“Bawipa cu nanmah runtu si dingah a ṭawnṭai tuk lawmmam lo. Bomnak dilih nan aunak thei lo tiangin a
hna a set lo” (Isa. 59:1).
Kan biakmi a nung Pathian cu a
minung pawl hrangah runtu ṭha bik a si. Kan thlacamnak pawl in let dingah a tiar aw
ringring. Jeremiah 33:3 kan zoh tikah “in ko a si ahcun ka lo let ding” tiah
thukamnak a tuahtu a si. Asile ziangruangah minung pawl harsatnak kan tong
tikah Pathian in in hmu lo, in bawm lo, kan ko tikah thei lo vekin in um san
tiah a titu tampi kan um men ding. Pathian in kan vuihrammi pawl a thei thluh.
A tuah thei thluh ko. Ziangruangah kan thlacammi, kan dilmi pawl a kim thei lo
ti khal Baibal sungah a sim thluh ko. Cumi cu zumtu pawlin kan theifiang a ṭul.
1. Kan dilmi ziangruangah kan ngah lo?
Minung pawlih kan dilmi vekin kan
ngah ṭheu
lonak hi ziangruangah a si timi thu hi Baibal in hitin a sim: “Nan sualnak
ruangah a lo thei lo a si sawn. Amah biak nan tum tikah Pathian thawn a lo ṭhentu cu nanmah ih sualnak a si,” (Isa. 59:2). Pathian thu
ziang kan siar duh lo ih thei cing khalin sualnak kan tuah thotho. Sualnak kan
tuahmi ṭhenkhat
pawl cu, “Thuphan nan per, thisen nan luan ter, mi nan that; nan mawh rori a
si,” tiah a tarlang bet (Isa. 59:3). Cuticun Pathian thawn in ṭhen ter. Pathian thawn a hlatnak hmun ah kan thleng vivo.
Cutikah kan thlacam le kan dilmi pawl kan ngah thei nawn lo. Minung pakhat le
pakhat kan nel-awk lo ahcun bom-awk ding a ol lo. Cuvekin Pathian thawn kan
pehzom lo ahcun a hnen ihsin kan dilmi ngah ding cu a ol nawn lo a si.
2. Kan ko khalle in sawn lo ding.
Mi tampi ih kan thei ciomi cu “I ko
awla ka lo let ding. Na theih lomi thil khawruahhar le mangbangza ka lo sim
ding,” timi Baibal caang hi a si (Jere. 33:3). Sikhalsehla ko khalle sawn lo
dingih a simmi khal Baibal sungah a um thotho: “Ka hnenah ra dingin ka lo ko
nain nan ra duh lo; Ka kut ka lo zap ih nan ngaisang lo. Ruahnak ṭha ka lo pekmi pawl tla ziangsiar loin nan um ih, nan nuncan
ziaza remsak ding khal nan duh lo. Curuangah harsatnak nan ton tikah ka lo
hnihsan dingih ṭihnung
rapthlak in a lo tlunhnawh tikah ka hni thup ding. Harsatnak cu thlisia bangin
a ra thlen tik le, ṭihnungza
in phusing bangin a lo nuai tikah, Vansang le thinlung rethei in an um ding. Cutik
ahcun in ko ding. Asinain ka lo sawn lo ding; Hmunkip ah in hawl ding nain in
tong lo ding,” a ti (Thuf. 1:24-28). Cumi cu Pathian ih a simcia mi a si.
Curuagah Pathian duh lomi vekin kan nung tikah kan ko khalle in sawn lo ding
timi hi cinken cia ding a ṭul ngaingai.
3. Kan sualnak kan hmu awk a ṭul.
In run theitu Pathian in kan hrangah
zianghman in tuahsak duh lo tiah um men ding a si cuang lo. Beidong ih um men
ding khal a si lo. Misual ka si ti thei aw in kan sualnak kan hmu awk ding a ṭul
a si. Johan in, “Sualnak kan nei lo kan ti
ahcun kanmah le kanmah kan bum aw ih kan sungah thutak a um lo. Sikhalsehla
Pathian hnenah kan sualnak kan phuan ahcun zum tlak le a dingmi a si ruangah
kan sualnak in ngaidam dingih kan mawhnak hmuahhmuah a thiangfai ter ding,” a
ti (1 Joh. 1:8-9). Zakia khal Jesuh thawn an tong awk tikah a sualnak a hmu awk
lohli ruangah rundamnak a co ngah a si (Luk. 19:1-10). David khal a sualnak
thei awkin Pathian hmai ah a ṭhum thei ringring ruangah ngaidamnak a co ringring.
Thunetnak.
“Bawipa cu nanmah runtu si dingah a ṭawnṭai tuk lawmmam lo. Bomnak dilih nan aunak thei lo tiangin a
hna a set lo” (Isa. 59:1). Bawipa cu ziangkim tithei Pathian a si. Amah cu kan
thinlung tak in kan hawl ih kan zum ahcun kan hrangah ziangkim in tuahsaktu a
si. “Zumnak locun zohmanin Pathian lungawiter a theih lo; ziangahtile Pathian a
pantu in Pathian a um, ti le amah a hawltu hnenah hawlman laksawng a pe, ti a
zum a ṭul
a si” (Heb. 11:6).
~Rev. Dr. Hrang Hmung, D.Min., Ph.D.,
Toungphila, Kalaymyo.
May 20, 2017|Saturday|11:30pm.
No comments:
Post a Comment