Baibal Caanghril:
“Nupi tthatthum khi ziangtluk in ngah a har! Ruby lungvar mankhung hnakin man a nei deuh!” (Thuf. 31:10).
Baibal siarbet: Thuf. 31:10-31
Thuhmaihruai
Tuni hi leitlun Nu Ni a si. Nu ni ah kanmah le kan nu ciar kan mang cio ko ding. Nu le pa um lo sehla hi leitlun ah kan seem lo ding. Nu nih in pai lo sehla leitlun ah nunnak caan kan nei thei lo ding. Leitlun ah minung pakhat sinak in kan nunnak ding hrangah Nu in a nunnak uimi zianghman nei loin a thap aw thluh ruangah leitlun ah duh tawkin kan tlangleng theinak a si. Nu kan nei cio ih anmah thuanthu cio cu relnuam, ngainuam kan ti cio ko ding. Nu ni ah Nu sunloihnak ca a phunphun, qongkam a phunphun, biazai a phunphun le hla a phunphun thawn kan cawimawi cio. Kei khal Nu ni ah ka ciing ban tawk ka nu ih thuhla pawl kha Nu ni ah a tawinak in ka tarlang ve ding.
1. Zirhtu Nu a si.
Faate pawl nun zirh hmaisabiktu cu Nu a si. Mi zovek khal Nu thawn caan saubik kan um tlang. Nu hnen ihsin ziangkim kan zir. Tuisan fimthiamnak a sangzet zo ko nain nu ih dinhmun le sinak hi a thupibik ringring thotho. Ka nauhak laiah ka nu in zantin Baibal zohlo in siar ter; Hymn hla pawl in zirh; Baibal thuanthu pawl in sim. Nuncan ziaza ttha dingin a thiam tawkin a phunphun in zirh ringring. Ca thiam theinak ding hrangah a thiamtawk in ca in zirh; ca zoh in khawngih in kil. Curuangah ka nu a um nawn lo hnu khalah keimah tawktein hla tampi ka thiam; Baibal thuhla tampi ka thei. Ca khal keimah tawktein ka zir ngah vivo. Ka nu in caan tawite a nun sung zirhnak lamah nasazet in in cawmdawl lo ta sehla tuini ka dinhmun ka thleng lo ding. Pangpar human dum tuahtu in a hmuandum a mawi theinak dingah pangpar kung pawl tthetein a tuamhlawm, a zoh ringring vekin ka nu in a nunnak caan tawite sungah faate unau pa nga cu amah ti theitawk in in cawmdawl, in zirh, nun in sim. Curuangah kan unauza in kanmah le kan sinak cio ah pitling in kan um thluh thei a si.
2. Thlacam ringringtu Nu a si.
Ka nu in dampi hi a caan a rei lo. Amah kum 31 a kim ah Falam peng Vaar lilawn ah motor tuahmawhnak tongin Pathian hnenah in fehsan. Faate unau pa 5 in tanta. Kan unau 5 hi a cang theitawkin in tuamhlawm, in duhdawt. Culawng si loin ka theiban tawkah ka nu hi faate pawl hrangah thlaza in camsak ringring. A caan a neih pohah faate pawl kilkhawinak hrangah thlaza a cam ringring. Curuangah ka nu ih thlacamnak thawngin tuini kan unau 5 tein Pathian thu sungah kan um thluh thei a si, tiah ka zum ih ka pommi a si.
3. Awkaa nemtein a ttong ttheutu Nu a si.
Kan nauhak laiah kanmah tawkin kan huatsuak zet ve. Innsang ah harsazet in kan um ruangah tuah lo dingmi thil kan tuahmi tampi a um. Cuvek caan ah ka nu in awkaa hrangzet in in kawk ka thei dah lo. Awkaa nemte a hmangin ttongkam thlumte thawn nun in sim ttheu. Kei hi unau lakah upabik ka si ruangah ka nu ih kawk tuar bik ka siih cutin in kawk tik khalah ttongkam hrangzet a hmang dah lo. Awkaa nemte thawn nun in zirh ttheu kha k acing ringring lai. Ka nu thuhla in simtu pawlin ka nu hi a nun a nemih ttongkam siava thawn mi siatsuahnak khal a tuah dah lo tiah an rel tam ka thei.
