JESUH KHRIH IH RUNDAMNAK

Ziangahtile leilungtlun ah Pathian in a Fapa a run thlah tikah leilung thuṭhentu dingah a thlah lo, leilung runtu dingah a thlah a si (Joh. 3:17).

Bawi Jesuh cu leitlun minung zate hrangah rundamtu umsun a si. Ziangtinkim, ziangvek dinhmun ihsin in run theitu a si. Jesuh timi hmin ih sullam cu a minung pawl kha an sualnak ihsin a runsuak ding tinak a si (Mat. 1:21). Jesuh Khrih ih dundamnak in minung pawl ziangvek ihsin in run ih kan nunnak ah ziang a cang ter timi khal kan theifiang a ṭul. Jesuh Khrih ih runnak cu thlarau pakhat hrang lawng a si lo. Thinlung, taksa le thlarau zate huap ih runnak a si timi kan theifiang a ṭul.

1. Tuih san, san sia sung ihsin in run.

Kan umnak leilungpi hi nikhat hnu nikhat a sia sinsin timi cu kan el thei lo. Baibal in kan san hi san sia a si, a ti (Efe. 5:16). Tuih ni leitlun ah ram thuhla, pursumnak le natnak phunkim thawn ṭihnungza in a khat timi cu kan thei ciomi a si. Jesuh Khrih ih rundamnak cu cuih dinhmun zate ihsin in runsuak thluh zo (Joh. 19:30). Curuangah kan zate hrangah Jesuh Khrih ih thinglamrah parah a tuarnak thawngin hremhmun ihsin luatter le hmailam nunnak hrang lawng si loin tuih ni kan tonmi san sia ziangkim sung ihsin in luatter zo a si (Gal. 1:4).

2. Ṭhat lonak ihsin in run.

Jesuh Khrih ih rundamnak cu ṭhat lonak ihsin in runsuak ih thil ṭha tuah a hiartu si dingah a si (Titas 2:14). Mi zovek khal nu pumsung ihsin misual kan si thluh zo (Saam 51:5; Rom 3:23). Cuih sualnak sungih a nungtu pawl in Jesuh Khrih cu rundamtu ah kan cohlang tik lawngah kan nunnak ah thleng-awknak a um. Cumi cu sual duhnak thinlung ṭha lo ihsin thil ṭha tuah hiartu si dingah in cangter a si. Cumi cu kanmah zuamnak thawng in si loin Jesuh Khrih rundamnak thawngih kan co ngahmi a si sawn.

3. Phunhnam hrin le ṭongtin ihsin in run.

Jesuh Khrih ih thihnak thawngin phunkip, hnamkip, ṭongtin le hrintin ihsin Pathian hrangah in lei zo (Thup. 5: 9-10). Paul in, “Man pekih leimi nan si. Curuangah nan taksa cu Pathian sunlawinak ah hmang uh,” a ti (1 Kor. 6:20). Cumi ih a langtermi cu Pathian hrangah a si timi hi a si. Curuangah Jesuh Khrih a zum ih runnak a cotu poh in mai’ hrangah nung loin Pathian hrangah nung ding a ṭul. Cuih runnak a theifiangtu cu puithiam phun le siangpahrang uknak ah a tuah zo. Curuangah Pathian hrangah kan nung deuhdeuh ahcun a sangbik dinhmun in co ter sinsin ding a si. Jesuh Khrih rundamnk thawngin hremhmun ihsin kan luat lawng si loin leitlun ah dinhmun  in pek, hlawhtlinnak le aamahkhan in pek, zalennak famkim khal in co ter a si.

Thunetnak.

Jesuh Khrih hi leitlun a ratnak cu minung pawl sual thu ṭhensak dingah a si lo. Amah a zumtu pawl zate rundamnak ngah theinak dingah a si (Joh. 3:17). Jesuh Khrih a zumtu hmuahhmuah san sia sung ihsin, ṭhat lonak tinkim ihsin le phunhnam hrin le ṭongtin ihsin in runsuak zo a si. Rundamnak famkim in petu Jesuh Khrih kan Pathian a hmin sunglawi sinsin seh. Amen.

~Rev. Dr. Hrang Hmung, D.Min., Ph.D.,

Tongphila, Kalaymyo.

April 29, 2017|Saturday|11:30pm.