KAN SUNGAH THUTAK A UM MAW?

Baibal Caanghril:

“Sualnak kan nei lo kan ti ahcun kanmah le kanmah kan bum aw ih kan sungah thutak a um lo. Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam ding ih kan mawhnak hmuahhmuah a thiangfaiter ding. Asinain sualnak kan tuah lo kan ti ahcun Pathian cu thuphanper ah kan canter ih a thu kan sungah a um lo a si.” (1 Joh. 1:8-10).

Leitlunmi kan zatein misual kan si thluh. A sual lomi zohman kan um lo (Rom 3:23). Cumi cu kan duh le duh lo ah kan cohlang a ttulmi a si. Sikhalsehla kan sungah thutak a simi Jesuh Khrih ih rundamnak co in kan nun in uk ahcun mi luat kan si. Kan sual, kan mawhnak hmuahhmuah ihsin thiangter zomi kan si. Cumi cu kan nunnak in kan tepsuak ngaingai zo maw?

1. Sualnak in zumtu parah thu a nei lo.

Ziangtluk harsazetin kan zuam rero khalle thianghlim in sualnak nei lo ah kan cang thei dah lo ding. Kan nunnak sungah sualnak pakhatkhat a um ringring ko ding. Pathian a thianghlim ruangah amah kan bang thei dah hrimhrim lo ding. Pathian cu sualnak pakhat khat a si lole a borhhlawhmi pakhat khat kha a ngaithiam ringring lo ding. Pathian ah thimnak a um hrimhrim lo (1 Joh. 1:5). Kan sungah sualnak hmasi pakhat, tthat lonak pakhat a um ringring ruangah Bawipa lungkim ter dingah tuah theimi zianghman kan nei lo. 1 Johan 3:9 ah Johan in, “Pathain cangtermi cu sualnak a tuah lo” a ti. Grik ttongah “sualnak a tuah lo” a timi cu siirnak neih hnu ah sualnak sungih tlangleng nawn lo tinak a si. Johan in Pathian ih cangtermi zumtu Khristian cun himi sualnak ah a tlangleng nawn lo tinak a si. Khristian cun thei cingin sualnak sungah a tlangleng ringring lo ding. Sikhalsehla 1 Johan 1:8 ah Khristian pawl cu caan khat hnu caan khat sualnak sungah an thleng ding a si tiah Johan in a sim. Khristian pawlih mihlun cu sualnak a tuah cingcing. Asinain sualnak sungah a pil hlo dah lo.

1 Johan 1:8 le 1 Johan 3:9 hi a dik zetmi a si. 1 Johan 3:9 vekin kannih Khristian pawl cu sualnak ih hrengkhennak ah kan nung lo. Satan cu kanmai’ uktu bawi a si lo ih Jesuh Khrih cu kanmah uktu Bawi a si. Paul in “Kannih cu sualnak ih sal kan si nawn lo” a ti (Rom 6:6). “Sual thu ahcun mithi kan si” a ti (Rom 6:11). Sualnak cu Khristian pawl parah thu a nei thei lo. Sikhalsehla himi thu pawl hi a dik ko nain 1 Johan 1:8 ah kannih Khristian pawl cu sual thei kan nei. Thlemnak thar, sualnak thar pawl cu kan nunnak ihsin cat loin a suak cingcing. Cuih sualnak hrangah ngaidam dil rero ding kan ttul. Cuihsin thianhlimnak kha cohlang ding kan si. Kannih cu vancung ram ah Khrih thawn kan um tik lawngah sualnak nei hrimhrim lomi kan si leh ding a si (1 Joh. 3:6, 9).

2. Pathian hnenah kan sualnak kan phuan a qul. 

Himi 1 Johan 1:9 hi a thupizetmi caang a si. Zumtu pawl telin minung kan zatein sualnak kan tuah thluh. Curuangah minung hmuahhmuah dingfel lonak ihsin luatin thianghlim ternak cat loin kan co ding a ttul. Johan in, “Jesuh ih thiisen in sualnak zatein a kholhfai thluh” (1 Joh. 1:7) a ti ko nain ziangtin a kholhfai a si pei? Kan tuah dingmi pakhat tal a um ve lo maw? Aw a um ko. Ka sualnak pawl siir in sual ngaidamnak kan dil dingih sualnak ihsin kan kirsal a ttul. Cutik lawngah Pathian in kan sualnak pawl a phiatfai sak thluh ding. A ttha lomi tinkim ihsin in thianfai ter ding a si. Cumicu mangbangza thukam makzet pakhat a si.