4. Tirh a siangzet.
Kan nauhak lai ah kan farah, kan zonzai ngaingai. Cutin kanmah hman harsa lai lakah kanmah hnakih a harsa sawnmi sungkhat unau pawl hrangah tirh a siangzet. Kanmah faa le pawl ei ding umsun te khal midang hrangah a pe siang. Veikhat veihnih cu rilrawng ih kan um caan ka ciing lai. Kan hnihpuan neihsun khal farah zonzai pawl pe ding a siangzet. Kanmah sawn zianghman nei loin kan um ttheu.
5. Ca a siarzet.
Ka ciing ban tawkah ka nu hi ummen in caan a cemter dah lo. Casiar in a um ringring ttheu. Baibal a siar, hla a sak, thuanthu cabu pawl a siar. Cuih a siarmi pawl cu zan tikah kan unauza in simsal ringring. Cutin ca a siarzet ruangah sim ding khal tampi a nei ringring.
6. Hlasak a paih zet.
Ka nu hi Solfa a thiam zet. Hla lam khal a paih ngaingai. Curuangah ka pa hnattuanpi Pastor pakhat thawn khal an san laiah hla tampi an khum dah in ka thei. Solfa thawn nganmi a hla cabu khal ka hmu dah. Kawhhran ih hlasaknak le hlazirnak tinkim ah a tel ringring ih a cang theitawk in hla a sak ringring hi ka mitthlam ah a cuang lai.
Thunetnak.
A tlunih ka tarlangmi pawl siar lo thuhla dang tampi ka ciingmi a um lai nain hivial in ka tawp ta ding. Ziang a vasi khalle ka nu a um laiah kan inn hi innsia te a si ko nain leitlun ah a nuambik inn tiah ka ruat dahmi a si. Nu-ei kan tuar hnu ahcun innsang nomnak ka tep ngah nawn lo. Ka nu in leitlun nunnak caan tawite a um sungah faate pawl hrangah amah titheitawk in in tuamhlawm, in cawmdawl, in zirh ruangah tuni kan unauza in kanmah le umnak ah kanmah tawkin Pathian thluasuah kan dong nasa. Curuangah Hringtu Nu sunloihni ah Duhdawttu Ka nu ih thuhla thawn ka hlawm duh ve mi a si.
HRINGTU NU zate himi cahram thawn upatnak ka pek. Nu zate parah Pathian thluasuah cat lo in hmun camcin ko seh!
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
May 10, 2015|Sunday|3:00 pm (Mother's Day).
“Nupi tthatthum khi ziangtluk in ngah a har! Ruby lungvar mankhung hnakin man a nei deuh!” (Thuf. 31:10).
Baibal siarbet: Thuf. 31:10-31
Thuhmaihruai
Tuni hi leitlun Nu Ni a si. Nu ni ah kanmah le kan nu ciar kan mang cio ko ding. Nu le pa um lo sehla hi leitlun ah kan seem lo ding. Nu nih in pai lo sehla leitlun ah nunnak caan kan nei thei lo ding. Leitlun ah minung pakhat sinak in kan nunnak ding hrangah Nu in a nunnak uimi zianghman nei loin a thap aw thluh ruangah leitlun ah duh tawkin kan tlangleng theinak a si. Nu kan nei cio ih anmah thuanthu cio cu relnuam, ngainuam kan ti cio ko ding. Nu ni ah Nu sunloihnak ca a phunphun, qongkam a phunphun, biazai a phunphun le hla a phunphun thawn kan cawimawi cio. Kei khal Nu ni ah ka ciing ban tawk ka nu ih thuhla pawl kha Nu ni ah a tawinak in ka tarlang ve ding.
1. Zirhtu Nu a si.
Faate pawl nun zirh hmaisabiktu cu Nu a si. Mi zovek khal Nu thawn caan saubik kan um tlang. Nu hnen ihsin ziangkim kan zir. Tuisan fimthiamnak a sangzet zo ko nain nu ih dinhmun le sinak hi a thupibik ringring thotho. Ka nauhak laiah ka nu in zantin Baibal zohlo in siar ter; Hymn hla pawl in zirh; Baibal thuanthu pawl in sim. Nuncan ziaza ttha dingin a thiam tawkin a phunphun in zirh ringring. Ca thiam theinak ding hrangah a thiamtawk in ca in zirh; ca zoh in khawngih in kil. Curuangah ka nu a um nawn lo hnu khalah keimah tawktein hla tampi ka thiam; Baibal thuhla tampi ka thei. Ca khal keimah tawktein ka zir ngah vivo. Ka nu in caan tawite a nun sung zirhnak lamah nasazet in in cawmdawl lo ta sehla tuini ka dinhmun ka thleng lo ding. Pangpar human dum tuahtu in a hmuandum a mawi theinak dingah pangpar kung pawl tthetein a tuamhlawm, a zoh ringring vekin ka nu in a nunnak caan tawite sungah faate unau pa nga cu amah ti theitawk in in cawmdawl, in zirh, nun in sim. Curuangah kan unauza in kanmah le kan sinak cio ah pitling in kan um thluh thei a si.
