PATHIAN HNENAH KIRSAL DINGIN

“Mi senpi in thil ṭha lo an tuah ruangah Pathian hnenah an kirnak ding a kham. An thinlung ah hlawhhlang ṭuan duhnak a khat ih Bawipa an thei nawn lo” (Hosea 5:4).

Leitlun minung pawl kan sualnak ruangah Pathian thawn pehzomnak a siat thluh. Sikhalsehla Pathian in a hmuihmel kengih sersiammi minung pawl thawn pawlkomnak nei theisal dingah Jesuh Khrih thawngin leitlun ah a rung ṭum. Mi hmuahhmuah a hnenah kirsal ter a duh ruangah a si. Fapa tlanhlo thu kan zoh tikah fapa nauta sawn cu a pa inn ihsin a suak vetein harsatnak phunkim a tuar. Pa thawn a hlatnak hmun ah a ruahvekin a ol lo ih a netnak ah tangtabik tiang a thleng (Luk. 15:11-32). Curuangah Pathian in amah thawn a hlatnak ih umtu harsatnak phunkim lakih a tlanglengtu pawl kha kir sal dingin a sawm rero. Cutin a sile Pathian hnenah ziangtin kan kir sal ding? Mi hrek cu an kirsal duh ko nain ziangrungah an kirsal thei lo timi thu hi Baibal ah fiangtein a sim a si.

1. Pathian an thei nawn lo ruangah.

Tuini zumtu tampi cu an thinlung taktak in Pathian a thei ngingai lo. Nu le pa, sungkhat, rualpi pawl hi zumtu an si ruangah Pathian thei ding a theih lo. Thei theinak dingih a bawmtu men lawng an si. Pathian cu mah rori thawn tongtham ih thinlung sungah kan cohlang thei tik lawngah Pathian kan thei thei ding a si. Pathian cu kan thinlung zate thawn kan zum taktak lawngah amah kan thei thei ding. Pathian kan thei taktak mawn ti hi mah le mah kan cekfel awk a ṭul thlang a si.

2. Thil ṭha lo an tuah ruangah.

Thil ṭha lo kan tuahmi pawl lakah Pathian ih duh lomi thil kan tuah ringring ahcun Pathian hnenah kan kirsal thei nawn lo ding. Fapa nautasawn thu kan zoh tikah a sualpalhnak thu a theih ve tein cuih hmun ah riahsia in a um rero men lo. A umnak hmun ihsin a tho vurvo ruangah a pa hnenah a thleng thei a si. Cuvekin kan tuah kel sualnak, Pathian duh lomi pawl kha sirnak thawn hlon thluh hnu lawngah Pathian hnenah kan kir thei ding a si. Curuangah tuini kan nunnak ah Pathian duh lomi, kan tuah kel ziang a um? Cumi pawl kha cawl ter ding a cu thlang. Cu lo ahcun Pathian ih pekmi luatnak kan co thei dah lo ding. Mi tampi cu biakinn ah kan feh nain luatnak kan ngah thei lo. Biakinn ah kan ra ko nain Pthian hnenah kan ra lo ruangah a si. Biaknak in luatnak in pe thei lo. Pathian hnaṭuantu pawlin kan thilrit an zang ter thei lo ding. Jesuh Pathian hnen kan pan tik lawngah kan phurrit a zang ding a si.

3. Hlawhhlang ṭuan duhnak ruangah.

Pathian kan thei tiah kan ruat aw ko nain kan thinlung put cu hlawhhlang lungput a siih tisa hiarnak thawn a khat ringring. Bawipa in fiangten a sim ko… An thinlung ah hlawhhlang ṭuan duhnak a khat ih Bawipa an thei nawn lo a ti. Kan thilung a thianghlim tikah kan Pathian thu sungah kan ṭhanglian thei ding. Mi tampi Pathian hnen kan thlen thei lonak hi ziangdang ruangah si loin kan thinlung duhnak kan thlun sawn ruangah a si. Curuangah Pathian thawn kan hla, kan naih timi hi kan thinlung parah a um. Pathian kan pan duh taktak ahcun hlawhhlang ṭuan duhnak thinlung le ruahnak pawl ihsin tlansuak ding a ṭul a si.

Thunetnak.

Bawi Jesuh in thilrit a phurmi le rethei zonzai a tuartu pawl ka hnenah ra uh, colhdamnak ka lo pe ding a ti (Mat. 11:28). Kan nunnak ah zalennak thawn luatnak ngah ih kan nung theinak dingah Pathian hnenah kirsal ding kan ṭul. Cumi hrangah Pathian kan theifiang a ṭul. Thil ṭha lo kan tuahmi pawl kan hlon thluh a ṭul. Hlawhhlang ṭuan duhnak tisa hiarnak pawl tansan in Pathian hnenah kirsal ding kan ṭul taktak thlang a si.

~Rev. Dr. Hrang Hmung, D.Min., Ph.D.,

Toungphila, Kalaymyo.

May 6, 2017|Saturday|12:00pm.