Zianghman ṭih hlah, na hnenah ka um a si. Keimah cu na Pathian ka si,
zianghman in lo phangter hlah seh. Ka lo bawm dingih ka lo cakter ding; Ka lo
hum dingih ka lo run ding (Isa. 41:10).
Minung zovek khalin ṭihmi pakhat khat kan nei cio. Kan ṭih daan lawngte an bang aw lo. Mi hrekkhat ih ṭihnungza a si lomi hi mi hrekkhat hrangah ṭihnung rapthlakza a si thei men. Ziang a va si khalle ṭih dingmi a um timi cu a fiang a si. Kan ṭihmi le kan ṭih daan lawngte an bang aw cio lo ding. Cuih ṭihnak hi zovek pawlin an tong ih zovek hrangah luatnak a si
pei? Baibal ca sungih simmi tampi lak ihsin thuhla mallai kan zoh tlang hrih
ding.
Isaiah 66:3 sung kan siar tikah,
Minung cun anmah ih duhnak thlun in hna an ṭuan. Saserh hrangah cawcang an that, milai tla raithawinak
ah an pek; tuufaate an that ih uico ih hngawng tla an tan; sangphut thwinak an
peih vok thi khal an pek. Rimhmui an ur ih milem hmaiah thla an cam. Ningsinza
biaknak cu an lungawi zawng a si, a timi kan hmu thei.
1.
Ṭihnak hi Bawipa ih thlentermi a si.
Isaiah hnenah Bawipa in hitin a
simmi kan hmu thei: “Curuangah an parah harsatnak thil poimawh ka thlenter
ding, an ṭih
thlohthlo mi thil poimawh ka thlenter ding a si. Ziangahtile ka kawh tikah
zohman in, in awi lo; ka ṭong tikah zohman in an ngai lo. Ka thu el le thil ṭha lo tuah cu anmah ih hrilmi a si” (Isa. 66:4). Himi sungah
kan hmu theimi cu Pathian ih kawhnak a awi duh lomi pawl, Pathian thu el in
thil ṭha
lo a tuahtu pawl le a thu a ngai duh lo pawl hnenah Pathian in harsatnak thil
poimawh a thleng ter ding, ti a si. Cumi cu ṭihnak menmen si loin, “an ṭih thlohthlo mi thil poimawh” tiah kan hmu thei.
Pathian kawhnak aw a thei ko nain a
awi duh lo pawl, thei lo vekih um sanmen hi Pathian in a duh hrimhrim lo. Kan
tuahmi thil pawl khal Pathian in a hmu thluh. Thil ṭha le thil ṭha lo kan tuahmi pawl hi minung in kan hmu aw thluh lo nain
Pathian in a hmu thluh. Biakkhawm caan ah ṭha zet vekin kan um nain caan dang ah mai’ duhduh ih kan um
kha Pathian in a hmu thluh. Cutin kan nung tikah Pathian thu el le thil ṭha lo tuah thawn a bang aw a si. Cuticun Bawipa in harsatnak
thil poimawh, kan ṭih
thlohthlo mi thil poimawh pawl a thlenter ding a si. Pathian duh lo zawngih nun
cu ṭihphannak
thawn kan khat ringring ding a si.
2.
Ṭihnak ihsin Bawipa thotho in luatnak a pek.
Pathian duhnak a thlun lotu pawl, le
a thu eltu, thil ṭha
lo a tuahtu pawl hnenah ṭihnak a thlen ter tu Pathian amah thotho in luatnak ding a
tawlrel. Bawipa in, “Asinain keimah Bawipa in nang cu ka lo hum dingih na ṭihmi pawl hnenah pek na si lo ding. Ka lo humhim dingih
zohman in an lo that lo ding. Keimah i rinsan zo ruangah na nunnak cu a him
dingih na luat ding a si. Keimah Bawipa in ka sim zo,” a ti (Jere 39:17-18).
Cuihtlun ah, “Zianghman ṭih hlah, na hnenah ka um a si. Keimah cu na Pathian ka si, zianghman
in lo phangter hlah seh. Ka lo bawm dingih ka lo cakter ding; Ka lo hum dingih
ka lo run ding,” a ti hrih (Isa. 41:10). Pathian a rinsan ih a zumtu pawl, a
duhnak a thluntu pawl hrangah Pathian in ṭihnak ihsin luatnak lamzin a ongsak a si. Pathian in amah a
duhtu pawl a run ih Bawipa a si ti a theitu pawl cu a hum a si (Saam 91:14).
Thunetnak.
Baibal ca sung kan zoh tikah Pathian
in amah a zumtu le a rinsantu pawl hrangah ṭih lo dingin thu a simmi vei 366 a um, tiah Baibal thiam
pawlin an sim. Cumi cu kumkhat sung nitin kan nunah Pathian in in umpinak
langternak a si. Kumkhat ah ni 365 a um ko nain kum 4 veikhat ni 366 a ummi
tiang hrangah ṭih
lo dingin le in umpi ringring ding timi a langter. Curuangah Bawipa in,
“Leilung netnak in ka lo hruai; Vanhram deng ihsin ka lo ko ih, ‘Nang cu ka
siahhlawh na si,’ ka lo ti. Ka lo hnong lo, ka lo hril sawn a si” a timi kan
hmu thei (Isa. 41:9).
~Rev. Dr. Hrang Hmung, D.Min., Ph.D.,
Toungphila, Kalaymyo.
May 27, 2017|Sat|11:00pm.
No comments:
Post a Comment