“Thinglamtah
parih Khrih thihnak thu hi a hloral cuahcomi pawl hrang ahcun aat-hna meen a
si; sikhalsehla rundam lai reromi kannih hrang ahcun Pathian ih cahnak hmual a
si” (1 Kor. 1:18).
-Baibal ih a laimuril cu Pathian ih duhdawtnak
a si. Pathian ih duhdawtnak cu Jesuh Khrih thawngin Kalvari tlang parah a
langter. Kalvari tlang parih Thinglamtah thu hi leitlun a semsuah ihsin tuini
tiang hrangah a thupibikmi thilcangmi (event) a si.
-Thukham Hlun sungah misual mithi ruak pawl hi
can tampi ahcun ralrin peknak ah thing parah an thlai ṭheu. Thing parih ruak thlai
cu Pathian siatcam tuar a si (Daan. 21:22-23;)
-Cuvek ih taarmi mithi ruak pawl cu camsiatnak
ruangih tuarmi tiah an ruat ih zan khuathim tikah an laksal ih phumsal an si ṭheu.
Asinain Jesuh Khrih ih tuarnak cu kanmah
runnak dingah a si: “Sihmansehla Khrih cu kan hrangih camsiatmi a si ruangah
Daan ih a thlenpimi camsiatnak ihsin in runsuak zo. Ziangahtile Ca Thianghlim
in, ‘Zokhal thing parih thlai a simi cu Pathian camsiatnak cotu a si,’ tiah a
ti. Cuticun Khrih Jesuh ih zaarah Pathian in Abraham hnenih a tiammi
thluasuahnak cu Zentail mi in an conak dingah le zumnak thawngin Pathian ih
tiamcia mi Thlarau kan conak dingah a si.”
(Gal. 3:13-14; cf. Tirh. 13:29)
#Thinglamtah
kan zoh tikah.
Bawi Jesuh ih tuarnak thinglamtah kan zoh
tikah kan hrangah thil thupizet a tuahmi pawl kan hmu thei.
1. Misual kan si lam kan hmu (Rom 3:23).
2. Pathian in cuih sualnak a huatzia kan hmu
thei (Ezek. 18:20; Rom 6:23; Heb. 9:22; 2 Kor. 5:21).
3. Pathian ih duhdawtnak a sunglawi zia kan
hmu thei (Joh. 3:16; Rom 5:6-8).
4. Nehnak lamzin kan hmu thei (Rom 6:6, 14;
Gal. 2:20).
#Thinglamtah
ih langtermi pawl.
Minung hrangah in tuahsakmi Jesuh Khrih
thihnak thinglamtah ih langtermi pawl cu a tanglam vekin an si.
1. Pathian ih duhdawtnak a langter (Rom 5:8).
2. Kan tuar dingmi zatein in tuarsak (Isa.
53:4).
3. Kan sualnak zatein in laksak (1 Pit. 2:24).
4. Dingnak in co ter (2 Kor. 5:21).
5. Sualthlahnak in co ter (1 Joh. 2:2).
6. Pathian innsang sinak in co ter (Heb. 2:11;
Joh. 1:12).
7. Zalennak in co ter (Kol. 2:14-15; Rom 6:14;
Mat. 8:17; 1 Pit. 2:24; Gal. 3:13).
Thinglamtah parih Jesuh Khrih a tuarnak hi
Pathian le minung karlak ah remnak in tuahsaknak a langter. Ruahsannak in nei
ter. Kumkhua nunnak kan co theinak ding hrangah a si. Thinglamtah ih tumtahmi
cu sualthlahnak lawng a si lo. Kan nunnak thleng aw thluh in Pathian thawn
pawlkomnak nun nei thei ding hi a si. Paul in a sim ringring mi cu “kan hrangih
a tuartu Jesuh Khrih ih thu” a ti. Himi thu cu zum lotu pawl in aat-hnak tiah
an ko.
Sikhalsehla Pathian ih a kawh ciami pawl hrang
ahcun Judah mi siseh Zentail mi khal sisehla, cuti kan phuanmi cu Khrih a siih
Khrih cu Pathian cahnak le Pathian fimnak a si. Ziangahtile Pathian aatnak cu
minung ih fimnak hnakin a fim sawn; cule Pathian ih tonqaihnak cu minung ih
cahnak hnakin a cak sawn (1 Kor. 1:24-25).
Thinglamtah
parih Khrih thihnak thu hi rundam lai reromi kannih hrang ahcun Pathian ih
cahnak hmual a si. Zumtu hrangah Jesuh ih thinglamtah hi aat-hna si loin,
Pathian ih cahnak hmual a si ringring.
~Rev. Dr. Hrang Hmung, D.Min., Ph.D.,
Toungphila,
Kalaymyo.
April 1, 2017|Sat|9:33pm.
No comments:
Post a Comment