UAR DING UMSUN

“Kei ka hrang ahcun kan Bawipa Jesuh Khrih thinglamtahnak siar lo uar ding dang zianghman ka nei lo. Ziangahtile Khrih thinglamtah ruangah leilung hi ka hrangah khenbet a si zo ih kei khal  leilung hrangah khenbet ka si ve.”

(Galati 6:14).

Leitlun ah uar dingmi tampi a um. Cuih uar dingmi pawl hi uar tlak hrimhrimmi khal an si ko. Mi tampi in uar a tlak lo an ti khalah a uartu cun an uar thotho ko ding. Cutin leitlun ih kan uarmi hi a bang aw cio lo. Hlasak thiam kan uarmi a bang aw lo. Hla kan uarmi a dang cio. Awmawi tiah kan ruahmi khal a bang aw lo. Lehpannak lam a thiamtu lakah kan uarmi a dang cio. Lemcangtu pawl lakih kan uarmi khal a bang aw lo. Leitlun ah uar dingmi tampi a um. Cumi cu leitlun kan um sungih kan tong rero lai dingmi pawl an si. Cumi tampi lakah Paul ih simi uar ding umsun hi ziang a si timi thawn thazang kan lak tlang cio pei.

1. Minung ih kan uarmi.

Minung cun uarmi a phunphun kan nei. A hrek cun mah le sungkhat unau, hrinhnampi, miphunpi, rampi, theithiammi tvp. ruangah kan uar. Mihrek cun an sinak, an thiamnak, an dinhmun, an mawinak tvp. ruangah kan uar. Cun uar daan khal a phunphun in a um. Mi hrek hrangah cuih kan uarmi thawngin hlawknak in pe thei men ding. Mi hrek hrangah kan uarmi in zianghman in thei ve lo khalle kan uar thotho. Leitlun hminthang zet pakhat cu kan uar zet khalle amah cun in thei lo tla a si ding. Cutin a si le cuih kan uarmi ruangah ziangso qhathnemnak a um? Bawhlung sitthiam Rooney, C Ronaldo, Messi pawl kan uar ruangah kan hrangah zianghman hlawknak a um lo. Curuangah minung ih kan uarmi cun kan hrangah hlawknak in pe thei lo timi thei cingin kan uar kha a si tamai.

2. Paul ih uarmi.

Paul hi a sinak kan zoh tikah amah hrimhrim hman hi uar tlak a si. A miphun sinak, a fimthiamnak, a innsang dinhmun tvp pawl kan zoh tikah leitlun lam dinhmun ah mi menmen a si lo (Fil. 3:4-6). A dinhmun hi mi tampi ih uartlakmi khal a si ko. Jesuh Khrih thawn an ton awk hnu ah Paul ih uarmi hi a dang vuarvi. “Kei ka hrang ahcun kan Bawipa Jesuh Khrih thinglamtahnak siar lo uar ding dang zianghman ka nei lo” tiah a uarmi ziang ah si tiah fiang fukfi in a simmi kan hmu thei. A uarmi thu kan zoh tikah mi tampi ih nautatmi, zomtaihmi, zianghman ih siar lomi Bawi Jesuh kha a si. Cuihtlun ah mi tampi ih an nautat bikmi thinglamtah cu Paul in ka uarmi a si tiah a sim tikah thil mak ngaingai a si. Sikhalsehla Paul ih uarmi hi a hrangah hlawknak tampi pe theitu a si riangri. Bawi Jesuh a zumtu pawl hrang khalah hlawknak a si.

3. Uar ding umsun.

Paul ih uarmi “Khrih thinglamtah ruangah leilung hi ka hrangah khenbet a si zo ih kei khal  leilung hrangah khenbet ka si ve,” timi hi mi tampi hrangah pom dingah a harzet. Leitlun nun hrangah hlawknak zianghman a um lo. Sikhalsehla Bawi Jesuh ih thinglamtahnak hi a zumtu pawl hrangah hlawknak a si. Leitlun kan nunnak hrangah hlawhtlinak ziangkim petu a si. Cuihtlunah hi leitlun kan fehsan hnu khalah a kumkhua in hlawknak in pe hrih dingmi a si. Curuangah rundamnak a cotu hrangah kan uar ding umsun cu Bawi Jesuh ih thinglamtahnak lawng a si. Himi siar lo a dang kan uar dingmi zianghman a um lo.

Thunetnak.

Bawi Jesuh ih thinglamtahnak siar lo uar ding dang zianghman a um lo, kan ti tikah leitlun thilri zianghman siar nawn lo ding tinak a si lo. Leitlun ah tlangleng in a nungmi kan si ruangah leitlun kan nun sungih kan qulmi, kan tuah dingmi, kan uar dingmi pawl cu nei in, tuah in, uar ding a si ko. Amah lawngte ziangvek kan tuah, kan uar khalle Bawi Jesuh ih thinglamtahnak hi kan hrangah ziangkim nehnak in co tertu a si timi kha kan hngilh hrimhrim lo ding a thupi ngaingai. “Kei ka hrang ahcun kan Bawipa Jesuh Khrih thinglamtahnak siar lo uar ding dang zianghman ka nei lo.”

~Rev. Dr. Hrang Hmung, D.Min., Ph.D.,

Toungphila, Kalaymyo.

March 18, 2017|Saturday|10:55pm.