Curuangah zumtu pawl cu beidong ding a si lo. Kan sualnak ruangah aihram ding cu a si ko (Mat. 5:4). Sikhalsehla thin thanaunak suak ter lo ding a ttul. Kan sualnak ihsin sualthlahnak le thianfainak kan ngahnak ding lamzin pakhat a um ringring. Johan in himi zawnah sual ngaidamnak kan dil ding a ti tikah a sim duhmi kan theifiang ding a ttul. Johan in hi hmun ah sualsiirnak thu a simmi a si. Ka le sualsiirnak lawngin a famkim lo. Kan nun le tuahnak in kan langter a ttul. Sualnak kan huat a ttulih cumi sung ihsin suak ding kan ttul. Cumi lawng hi a dikmi sualsiirnak cu a si. Himi zawnah thil pakhat kan mang sal a ttul. Kan sualnak pawl ngaidam kan dil tikah a hrantein kan sualnak tarlang in ngaidam dil ding a si. “Kei cu misual ka si” ti menin a famkim thei lo. Minung zatein misual kan si ruangah misual ka si ti cu thil olzet a si. Cutin si loin kan tuahmi sualnak pakhat ciar kha zohsal in sualnak pakhat ciar hrangah Pathian hnenin sual ngaidamnak kan dil a ttul. Himi ruangah Johan in sualsiirnak kan tuah a ttul a tinak a si.

Pathian cu thudik a siih dingfelnak thawn a khat fawn. Johan in himi thu ah ziangmi a sim duh? Pathian (Jesuh) cu minung sualnak zate hrangah veikhat tuarin a tuar thluh zo. Amah in kan sualnak man cu Fapa Jesuh Khrih parah a ret thluh. Curuangah Jesuh Khrih a zumtu pawl cu veihnih sual thu a tthensak lo ding. Veihnih sual thu a tthen ahcun a dingfel a si, kan ti thei nawn lo ding. Jesuh Khrih in kan sualnak hrangah a tuar thluh zo. Curuangah Pathian in kan sual thu a tthen nawn lo ding. Kannih cu sualthlahnak kan co ih in thiangfai ter ding a si. Bawipa in kan sual thu a tthen lala ahcun amah cu thudik le dingfelmi a si thei lo ding (Rom 3:22-26).

3. Pathian cu thuphanper ah kan canter pang maw?

Mihrekkhat in sualnak kan nei lo, an ti ttheu. Cutin a titu pawlcu Pathian a bumtu pawl an si. Ziangahtile Pathian in minung hmuahhmuah sualnak an nei thluh, a ti ruangah a si (Rom 3:10-12). Minung pawl cu sualnak an nei ruangah Pathian in amah rundam dingah Jesuh Khrih a thlah hngai. Minung in sualnak a neih lo ahcun Jesuh Khrih thlah a ttul lo ding. Curuangah sualnak ka nei lo a titu pawl cu Pathian Thu hi a palh a si, a titu an si. Amah sual tlen dingih a rung ttummi Khrih timi Pathian ih Thu a el tinak a si. Cuvek minung pawlih nunnak ah Pathian Thu a simi Pathian ih Fapa hrangah hmun a um thei lo.

Minung hmuahhmuah in sualnak a nei thluh timi cu amai’ thinlung sungah a theifiang tuk. Pathian in kan thinlung a theifiang thluh ruangah kan thinlung ih sualnak thu kha a sim. Pathian in kanmah hnenah thu a sim caan ah a thu kan ngai ding a ttul. Bawipai’ Thu cu kan dawnkham hrimhrim lo ding. Bawipai’ Thu kha kan thinlung sungah lut thei lo dingin kan thinlung sangka kan khar thluh ahcun Pathian kha kan nunnak ih lenglam ah kan ret tinak a si.

Thunetnak

Mi tampi in sualnak ka nei lo kan ti ttheu. Cumi cu kanmah le kanmah kan bum aw ih kan sungah thutak a um lo tinak a si. Misual ka si ti thei awin Pathian hnenah kan sualnak kan phuan ahcun zumtlak le a dingmi a si. Curuangah Pathian in kan sualnak in ngaidam ding ih kan mawhnak hmuahhmuah a thiangfaiter ding. Sualnak ka tuah lo kan ti ahcun Pathian cu thuphanper ah kan canter pang ding phan a um. Kan sungah thutak a simi Jesuh Khrih a um taktak maw? Kan sungah thutak a um ahcun misual kan sizia kan fiang aw ringring thei ding a si.

Duhdawtnak le duhsaknak thawn,

Rev. Dr. CJ Hrang Hmung, PhD.,
Toungphila, Kalaymyo.
August 9, 2015|Sunday|2:00 pm.