A HMUNMI DUHDAWTNAK

Asinain nannih ka duhdawtmi pawl cu a thianghlimmi nan zumnak parah ṭhangso vivo uh. Thlarau Thianghlim cahnak thawn thla cam uhla, kan Bawipa Jesuh Khrih in a zaangfahnak thawn kumkhua nunnak a lo pek ding ni nan hngah laiah hin Pathian ih duhdawtnak sungah hmun ringring uh (Juda 1:20-21).

Thuhmaihruai.
Minung kan duhdawtnak cu sinak le dinhmun parah a um. Sikhalsehla Pathian ih duhdawtnak cu a hmun ringring. Jeremiah in, "Maw Israel mipawl, ka duhdawt ciami nan si ih nan parah duhdawtnak cu cat loin ka nei ding” (Jere. 31:3) tiah Pathian duhdawtnak a hmunzia a sim.

1. A thianghlimmi zumnak parah ṭhangso vivo ding.

“A thianghlimmi nan zumnak parah ṭhangso vivo uh,” timi cu Jesuh Khrih ih zirhnak pawl kha sim duhmi a si. Kanmah le zumnak ṭhangso in Baibal ih zirhnak vekin tungding aw ding hi a thupi zetmi a si. Hebru cangantu cun rawl ngai ei thlang dingah forhnak a nei (Heb. 5:12-14). Hnawiti in ṭul nawn loin ṭhang vivo dingah a forhmi a si. Cuvek ṭhiamṭhiam in Piter khalin hnawiti in hnu ah ṭhan lam pan dingah a forh ve (1 Pit. 2:2).

2. Thlarau Thianghlim cahnak thawn thla cam ding.

“Thlarau Thianghlim cahnak thawn thla cam uh,” tiah a forhmi hi Jesuh Khrih ih Thlarau cu kan sungih a um tikah Thlarau thawn thla kan cammi hi hmual a nei ruangah a si.
Pathian ih Thlarau cu kan sungih a um taktak a si ahcun Thlarau ih fialmi vekin kan nung sawn a si. Zokhal Khrih ih Thlarau a nei lotu cu Khrih ta a si lo…. Kannih cu a ṭawnṭaimi kan si ruangah kanmah bawm dingah Thlarau a ra. Ziangtinso thla kan cam ding ti hman kan theih lo laiah, hmurka hmanin simsuak thei lomi hrum-ainak thawn Thlarau in kan hrangah Pathian hnenah in dil sak (Rom 8:9, 26).

Himi pawl kan tuah tikah thlacam phah in kan tuah ding. Pathian hnenah bomnak dil in, Thlarau ih hruainak bangtuk in ziangtik caan pohah thla kan cam ding. Ralring cia in kan um dingih beidong mai dingmi kan si lo. Pathian minung pawl hrangah cat loin thlacam ding kan ṭul (Efe. 6:18).

3. Pathian ih duhdawtnak sungah hmun ringring ding.

Bawi Jesuh in a zaangfahnak thawn kumkhua nunnak in pek ding ni kan hngah laiah hin Pathian ih duhdawtnak sungah hmun ringring ding hi a thupi zet. Paul khalin, “Pathian duhdawtnak sungah hmun ringring uh,” a ti ve (Rom 11:22). Bawi Jesuh in, “Ka Pa ih i duhdawt vekin nannih khal ka lo duhdawt ve; ka duhdawtnak sungah um ringring uh. Ka Pa ih thukham ka thlun ih cuti cun amah ih duhdawtnak sungih ka um vekin ka thukham nan thlun a si ahcun ka duhdawtnak sungah nan um ve ding” tiah a zumtu thawn pumkhat an sizia a simmi kan hmu thei (Joh. 15:9-10).

Thunetnak.
Pathian ih duhdawtnak sungah kan hmun ringring ahcun in ṭhen theitu a um lo. Paul in, "Cuti a si ahcun zo in so Khrih ih duhdawtnak cun in ṭhen thei ding? Harsatnak siseh, tuarnak siseh, hremnak siseh, rilrawnnak siseh, hnipuan nei lo farahnak in siseh, ṭihphannak le thihnak khal siseh, cupawl in in ṭhen thei ding maw? ṭhen thei hlah!” (Rom 8:35) a ti.

~ Rev. Dr. Hrang Hmung, D.Min., Ph.D.,

Camkhat Yangon.

April 8, 2017|Sat|11:30pm.