PATHIAN TTONGKAM BAIBAL THIANGHLIM

Baibal Caanghril:

“Ca Thianghlim hmuahhmuah hi Pathian ih thawkhummi a si ih thutak zirhnak, zirhsual simhrinnak, a sualmi remsalnak ah le dingte ih nitin nunnak ih zirh awknak ah a ttha”

(2 Timote 3:16).

Hi leitlun ah cabu tampi a um. Hminthang zetmi cabu tampi khal a um. Asinain Baibal ca a bangtu cabu pakhat hman a um lo. Ziangahtile Baibal hi cabu menmen a si lo, Pathian ttongkam pawl ngankhummi cabu a si. Curuangah cabu dang thawn an bang aw thei lo. Theih ding a ttulmi pawl Baibal sungah kimtein a um. Ngai nuam thuanthu tampi a um. Nunnak thleng ter theitu a si fawn. Kumkhua nunnak lamzin fiangzet ih in simtu cabu umsun khal a si. Curuangah Baibal ca hi cabu dang hnakin a cungcuang deuh. A sunglawi deuh. A famkim deuh. Mi hmuahhmuah nunnak hrangah thazaang petu, nun lamhruaitu, nun zirhtu umsun cabu tthabik miangmo a si.

1. Ca Thianghlim hi Pathian ih nganfialmi a si.

Baibal ca hi Pathian ih nganmi kan ti tikah a zatein a ngan thluh tinak a si kherkher lo. Asinain Pathian in amai’ kut hmangin ca a ngannak hmun a um ticu kan theih cio mi a si. Daniel 5:5-31 sung kan siar tikah Belshazzar siangpahrang le a rualpi pawl rawl ei-puai tuahnak hmun ah Pathian kut a langih phar parah canganmi thu kan hmu thei. Himi zawn ahhin Pathian in minung hnenih a theihter duhmi thu cu Amai’ kut rori hmangin a ngan thu kan hmu thei. Curuangah Baibal hi Pathian ih nganmi cabu tiah kan ti thei a si.

Cun kan Baibal Thianghlim hi a ngantu minung pawlin anmai’ duhnak le ruahnak men ih ngankhummi a si fawn lo. Pathian in minung hnenih a sim duhmi pawl kha a fialmi minung pawl hnenah ngankhum dingin ttuanvo a pek (Suah. 17:14; Jere. 30:2; 1 Pit. 1:21). Cuih a fialmi pawl hi hmunkhat te ah umkhawmmi an si fawn lo. Kumkhat sungih nganmi khal a si lo. A thei aw dah lomi mi 40 leng lo in kum 1600 sung hmuntin ihsin Pathian thlarau ih fialnak vekin an ngankhum cio mi a si. Biaknak dang pawl vekin an mifim le hruaitu pawlih ngankhum menmi a si hrimhrim lo timi cu Baibal thuanthu kan zoh tikah kan thei theimi a si. Pathian in a sersiammi minung pawl a duhdawtnak langternak ding hrangah a hrilmi minung pawl hmangin minung hnenah a kuatmi duhdawtnak cakuat sunglawi a si.

2. Ca Thianghlim hi Pathian ih thawkhummi a si. 

2 Timote 3:16 sungah, “Ca Thianghlim hmuahhmuah hi Pathian ih thawkhummi a si ih thutak zirhnak, zirhsual simhrinnak, a sualmi remsalnak ah le dingte ih nitin nunnak ih zirh awknak ah a ttha” a ti. Pathian ih thukhummi a si ruangah hmual a nei cuang. Cabu dang menmen vek a si hrimhrim lo.

Baibal Ca Thianghlim cu Pathian ih thawkhummi a si ruangah 

(a) Pathian thu cu a nungih a cak fawn. Kap hnih hriam ralnam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlang thei a si (Heb. 4:12). (b) Pathian thu cu meisa bangtuk a siih lungto a kuai tthehtu sobul bangtuk a si (Jere. 23:29). 

(c) Pathian ttongkam cu van ihsin leilung ciarter dingih a tlami vur le ruah ti bangtuk a si (Is. 55:10-11). 

(d) Pathian thu cu a hmun ringring a si (Isa. 40:8; Mar.13:31; 1 Pit.1:25).

Pathian in Baibal Ca Thianghlim hi thaw a khum ruangah thiltitheinak huham a nei.

A ttongkam, a thu cu kumkhua in a hmun ringring ding a si. Thiltitheinak huham thawn a khatter ruangah thutak lamzin ah in hruai; zirhsualnak ihsin in luatter; nuncan ziaza a ttha lomi pawl le misual pawl khal kan nun a thlengsak thluh thei. Nitin kan nunnak ah lam in hmuh, lamzin dikah in fehpi. Curuangah zovek minung hrang khalah a ttha bik umsun cabu cu Baibal Ca Thianghlim lawng hi a si. Baibal Ca Thianghlim cu Pathian ih thawkhummi a si ruangah mai’ duh daan ih simfiang dingmi a si lo. Mai’ duhnak lawng lak le bet theih, hlon theih khal a si lo.

3. Pathian ih thu cu mei-inn le tleunak a si.

Saam 119:105 sungah, “Na thu cu ka ke hrangah mei-inn a siih kan lamzin hrangah tleunak a si” tiah kan hmu thei. Mei-inn cu a thimnak hmun ah khua hmu thei dingah vanmi a si. Nitin kan nunnak ah ziang tuah ding thei loin, beidong ih kan um tikah Pathian thu cu kan hrangah mei-inn bangin a vang ih kan fehnak lamzin kha a tleu ter thei a si. Pathian thu cu kan nunnak ah kan hman ringring ding a ttul: “Thukham cabu cu hngilh hrimhrim hlah. A sungih nganmi bangtuk ih na nun theinak dingah a sun a zan in siar ringring aw. Cutin na tuah le na tthangso dingih na tuahmi hmuahhmuah ah na hlawhtling ding a si” (Joshua 1:8).

Thunetnak.

Baibal Thianghlim hi Pathian ih ttongkam a si. Minung hnenih a kuatmi duhdawtnak cakuat a si. Baibal ca kan siar tikah Pathian thinlung kan thei thei. Pathian ih hnattuan daan kan hmu thei. Nitin kan nunnak ih kan zawh dingmi lamzin ding le lamzin dik in hmuh, kumkhua nunnak lamzin in khihhmuh. Vancung ram thuhla fiangzet in in sim. Leilung le a sungih ummi thil ziangkim thu in sim. A sia le a ttha timi thleidan thiam dingah in zirh.

Baibal Thianghlim hi Pathian ih nganmi duhdawtnak ca a si. Cuih a nganmi ca cu Amah rori in thaw a khum ih hmual a nei ter. Cule nitin kan nunnak ah lam palh lo dingin tleunak sungah in fehpi ringring. Baibal ca sungah fimthiamnak, lennak, hlawhtlinnak, pursumnak, tthansonak, pawlkomnak, ramkhelnak tvp. ziangtinkim a um thluh. Pathian ttongkam Baibal Thianghlim cu ret men loin zumnak thawn Pathian sunlawinak hrangah siar ringring dingmi cabu umsun a si.

Duhdawtnak le duhsaknak thawn,

Rev. Dr.CJ Hrang Hmung, PhD.,

Toungphila, Kalaymyo.

August 15, 2015|Saturday|11:00 pm.