BAWIPA KAN DIL DINGMI

“Maw Pathian, na hnenah thil pahnih ka lo dil; Ka thih hlanah i coter hram aw. Thuphanpertu si lo dingin i kil aw; Farah tuk le lian tuk khalin i tuah hlah awla, Ka khop tawkfang lawng rawl i pe hram aw” (Thufim 30:7-8).

Pathian in a sersiammi minung pawl hrangah ziangkim famkim zetin in tuahsak thluh. Ei in ding in pek; ei in thei dingin in ret. Ṭuan thei, hawl theinak le ṭuan ding, hawl dingmi in pek. Beunak hmun in pek. Sungkhat unau, pawlkom ding rualpi, kiangkap ziangkim in pek. Hnipuan sinfen in pek. Pathian in kan hrangah in tuahsakmi pawl hi a famkim thluhmi a si. Ziangahtile nu pum sungin kan suak tikah zianghman kenmi kan nei lo (Job 1:21). Sikhalsehla kan nunnak kan zoh tikah mi pakhat sinak hrangah a ṭulmi pawl Pathian in famkim zetin in pe thluh tiah kan hmu thei.

Baibal canghril kan zoh tikah Thufim cangantu in a nunnak a zoh awk tikah Pathian hnenah thil tampi a dil lo, thil pahnih lawng a dil. Himi a dilmi hi kan zate ih kan dil ve dingmi khal a si.

1. Thuphan pertu in si ter hlah aw.

Thuphan per hi Pathian in a duh lo. Thuphan per hi Satan ih hmanmi a si (Seem. 3:4) ih thuphan hmuahhmuah ih pa a si (Joh. 4:44). Kain khalin thuphan a per (Seem. 4:9). Baibal sungah thuphan pertu tampi kan hmu thei: Abram in a nupi Sarai thu ah Izipt siangpahrang a bum (Seem. 12:10-20); Jakob in a pa Isaak a bum (Seem. 27:14-25); Gehazi in Naaman hnenah thuphan a per (2 Siang. 5:20-24); Piter in thuphan a per (Mat. 26:69-74); Ananias le Safira in thuphan a per (Tirh. 5:1-10). Thukam pahra sungah, “Nan innhnen parah a dik lo theihpitu nan si lo pei,” a ti (Suah. 20:16). Thuphan in nunnak caan tawite a nei (Thuf. 12:19). Bawipa in thuphan pertu pawl a hua (Thuf. 12:22). Thuphan pertu pawlih kaa cu phih an si ding (Saam 63:11). Curuangah Thufim ngantu in, “Thuphanpertu si lo dingin i kil aw” a tinak a si. (Baibal sungah ka thuphan per thu tampi a um hrih).

2. Farah tukin i tuah hlah aw.

Farah kan ti tikah thinlung, thlarau lam farah le thilri lam farah tiah ṭhen a si qheu. Lot cu Sodom le Gomorrah siatsuah a tong tikah farah ah a cang (Seem. 19:23-30). Ruth le Noami khal farah zet an si (Ruth 1:20-2:2). Lazaras khal mi farahzet a si (Luk. 16:20). Mi farah pawlih thilri an longsak, an hmuhsuam an nautat (Is. 3:14-15; Amos 2:6-8; Jeim 2:6). Curuangah farah hi duh a um lo zetmi a si. Farah tikah mi thil an ruk, mi thil an daw. Thukam pahra cun, “Ruk nan ru lo pei (Suah. 20:15). Mi thil nan daw lo pei. Mi inn siseh, mi nupi le mi sal pawl siseh, an caw, an rang le midang ih neihmi hmuahhmuah nan daw lo pei (Suah. 20:17)” a ti. Farah hi zohman in upat pek a si ṭheu lo. Farah hi kan tuar thiam lo tikah buainak le harsatnak a suahpi. Curuangah Thufim ngantu in farah tuk in i tuah hlah aw, a tinak a si.

3. Milian tukin i tuah hlah aw.

Milian timi cu kan thei cio ko. Simfang a ṭul lo ding. Abraham (Seem. 24:34-35), Isaak (Seem. 26:12-14), Esau (Seem. 36:7-8) le Jakob (Seem. 30:43) pawl cu milianzet a si. Cuihtlunah Nabal (1 Sam. 25:2-3), Solomon (1 Siang. 10:14-29) le Job (Job 1:1-3) pawl khal milian hminthang pawl an si. Milian le mi neinung tampi hi an neihmi thilri le ziangkim parah an rinsan awk tuk ṭheu. Cuih an neih thilri ruangah midang khal zianghmanah an siar ṭheu lo. Rundamnak thawn an hlat awzet a si. Bawi Jesuh in, “Kalauk pakhat ṭhim hnakua sungih luh hnakin milian pakhat Pathian Uknak sungih luh a har sawn” a ti (Mat. 19:24). Milian tanpi cu an neihmi an rinsan ih Pathian an ṭul ṭheu lo. Curuangah Thufim ngantu in lian tuk in i tuah hlah aw, a tinak a si.

Thunetnak.

Thufim ngantu ih a dilmi in kan nun in sim duhmi cu Thuphan per a ṭhat lonak a langter. Pathian ih duhmi a si fawn lo. Farah tuk le lian tuk khal hi sambaunak a um veve. Lian tukih a um ahcun “Bawipa ka ṭul lo,” ka ti pang ding, a ti. Farah tuk khalle ruk ka ru pang dingih Ka Pathian hmin ka thangsiatter pang ding, a ti. A dilmi cu, “Ka khop tawkfang lawng rawl i pe hram aw” ti hi a si. Bawipa in thlacam in zirhmi cu, “Nitin kan ṭulmi rawl in pe aw,” ti a si (Mat. 6:11). Curuangah rundam fa pawlin Bawipa kan dil dingmi cu “Ka khop tawkfang lawng initin kan ṭulmi rawl in pe aw” ti hi a si. Kan ṭulmi cu Pathian in in cawm thluh a si.

~Rev. Dr. Hrang Hmung, D.Min., Ph.D.,

Toungphila, Kalaymyo.

February 25, 2017|Saturday|11:30pm.