TUIH NI, TUIH CAAN

Baibal Thianghlim sungah tikcu caan thawn pehparmi thuhla tampi a nganmi a um. Cuih thuhla pawl kan zoh tikah zumtu pawl hrangah a thupi zetmi pawl tla an si. Cumi sung ihsin a tanglam thu pawl thawn thazang thar lak cio uhsi.

1. Bawipa ih tuahmi ni a si.

Bawipa ih pekmi, tuahmi ni a siih lungawi aipuang zetih kan hmang dingmi ni a si. Saam cangantu in, “Tuih ni hi Bawipa ih tuahmi ni a si; Lungawi aipuang in um uhsi,” a ti (Saam 118:24).

2. Duhdawtnak thar in co ter ni a si.

Pathian cu duhdawtnak a si timi thu hi kan thei cio mi a si. Cumi thu ah, “A hmunmi Bawipa ih duhdawtnak cu ziangtik hmanah a cat dah lo. A zaangfahnak cu net ni a nei lo. Zinglam khawvang bangin a thar ringring; Rintlak a sinak cu a nasa a si,” tiah kan hmu thei (Ṭahhla 3:22-23).

3. Lungawinak a thleng ni a si.

Minung kan zatein harsatnak tampi kan tong, mitthli tlakin kan um. Sikhalsehla lungawinak a thleng sal ringring. Baibal in, “Zan ah ṭahnak um hmansehla, Zinglam ah lungawinak a thleng a si,” a ti (Saam 30:5).

4. Rundamnak co ni a si.

Kan zatein misual kan si thluh. Pathian thawn a ṭhen aw zomi kan si. Sikhalsehla kan hrangah rundamnak ni a um: “Ngaihnik uh! Pathian mithmai ṭha ngah caan cu tuih caan hi a si; rundamnak co ni cu tuih ni hi a si,” (2 Kor. 6:2).

5. Thuthangṭha phuanni a si.

Kan tonmi thil pawl hi an sia thluh lo. Ziangvek dinhmun ah kan um hmanah thuthangṭha kan nei ih cumi cu midang hnen khalah kan phuan a ṭul. Miphar pali pawl khalin an hnenah thuthangṭha a thleng tikah, “Hitiih kan tuahmi hi thildik a si lo. Thuthangṭha kan nei a siih kanmah ih hrang lawngah siseh ti ding a si lo. Thaizing tiang kan hngah a sile mawh kan phur tengteng ding. Atu rori ah kan feh pei ih siangpahrang kuthnuai ih bawi pawl kan va sim pei,” an ti ih mi tampi hrangah hlawknak a thleng (2 Siang. 7:9).

6. Pathian aw theih ni a si.

Pathian aw a theitu cu lungruh nun ih nung dingmi kan si lo. Pathian dodal ding khal a si lo. Baibal in, “Tuih sunah Pathian aw nan theih a sile, Nan pupa pawl in Pathian an dodal vek cun nan lung ruhter hlah uh,” tiah Pathian aw theih ding ah in sawm (Heb. 3:15; 4:7).

7. A duhdawtnak langter ni a si.

Bawipa in minung hnenah a duhdawtnak cu a langter ringring: “Bawipa in nitinte in in duhdawtnak langter hram seh. Zan ah a hla cu ka thinlungah a caam. Ka nunnak Pathian hnenah thla ka cam ding” (Saam 42:8).

8. Thlarau le thutak thawn biak ni a si.

Pathian a theitu cu Thlarau le thutak thawn biak dingah in duh. Cumi cu Pathian Thlarau ih hruainak thawn kan co theimi a si: “Sikhalsehla Pathian Thlarau hruainak thawngin Pathian a bia taktaktu in Pa cu thlarau le thutak thawn an biak caan a ra thleng ding; a si, cuih caan cu atu ah a ra thleng zo. Cutiih biak cu Pathian in a duhmi a si” (Joh. 4:23).

9. A hlomi hawl le rundam ni a si.

Bawi Jesuh cu misual pawl hawl dingah le rundam dingah a ra timi thu hi Zakia ih nun ihsin khal a langter: “Tuih sun hi pa ih inn ah rundamnak a ra thleng zo, ziangahtile hi pakhal hi Abraham ih tesinfa a si ve. Milai Fapa cu a hlomi hawl ding le rundam dingah a ra” (Luk. 19:9-10).

10. Paradis ah um ding ni a si.

Jesuh in cupa ih hnen ahcun, “Thu ka lo kam a si: tuihsun ah keimah thawn Paradis ah na um ding,” tiah a ti (Luk. 23:43). “Paradis” timi hi Persian ṭong a siih “lungawinak hmuan” (Garden of Delights) a si. Grik Thukam Hlun a simi Septuagint ahcun “Eden hmuan” (Garden of Eden) a ti. Hi hmun hi Vanram lole Pathian Hmuan a si (2 Kor. 12:3-4; Thup.  2:7). Himi thuanthu ah misual ka si ti kha thei-awk ih siirnak a neitu cu Bawi Jesuh ih ngaithiamnak a co-ngah timi kha kan hmu thei.

Thunetnak.

Tuih ni, tuih caan timi hi kan nunnak caan tawite sungah a sunglawi hleice mi a si ruangah sunglawi zetih a hmang theitu si dingah Pathian in in duhsak a si. A siartu kan zatein tuih ni, tuih caan hi Pathian duhnak vekin man nei zetih a hmangtu si dingah thluasuah in pe cio hram seh. Amen.

~Rev. Dr. Hrang Hmung, D.Min., Ph.D.,

Tongphila, Kalaymyo.

April 22, 2017|Saturday|8:30pm.