“Khuimiso Bawipa
in a duh sawn? Amah ih thu thlun maw, a si lole saserh peknak le thawinak so?
Tuu a ṭha bikmi thawn a hnenih raithawi hnakin
amah ih thu thlun cu a ṭha sawn a si. Amah dodal
cu polsia dawihmang tlukin a ṭha lo a si,” (1
Sam. 15:22).
Minung hi
Pathian hmuihmel kengih sersiammi kan si. Pathian duhmi cu a thupek vekih thlun
hi a si. Eve le Adam in Pathian thupek an thlun lo ruangah Eden hmuan ihsin a
dawi (Seem. 3:22-24). Zumtu kan nunnak ah kan theihmi le kan simmi ziangtluk tam
hman sehla Pathian ih duhmi cu a thupek thlun hi a si sawn. A thu theih le sim
hi a thupi zet vekin nunpi ding hi a thupi sinsin. Thei le sim lawng si loin
nunpi ding hi kan ṭulmi a si. Pathian thupek a
thluntu pawl ih nun ah Pathian in nasa zetin hna a ṭuan
timi cu Baibal sungah kan hmu theimi a si. Thupek thlun ih nun hi a thupi zet.
Thupek thlun ih a nungtu pawl cu ziangvek an si timi thu tampi sungin ṭhenkhat pawlih an ngahmi cu a tanglam vekin kan zoh
tlang ding.
1. Himnak a si.
Pathian in Noah
hnenah lawng tuah dingin a fial. Noah in Bawipa ih thupekmi vek cekci in a tuah
ṭheh (Seem. 7:5). Noah cun Pathian hnenah
ziangruangah, ziangtin, a cang thei ding maw, tivek pawl a sut hrimhrim lo.
Pathian thupek thlunin a tuah thluh. Lawng tuah a ṭheh
hnu khalah Pathian thupek thlunin lawng sungah an lut (Seem. 7:16). Noah in
Pathian thupek a thlun ruangah tilik ih siatsuahnak ihsin Noah le amah thawn
lawng sungih a ummi lawng an him a si. Pathian thu hi kan himnak ṭhabik a si. Pathian thupek thlun hi himnak a si.
Minung in kanmah tein kan humhim awk thei lo. Pathian thupek vekih kan nung tik
lawngah harsatnak le buainak tampi um hman sehla himnak a um a si.
2. Khua kulhnak hruang a cimter thluh.
Jerikho khua
kulhnak ralhruang hi a khohkhah zetmi a siih olte’n cim thei dingmi a si lo.
Joshua le Israel mi pawl in Pathian thupek thlun in Jerikho kha vel ding a ti
zat an vel. Pathian ih fialmi vekin an tuah tikah Jerikho khua kulhnak
ralhruang cu a cim rupri (Josh. 6:8-20). Jerikho kulh hi nunung cahnak le
hriamhrei tel riai loin Pathian thu in a kutcak ruangah a cim rupri mai a si.
Minung cahnak le thiamnak ziangtluk mak hman sehla Pathian thupek hi a thupi
sawn. Cim thei dah lo dingih an ruahmi khua kulhnak hruang cu Pathian thupek
thlun ih an tuah tikah a cim thluh theinak a si. Nehtu taktak cu Pathian ih
huham le cahnak ruangah a si.
3. Hlawhtlinnak a si.
Simon (Piter) hi
ngakai a si vekin sur vorh le ngakai daan cu a thiam lawlaw. Sikhalsehla Simon
hnenah Jesuh in Gennesaret Tili ti thuknak lamah sur vorh dingin a fial. Simon
in, “Bawipa, taima zetin zanvarte kan vorh nain zianghman kan awk lo.
Sikhalsela vorh uh, in ti a si ahcun kan vorh a si pei cu,” a ti. Sur cu an vun
vorh ih nga ngaingai an awk ih an sur tiang a tlek ṭheh
zik (Luk. 5:4-8). Sur ka vorh ringringnak hmun a si, nang ih fial ka ṭul lo tiah Simon in a el lo. “Vorh uh in ti a si
ahcun kan vorh si pei cu,” a tiih zanvarte an vorhnak hmun a kel ahcun a vun
vorh mai. Bawipai’ thupek thlunnak ruangah hlawhtling nawn lo tiih an ruat zo
nain an ruah ban lomi thluasuah tampi an dong thei leh a si.
Thunetnak.
Pathian thu hi
hna lawngih theih men dingmi a si lo. A thupekmi vekin thlun ih nunpi tengteng
dingmi a si. Kanmai’ thuthu in kan nung ih kanmai’ duhnak vekin nung dingmi kan
si lo. Noah vekin Pathian thupek vekin kan thlun ahcun kan himnak a si. Joshua
le Israel mipi vekin Pathian thupek vekin kan thlun ahcun thil cang thei lo
dingih ruahmi khal olte’n a cim thei mai a si. Simon vekin Pathian thupek thlun
ih kan nung ahcun kan hlawhtling ding. Nun tel lo kaa le hna lawngih sim le
theihnak ah Pathian a lungawi lo ding. Kaa in kan sim, hna in kan theimi vekin
kan nun ah nunpi ding hi a thupi ngaingai a si. Curuangah Samuel in, “Khuimiso
Bawipa in a duh sawn? Amah ih thu thlun maw, a si lole saserh peknak le
thawinak so? Tuu a ṭha bikmi thawn a hnenih
raithawi hnakin amah ih thu thlun cu a ṭha sawn
a si. Amah dodal cu polsia dawihmang tlukin a ṭha
lo a si,” a tinak a si.
~Rev. Dr. Hrang Hmung, D.Min., Ph.D.,
Toungphila, Kalaymyo.
March 4, 2017|Saturday|11:00pm.
No comments:
Post a Comment