JOHAN IH SIMMI DUHDAWTNAK

Baibal Caanghril:

“Pathian kan duhdawt cu amah ih in duhdawt hmaisa ruangah a si. Zokhal Pathian ka duhdaw ticing in a unau a huatu cu thuphanper a si. Ziangahtile a mit in a hmuhmi a unau hman a duhdawt lo a si ahcun a hmu lomi Pathian cu a duhdaw thei hrimhrim lo ding. Khrih ih in pekmi thukham cu hiti in a si: zokhal Pathian a duhdawttu cun a unau khal a duhdaw ve ding.” 

(1 Joh. 4:19-21).

Thuthoknak

2015 kum July 25 ni ihsin thokin nitin ruah a sur phah rero. Cuih ruah cu cawl loin zarhkhat sung a sur rero tikah Chin ram Hakha, Falam, Paletwa ah lei a min ih inn tampi a tluk. Lamzin pawl a siatsuah thluh. Kawlram sung ramtthen 14 sungah ramtthen 11 in buainak kan tong cio. Lairawn khuapi Kalaymyo khal ruah a tam tuk ruangah kum 60 sung a veikhatnak nasazet in ti a lik ih mi tampi harsatnak an tong. Kalaymyo le Chin state pehzomnak lamzin, lilawn pawl a siat thluh. Hiti ih harsat mangbang in caan kan hman lai ah minung pakhat le pakhat kan duhdawtnak, kan zawnruahnak pawl hi a langfiang nasa. Mihrek cun kei ka tuar ve lo pam tiin a um san mentu an um. Mi tampi cun ka minungpi pawl harsatnak an tongmi parah ziangtin ka bawm thei ding, ti ruatin anmah le titheitawk in an cangvai ih an bawm rero. Kan minungpi parih kan duhdawtnak hi hivek caan ah fiangzetin kan hmu thei. Johan cakuat pakhatnak sungah Johan in kan minungpi parih duhdawtnak kan neih daan ding pawl simfiangnak a nei a si.

1. Pathian in in duhdawt hmaisa. 

Pathian kan duhdawt kan timi hi Amah in in duhdawt hmaisa ruangah a si ti cu a fiangzet. Thukham pahra sungah minung in a Pathian le a innhnen a duhdawt ding timi a um ko nain Pathian in in duhdawt hmaisa ruangah a si timi dinhmun tiang a thleng deuh lo. Pathian ih duhdawtnak kan tep theinak dingah Pathian ih dingfelnak le a duhdawtnak kha kan theifiang hmaisa a ttul. Pathian ih duhdawtnak cu a lamdang duhdawtnak a siih mangbangza duhdawtnak a si fawn. Minung ih kan ruahban theimi duhdawtnak phun a si fawn lo. Lei tisa duhnak vekih a nungtu hnenah a thianghlimmi Thlarau lam duhdawtnak a um thei lo. Pathian in kan thinlung sungah a dikmi duhdawtnak in pek lo a si ahcun duhdawtnak dik kan nei thei dah lo ding (Rom 5:5). Pathian in in duhdawt ih a Thlarau Thianghlim in pek ruangah Amah le midang pawl kan duhdawt theinak a si (Rom 5:8; 1 Joh. 4:10-11).

2. Pathian a duhdawtu cun a unau a duhdawt ding. 

Pathian kan duhdawtnak le midang parih kan duhdawtnak hi tthen dingmi a si lo. Pathian kan duhdawt taktak ahcun Pathian ih sersiammi minung pawl kan duhdawt ding a si. Minung in amah le amah a duhdawt vekin midang khal duhdawt dingmi a si. Cuticun Pathian khal kan duhdawt ti cu a langfiang thei ding. Phun dang in kan sim a sile Pathian duhdawt ding cu a ol kan ti thei. Pathian cu Thlarau a si. Kannih minung pawlin Pathian kan hmu thei lo. A aw khal kan thei thei lo. Curuangah Pathian ka duhdawt tiah ol tein sim theih a si. Sikhalsehla minung duhdawt timi cu a dangpi in a um. Minung pawl cun harsatnak in pe thei. Kan ral ah an cang thei. Kan thin in heng ter thei. Cuih kan minungpi pawl duhdawt ding timi cu a ol lozetmi a si. Curuangah Pathian cu kan duhdawt ko nain kan minungpi pawl cu kan duhdawt thei ttheu lonak a si.

Asinain kan minungpi pawl duhdawt loin Pathian ka duhdawt kan timi cu thuphanper a si, tiah Johan in a ti (1 Joh. 2:4). Ziangahtile minung kan duhdawt tik lawngah Pathian kan duhdawt a si timi langternak tetti a si. Kan minungpi parah kan duhdawtnak kan langter thei ahcun Pathian kan duhdawt ti a lang ve mai ding. Kan minungpi kan duhdawt lo ahcun Pathian kan duhdawt thei lo ding. Minung kan zatein Pathian ih hmuihmel vekin sersiammi kan si thluh (Seem. 1:27). Curuangah minung kan zate sungah Pathian ih sinak pakhat ciar a um thluh. Pathian hmuihmel a cuangmi le kan hmu theimi minung pawl kan duhdawt lo ahcun Pathian kan duhdawt thei lo ding ti a fiang tuk. Ziangahtile kan hmu theimi kan minungpi kan duhdawt lo ruangah a si.

Himi kan minungpi kan duhdawt thei lo thu kan fiang ahcun Pathian duhdawt ding timi hi thil ol a si lozia kan hmu thei ko ding. Thungai kan sim a sile Pathian kan duhdawt taktak timi cu leitlun ah dinhmun sangbik, a thupibik le a harbikmi hnattuan pakhat a si. Curuangah Pathian ziangtin kan duhdawt thei pei? Pathian in a duhdawtnak cu kan thinlung sungah a burh ruangah kan duhdawt theinak a si (1 Joh. 4:19). Kanmai’ duhdawtnak thawn kan duhdawt si loin Amai’ duhdawtnak thawn kan duhdawt sawn a si.

3. Kan unau kan duhdawt cio pei. 

Pathian ih sersiammi minung pawl pakhat le pakhat do aw rero dingmi kan si lo. Kan zum daan, kan ruah daan, kan hmuh daan a bang lo aw lo ruang khalah do aw rero dingmi kan si lo. Ziangahtile kanmah le sinak cio in mai’ duhnak vekih hril theinak covo kan nei. Cumi hnakin Pathian hmuihmel kengih sersiammi kan si ruangah pakhat le pakhat duhdawtnak nei ding kan thinlung sungah kan zuat sawn ding a thupi (Mar 12:30-31; Joh. 13:34; 1 Joh. 3:23). Duhdawtnak in ziangkim a neh thei. Duhdawtnak in ziangkim a tuah tthat thei.

Thunetnak.

Pathian ka duhdawt a ti awtu mi piangthar pawl, kan unau kan minungpi duhdawt lotu kan si pang maw? Midang parih kan neihmi kan duhdawtnak kha zoh awk sal in Pathian hmaiah thuphan a pertu kan si lo ding hi a thupi ngaingai. Pathian kan duhdawt timi langter dingah kan minungpi, kan unau pawl kha thinlung tak in kan duhdawt cio ding a ttul a si.

Duhdawtnak le duhsaknak thawn,

Rev. Dr. CJ Hrang Hmung, PhD.,
Toungphila, Kalaymyo.
August 1, 2015|Saturday|11:00 pm.