2. Thlacam ringringtu Nu a si.
Ka nu in dampi hi a caan a rei lo. Amah kum 31 a kim ah Falam peng Vaar lilawn ah motor tuahmawhnak tongin Pathian hnenah in fehsan. Faate unau pa 5 in tanta. Kan unau 5 hi a cang theitawkin in tuamhlawm, in duhdawt. Culawng si loin ka theiban tawkah ka nu hi faate pawl hrangah thlaza in camsak ringring. A caan a neih pohah faate pawl kilkhawinak hrangah thlaza a cam ringring. Curuangah ka nu ih thlacamnak thawngin tuini kan unau 5 tein Pathian thu sungah kan um thluh thei a si, tiah ka zum ih ka pommi a si.
3. Awkaa nemtein a ttong ttheutu Nu a si.
Kan nauhak laiah kanmah tawkin kan huatsuak zet ve. Innsang ah harsazet in kan um ruangah tuah lo dingmi thil kan tuahmi tampi a um. Cuvek caan ah ka nu in awkaa hrangzet in in kawk ka thei dah lo. Awkaa nemte a hmangin ttongkam thlumte thawn nun in sim ttheu. Kei hi unau lakah upabik ka si ruangah ka nu ih kawk tuar bik ka siih cutin in kawk tik khalah ttongkam hrangzet a hmang dah lo. Awkaa nemte thawn nun in zirh ttheu kha k acing ringring lai. Ka nu thuhla in simtu pawlin ka nu hi a nun a nemih ttongkam siava thawn mi siatsuahnak khal a tuah dah lo tiah an rel tam ka thei.
4. Tirh a siangzet.
Kan nauhak lai ah kan farah, kan zonzai ngaingai. Cutin kanmah hman harsa lai lakah kanmah hnakih a harsa sawnmi sungkhat unau pawl hrangah tirh a siangzet. Kanmah faa le pawl ei ding umsun te khal midang hrangah a pe siang. Veikhat veihnih cu rilrawng ih kan um caan ka ciing lai. Kan hnihpuan neihsun khal farah zonzai pawl pe ding a siangzet. Kanmah sawn zianghman nei loin kan um ttheu.
5. Ca a siarzet.
Ka ciing ban tawkah ka nu hi ummen in caan a cemter dah lo. Casiar in a um ringring ttheu. Baibal a siar, hla a sak, thuanthu cabu pawl a siar. Cuih a siarmi pawl cu zan tikah kan unauza in simsal ringring. Cutin ca a siarzet ruangah sim ding khal tampi a nei ringring.
6. Hlasak a paih zet.
Ka nu hi Solfa a thiam zet. Hla lam khal a paih ngaingai. Curuangah ka pa hnattuanpi Pastor pakhat thawn khal an san laiah hla tampi an khum dah in ka thei. Solfa thawn nganmi a hla cabu khal ka hmu dah. Kawhhran ih hlasaknak le hlazirnak tinkim ah a tel ringring ih a cang theitawk in hla a sak ringring hi ka mitthlam ah a cuang lai.
Thunetnak.
A tlunih ka tarlangmi pawl siar lo thuhla dang tampi ka ciingmi a um lai nain hivial in ka tawp ta ding. Ziang a vasi khalle ka nu a um laiah kan inn hi innsia te a si ko nain leitlun ah a nuambik inn tiah ka ruat dahmi a si. Nu-ei kan tuar hnu ahcun innsang nomnak ka tep ngah nawn lo. Ka nu in leitlun nunnak caan tawite a um sungah faate pawl hrangah amah titheitawk in in tuamhlawm, in cawmdawl, in zirh ruangah tuni kan unauza in kanmah le umnak ah kanmah tawkin Pathian thluasuah kan dong nasa. Curuangah Hringtu Nu sunloihni ah Duhdawttu Ka nu ih thuhla thawn ka hlawm duh ve mi a si.
HRINGTU NU zate himi cahram thawn upatnak ka pek. Nu zate parah Pathian thluasuah cat lo in hmun camcin ko seh!
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
May 10, 2015|Sunday|3:00 pm (Mother's Day).
No comments:
Post a Comment