hmuahhmuah kha sim duhmi a si (v. 16). Pathian le leilung, leitlung ta a simi thil hmuahhmuah hi hmunkhat ah duhkomtlang ding cu a si thei hrimhrim lo. Hi leilung a duhtu le a tlaihsantu cu Pathian ih duhdawtnak a nei thei dah lo ding (v. 15).

Sikhalsehla hihnak ih sullam thuk deuh pakhat kan hmuthiam dingah a thupi zet. Leilung ah Pathian ih pekmi thil ttha tampi a um. Asinain cumi pawl cu kan duh dingmi a si lo. Cuih thil ttha pawl hmangin Pathian hnenah lungawi thu kan sim thei ko nain cuih thil pawl kha kan duh dingmi a si hrimhrim lo. Thutthimnak ah sumsaw timi hi a tthami a si. Kan ttulzet ruangah sumsaw ngah theinak dingah kan hawl rero ciomi a si ko nain cuih sumsaw cu kan duh dingmi a si lo. Colh hahdam ih um huahhi men hi a ttha zetmi, kan ttul zetmi a si ko nain colh lawnglawng kan zongsang pang ahcun zaangzel ah kan cang ding a si. Hnattuan rero timi hi a ttha zetmi le kan ttul zetmi khal a si. Sikhalsehla a si lo zawngih hna kan ttuan tikah kan hlawhtlinmi zohin hngalnak le porh awknak a suahpi thei. Ka tuah thei, ka ttuan theimi a si tiah tluangkhawnnak a suahpi thei. Khawvel mi um daan ih tlangleng dingah in fehpi thei a si.

Curuangah a tlun ih kan tarlangmi pawl duh hnakin cuih thil hmuahhmuah in petu Pathian kha kan duhsawn ding a ttul. Pathian hnen lawngah kan duhmi ziangkim kan pe thluh ding a ttul a si (Mat. 10:37; Luk. 14:26). Hi leilung hi Satan ih ram a si (Joh. 12:31; 1 Joh. 5:19). Bawi Jesuh in rundam dingih a ratnak hmun khal hi cuih leilung cu a si. Pathian in leilung a duhdawt ruangah a si (Joh. 3:16). Sikhalsehla leilung in Bawi Jesuh cu a thei nawn lo, a cohlang lo (Joh. 1:10). Thimnak sungah a tang ringringmi cu hi leilung a si. Tleunak cu leilung ah a ra lut ko nain minung pawl cu a ttha lomi nuncan ziaza sungah an tlangleng ruangah tleunak hnakin thimnak kha an duh sawn (Joh. 3:19). Hi leilung hi kan tlaihsan lo ding a thupi zet a si.

2. Leilung ta a simi thil pawl.

Satan le Bawi Jesuh an ral aw vekin tisa duhnak khal thlarau duhnak thawn an ral aw. Leilung ta pawl cu Pathian thawn an ral aw. Ei-in duhtuknak, thilri duhtuknak, duhhamnak pawl hi leilung ta a siih Pathian thawn a pehpar aw lo. Pathian hnen ihsin a rami khal an si lo. Leilung ah hram an bun sawn a si. Cumi pawlin minung hrangah nun diriamnak a pe thei ngaingai lo. Hinah hmun ah Johan in leilung thawn a pehparmi kan duh lo dingmi thil thutthimnak pathum in a tarlang. Cumi pawl cu (1) Sualnak tisa in a hiarmi, (2) Milai in a hmuhmi le an duhmi, le (3) Minung in hmaihngal porh awknak ih an ruahmi thil pawl tla an si.

A pakhatnak a simi “sualnak tisa in a hiarmi” pawl cu hurnak, nomceennak, ei le in thawthaw lawng duhhiarnak timi tisa thawn pehparmi duhhiarnak pawl a zatein an tel. A pahnihnak “milai in a hmuhmi le a duhmi” pawl cu mit thawn a hmu theimi pawl parah duhnak kha a si. Hinah hin minung pawl ih duhhamnak le hiarnak pawl a tel thluh. A pathumnak “minung in hmaihngal porh awknak” timi cu a neihmi, a tuahmi pawl parah hngalnak kha sim duhmi a si. Cuih hmaihngalnak le porh awknak cu hlawhtlinnak ruangih porh awknak, hmintthat ngahnak, dinhmun sang lawng ruatih ngah duhnak, Pathian kha thinlung tak ih zum ding hnakin mah le mah rinsan awknak pawl kha sim duhmi a si.

3. Pathian duhnak a thluntu.

A hloral sal theimi cu ziangruangah kan tlaihsan duh rero ding? Ziangruangah kan rinsan rero ding? A hngetkhoh lomi bank ah milian pawlin an sumsaw an khawl duh lo. Innhrampi a hngetkhoh lo ahcun cuih inn thu a theitu pawlin an lei duh lo. Khawvel duhnak a duhtu pawl cu tidai sung a pil rero laifangah Titanic lawngpi sung tokham parih to rerotu pawl thawn an bang aw. Cumi pawl hnakin Pathian ih duhnak a thluntu pawl cu kumkhua in a hmun ringring ih a nung ringring a si. A sile Pathian ih duhnak cu ziang a si? Pathian ih duhnak cu “Minung in Jesuh Khrih kha zum in a thukhammi pawl bangih nun hi a si”. A hleice in Pathian cu nan thinlung zate, nan nunnak zate, nan ruahnak zate le nan thazaang zate thawn nan duhdawt pei timi le na innhnen kha nangmah na duh awk vekin na duhdawt pei, timi thukham pahnih thlun kha a si (Mar 12:30-31). Jesuh Khrih a zumih thukham a thluntu pawl cu kumkhua nunnak co in kan nung camcin ding. Pathian duhnak a tuahtu lawng vancung Uknak kan thleng ding (Mat. 7:21). Mifim pawl cun a hloral theimi thu ah an nung lo. Pathian ih duhnak parah an hngat aw ttheu.

Thunetnak.

Curuangah zumtu mi piangthar pawl cu leilung ta a simi thilri pawl tlaihsan ding kan si lo. D.L. Moody in, “Pathian duhnak vekin a nungtu pawl cu an sulhnu khalah kumkhua in a nung ringring a si,” tiah a sim dah. Leilung ta a simi thilri pawl hnakin Pathian duh sawntu ding kan si. Pathian kan duhsawn a si timi cu Pathian duhnak kan thlunnak in kan Khristian nun ah kan langter ding a ttul a si. Kanmai’ duhnak hnakin Pathian ih duhnak ziang a si, timi thei in a duhnak tuah sawn dingah kan nun kan hlan awk a ttul a si.

Duhdawtnak le duhsaknak thawn,

Rev. Dr. CJ Hrang Hmung, PhD.,
Toungphila, Kalaymyo.
July 25, 2015|Saturday|10:20 pm.