Ziang hmuahhmuah
nan tuah tinkim ah milai hrangah si loin Bawipa hrangah kan ṭuan ti thinlung nei in nan thinlung taktein ṭuan uh (Kol. 3:23).
Khristian kan sinak a rei thlang vekin zumtu tampi
in Pathian hna kan ṭuan kan timi pawl hi ṭhatein ruat a cu zo. Mi tampi cun Pathian hna kan ṭuan kan ti nain mai’ pumcawmnak a si ṭheu. Mi tampi cu kanmai’ hlawknak ding ruatin kan ṭuan ṭheu. Mi tampi cu hnaṭuan ding dang thei lo ruangah remcang bik tiah a ṭuantu khal kan um thei men. Kanmah le kan sinak cu
kan theifiang aw thluh ko ding. Paul in Pathian hna kan ṭuanmi hi ṭuan menmen si loin thinlung taktein Bawipai’ hrang ṭuan dingah in forh a si.
1. Thinlung
taktein Bawipai’ thu ngai ding (Kol. 3:22).
Paul san laiah
sal ih tuah awk hi a cem hrih lo. Khristian hrekkhat pawl khal hi sal an si. Sal
pawl cu thiamnak a phunphun an nei. Ṭuanvo a
phunphun an pek. Milian inn an um ih an faate pawl an kilkhawi sak.. Cuih san
laiah Kawhhran hi ziangtinkim ah thazaang a mal tuk hrih ruangah sal daan hi an
hnong thei hrih lo. Paul in, “… Bawipa ih kawhmi sal cu Bawipa ih miluat a si.
Cuvek thotho in miluat cia Khrih ih a kawhmi cu Khrih sal a si”, a ti (1 Kor.
7:21-22).
Sal le bawi pawl
cu kawhhran sungah an um tlang, an ṭuan tlang
tikah pehzomnak thar a suak. Cumi in thil um daan tampi a rem ngah. Thilri
vekih an rak ruah dahmi sal pawl kha zumtu an can tikah minung pakhat dinhmun
ah an um thei ve. Onesimas hi Filemon sal a si ko nain Paul hnen ihsin cakuat
kengin Kolose kawhhran hnenah a va thlenpitu a si. Sal siseh, hnaṭuantu zovek khal siseh dingfel le rintlakmi si ding
hi a thupi. Pumpek nun neih ding khal a thupi. Khristian timi cu Khrih hrangah
riantu ṭhabik si a ṭul.
Mai’ bawipai’ hrangah dingnak le pumpeknak thawn va rian cu Pathian riantu
sinak khal a langternak a si. Thinlung taktein Bawipai’ thu ngai ding a thupi.
2.
Bawipai’ hrangah thinlung taktein ṭuan ding (Kol. 3:23).
Sal
in ziangvek thilri khal nei theinak thu a um lo. Nu le pa ih ro khal an co thei
lo. An nunnak hrangah ruahsan ding zianghman a um lo ruangah thinlung takin hna
ṭuan
ding timi cu thil ol a si hrimhrim lo. Cumi thu a theifiangtu Paul in, minung
hrangah si loin Bawipa hrangah kan ṭuan
timi thilung neiin nan thinlung taktein ṭuan
uh, tiah a forh hngai. Felfaizet in hna a ṭuantu
hrangah Pathian in an hrangah laksawng a retsak hngai ko timi a langter duhnak
a si. Zumtu in hna kan ṭuan
tikah feltein kan ṭuan a ṭul.
Cutin kan ṭuanmi cu Jesuh Khrih
hrangah a si. Leitlun mit hmuh ih fel le bawi pawl lungtong duh ruangih taimak
suah le zuamnak cu a dikmi a si lo.
Pathian
hna kan ṭuan hnuhnu cu mit
hmuh ah siseh, mit hmuh lo khalah siseh feltein ṭuan a
ṭul
hrimhrim. Zumtu thinlung put ṭha
thawn Bawipa hrangah ṭuan
cio ding a ṭul. Pum cawmnak
ruatin le mai’ zawn lawng ruatin hna kan ṭuan
ahcun kan hnaṭuanmi hi zianghman
san a tlai lo ding. Bawipa hrangah kan ṭuan
tikah lung tho zetin kan ṭuan
cio ding. Cuih thinlung put le ruahnak cu Bawipai’ sal in kan cinken dingmi hnaṭuannak
thinlung put lawng si loin Khristian thinlung put khal a si. Bawipai’ hrangah
thinlung taktein ṭuan cio ding a thupi.
3. Kan rianmi Bawi ngaingai cu Khrih lawng a si (Kol. 3:24).
Sal pawl cu bawi pawl hnen ihsin zianghman co dingmi an nei lo.
Bawi pawl ih duhtawk hrem le fialnak lawng an co theimi a si. An nunnak cu
rethei zonzainak in a khat. A tlanmi sal hrekkhat khal an um ko. A hrek cu an
bawi pawlih thilri an fir ih a tlanpitu khal an um. Cubang pawl cu zumtu a simi
sal pawlih tuah dingmi a si lo. Leitlun nun caantawite sungah zumtlak le
felfaitein hna a ṭuantu hrangah Pathian
in ṭuanman laksawng in reksak
thluh hngai. Ziangahtile an rianmi Bawi ngaingai cu Jesuh Khrih a si. Cuih ṭuanman
laksawng cu kumkhua nunnak a si. Leitlun fimnak, ṭuan
theinak thazaang hmangin ngahmi si loin Jesuh Khrih zumnak thawngin ngahmi
Pathian laksawng a si. Pathian zaangfahnak thawngin ngahmi ṭuanman
laksawng a si. Lei thilri laksawng le ro si loin thlarau ro sunglawi sawn a si.
Leitlun thilri le lennak ih lei theih lomi ṭuanman
laksawng ro sunglawi a si.
Thunetnak.
Mi
zovek khal ṭhat lonak, dingfel
lonak pawl kan tuah ahcun cawhkuan kan tong tengteng ding. Pathian cu a dingmi
a siih thleidannak a nei lo. Paul in, “Ziangahtile thuṭhen
dingah kan zate in Khrih hmai ah kan ding leh ding. Zozo khal a ṭha
siseh, a sia siseh a nunsung ih a tuahmi vek ceki in a ngah ding,” a ti (2 Kor.
5:10). Sal a si ruangah a niam deuhmi a si tiin a luat thei lo ding. Bawi a si
ruangah a tum, a thupi deuh ruangah a luat thei cuang lo ding. A ṭha
kan tuah ahcun kan tuahmi ih a rah kan co dingih a ṭha
lo kan tuah ahcun kan tuahmi par ihsin a rah kan ngah leh ding. “Milai cun an
tuhmi vek cekci in an khawm ding” (Gal. 6:7). Bawipai’ hrangah thinlung taktein
ṭuan
cio ding hi a thupi bik miangmo a si.
~Rev. Dr. Hrang Hmung, D.Min., Ph.D.,
Toungphila,
Kalaymyo.
March 25, 2017|Sat|9:33pm.
No comments:
Post a Comment