Cutiin a si ruangah nan sualnak cu
pakhat le pakhat hnenah phuang ton aw uhla thlacam ton aw uh; cutiin harhdamnk
nan ngah ding. Miding ih thlacamnak cu a cakzet ih hmual a nei a si (Jeim
5:16).
Thlacamnak thu cu zumtu kan zatein
kan thei thluh. Baibal ih simmi thlacamnak cu Pathian thawn pehzom awk hi a si.
Pathian hnenah kan ṭulmi
pawl dilnak khal a si. Zumtu pakhat cu thlacamnak le Baibal siarnak thawn cat
loin caan kan hmang a ṭul. Cumi cu kan thlarau rawl thawbik a si. Mi zovek khalin
kan thlacammi vekin kim thluh sehla kan duh cio. Kan duhmi kim theinak dingah
thlacamnak ti hi a rasuakmi a si, kan ti le a palh lo ding. Kan thlacammi
sungah zovek, ziangvek thlacam hi Pathian in a let timi kan theifiang a ṭul. Jeim cun, “Mi dingih thlacamnak cu a cakzet ih hmual a
nei a si,” tiah a sim (Jeim 5:16b). A sile “miding’ timi cu ziangvek mi an siih
ziangruangah an thlacamnak hi hmual a nei thei, timi kha kan thei a ṭul.
1. Pakhat le pakhat hnenah sualnak phuang ton-aw.
“Miding” timi thu ah Pathian ih hmuh
daan le minung ih hmuh daan a bang aw lo ding. Miding timi cu sualnak a tuah dah
lomi, nuncan ziaza ṭhazet
ih a ummi, rinsan a tlakmi tvp. tahfung a phunphun kan retih a tlingmi pawl
tiah minung in kan ruat. Sikhalsehla Pathian in miding a timi cu sualnak tuah
dah lomi a si lo, a tuahmi sualnak kha siir aw in sual ngaidamnak a dil theitu
sawn a si. Bawi Jesuh in Farasi le Siahkhongtu tahṭhimnak thawn a fiang termi kan hmu thei (Luk. 18:9-14). Curuangah
thla kan cam tikah kan sualnak pawl Pathian hmaiah phuang aw ding hi a thupi
ngaingai. Baibal sung ah thlacamnak hi sual ngaidam dilnak thawn a fehtlang
ringring tiah kan hmu thei. Thla kan cam hlanah sualnak phung in ngaidam dil
ding hi a thupi zet. Bawipai’ Thlacam in zirhmi sung khalah sual ngaidamnak thu
a tel (Mat 6:12). Jeim khalin pakhat le pakhat hnenah sualnak phuang ton-aw ding
a thupizia a lang ter a si. Sualnak kan tuahmi kha phuang ton-aw a ngamtu cu
miding tiah kan ti thei ding a si.
2. Pakhat le pakhat hnenah thlacam ton-aw.
Thla kan cam tikah mai’ hrang lawng
cam loin midang thawn pakhat le pakhat hnenah thlacam ton-aw hi a thupi zet.
Pathian in midang hrangih thlacamsak hi a duh zet (Joh. 17). Baibal sung kan
zoh tikah “Pathian mi” pawl cun midang hrangah an dinpi ṭheu tiah kan hmu thei. Tidai a toihtu cu Pathian in ṭuanman a pe ding a si (1 Kor. 3:8). Midang hrangah ziang
dang kan tuahsak thei lo hmanah thla kan camsak thei. Miding timi cu mah hrang
lawng ruatih tuah le dil loin midang hrangah a dinpi theitu si ding a ṭul. Zumtu tampi cu mah hrang thlacam ding hman in caan kan
pe thei lo. Mah hrang hman thla kan cam man lo tikah midang hrang thlacam ding
timi cu a ol lo zetmi a si. Curuangah miding cun mai’ hrang lawng ruat loin
midang hrang thupi ah retin pakhat le pakhat hnenah thlacam ton-aw ding a thupi
zet a si. Cutin thla a cam tikah a cak zetih hmual a nei zet ding a si.
3. Miding cu kanmah bangtuk milai a si.
Miding kan ti tikah phundang zetin
kan ruat ṭheu.
Sikhalsehla kanmah bangtuk milai an si, tiah Baibal in a sim. Jeim in, “Elijah cu kanmah bangtuk milai a si
ko. Sikhalsehla ruah sur lo dingin taimak suah in thla a cam ih an ram ah kum thum le a hrek sung ruah a sur lo. Cuih
hnuah thla a camsal ih ruah a sursal. Cutiin leilung in ti le rawl a suahsal,”
a ti (Jeim 5:17-18). Himi thu kan zoh tikah miding tiah kan ruahmi Elijah hi
phundang zet a si cuang lo, kanmah bangtuk milai a sizia kan hmu thei. Pathian
in miding a timi pawl hi phundang zetih sersiammi an si cuang lo. Kanmah
bangtuk milai an si thluh. Kan sim zo vekin miding timi cu sualnak tuah dah lomi
a si lo, a tuahmi sualnak kha siir aw in Pathian hnenah sual ngaidamnak a dil
theitu pawl an si sawn.
Thunetnak.
David ih nun kan zoh tikah a famkim
lozia kan hmu ko ding. Sikhalsehla Pathian hmaiah rinsantlak le dingfel zetin a
nung, Pathian duhdawtnak cat loin a co (1 Siang. 3:6). Kannih khal Pathian
hmaiah kan sinak phuang in kan um ahcun in cohlang thei ringring a si. Jeim in,
“Cutiin a si ruangah nan sualnak cu pakhat le pakhat hnenah phuang ton aw uhla thlacam
ton aw uh; cutiin harhdamnk nan ngah ding. Miding ih thlacamnak cu a cakzet ih
hmual a nei a si,” a timi zumtu hrangah thazaang tumpi a si (Jeim 5:16).
~Rev. Dr. Hrang Hmung, D.Min., Ph.D.,
Toungphila, Kalaymyo.
June 3, 2017|Saturday|9:20pm
No comments:
Post a Comment