RUNDAMNAK MAKSAK

“Cutin nan tuah le a ṭha; cule mi hmuahhmuah thutak thei hai sehla, rundammi si hai seh ti a duhtu, in Rundamtu Pathian a lung a awi ding,” (1 Tim. 2:3-4).

Eden tluksiatnak ruangah sualin minung thlarau a that. Paul in, “Hlan ahcun nan ṭhat lonak le nan sualnak ruangah thlarau lamin mithi nan si,” a ti (Efe.2:1). Cule minung taksa cu natnak in a khat ṭheh (Saam 38:2-3). Sualnak Pathian le minung karlak ah pehzomnak a cat ih pehzomnak kan nei thei nawn lo. Minung kan zuamnak in Pathian hnenah kan thleng thei nawn lo. Pathian thawn pehzom sal dingin kan tuah thei lo. Curuangah Pathian in amah rori minung ah rung cang in in hawlsuak a si (Joh. 1:1, 14). Cuih rundamnak cu Jesuh Khrih ah a famkimmi a siih kannih misual pawl hrangah rundamnak maksak a si. Rundamnak timi hi sakhua dang pawlih an neih lomi a siih Pathian ih pekmi kumkhua thil maksak a si.

1.Misual kan si thluh.

Minung kan zatein miṭha tiah kan ruat awk lai ah misual kan si thluh. Sikhalsehla Ca Thianghlim in “Leilung pumpuluk hi sualnak huham hnuai ah a um,” a ti. Curuangah Jesuh Khrih rinsannak thawng lawngih tiam ciami Pathian ih kammi laksawng cu a zumtu hnen lawngah pek a si (Gal. 3:22). Curuangah Paul in, “Kan zatein misual kan si ṭheh ih Pathian sunloihnak kan co baan lo,” a ti (Rom 3:23). Bawi Jesuh cu misual hrangah a thi: “Zianghman ti theimi kan neih lo laifangah Pathian ih khiah mi tikcu caanah Khrih cu misual pawl hrangah a thi” ((Rom 5:6). Miding hrang hmanah mi pakhatkhat thih ding cu a olmi thil a si lo. Miṭha hrang ahcun thih a ngamtu pakhatkhat an rak um khal a si thei. “Sikhalsehla Pathian in ziangtlukinso in duhdawt ti cu a langter: misual kan si hrih na cingin kan hrangah Khrih cu a thi!” (Rom 5:8). Curuangah misual kan siih rundamtu kan ṭul hrimhrim.

2.Rundamtu kan ṭul.

Bawi Jesuh in, “A harhdammi in sibawi an hai lo, mina lawngin an qul a si… Miding pawl ko dingah ka ra lo, misual pawl ko dingah ka ra a si,” a ti (Mat. 9:12-13). Miṭha ih kan ruat awk a si ahcun rundamtu kan ṭul lam kan thei dah lo ding. Misual kan si lam thei awk in kan cohlang awk a ṭul. Bawipa in, “… Nan sualnak cu sen-eu bangin sen hmansehla, vur bangin ka lo thiangfai ter ding; sendup bangin dup hmansehla tuuhmul bangin ka lo vaar ter ding,” a ti (Is. 1:18). Curuangah atu le kumkhua in amah ih sungin Pathian a pantu pawl cu a rundam thei a si; ziangahtile kumkhua ih a nun ruangah Pathian hnenah a dil sak ringring (Heb. 7:25). Mahte rundam aw theitu zohman kan um lo ruangah rundamtu kan ṭul hrimrhim.

3,Bawi Jesuh in rualremnak in tuahsak.

Pathian thawn kan ṭhen awk hnu ah pehzom salnak dingih rualremnak in tuahsaktu cu Bawi Jesuh a si. Ziangahtile Pathian pakhat lawng a um ih minung le Pathian karlakah remnak tuahtu minung palai pakhat a um. Cuih palai cu mi hmuahhmuah tlen dingah a nunnak a petu Khrih Jesuh a si. Cutiin a nunnak a pekmi cu Pathian in a tikcu a kim tikah mi hmuahhmuah rundamsuak a duh, ti langternak a si (1 Tim. 2:5-6). Paul in, “Sikhalsehla atu ahcun in luattertu Khrih Jesuh ih tlennak zaar ah Pathian in a zaangfahnak laksawng cu in pek ih Amah thawn rualremnak in tuahsak zo” (Rom 3:24). Hlanlai ahcun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo. Pathian ih rualpi kan si zo ruangah Khrih ih nunnak in ziangtluk in so in runsuak sinsin ding (Rom 5:10). Khrih in Daan cu a cemter zo ruangah zokhal zumnak a neitu pohpoh cu Pathian thawn rualremnak a ngah a si (Rom 10:4).

4.Bawi Jesuh zumtu cu rundamnak kan co.

Bawi Jesuh zumtu pawl cu rundamnak kan co. Baibal in, “Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding,” a ti (Joh. 3:16). Pathian in in duhdawt ruangah a duhdawtnak cohlang in amah kan zum ding a ṭul. Pathian in a Fapa cu a duhdawt ih ziang hmuahhmuah a kut sungah a pek: “Fapa a zumtu cun kumkhua nunnak a nei; Fapa ih thu a eltu cun nunnak a nei lo dingih Pathian ih thinhengnak a tuar ding,” (Joh. 3:36). Paul in, “Khrih Jesuh cu misual pawl rundamsuak dingah leilung ah a rung ṭum, timi hi a dikmi ṭong a siih  famkim zetin pom tlak le zum tlak a si. Cuih misual pawl lakah kei hi misual bik ka si” a ti (1 Tim. 1:15). Bawi Jesuh cu misual rundam dingah a ra a si: “Milai Fapa cu a hlomi hawl ding le rundam dingah a ra,” (Luk. 19:10). Rundamn ak cu kan ṭuannak ruangah si loin Pathian ih laksawng a si: “Ziangahtile nannih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si” (Efe. 2:8).

Thunetnak.

Pathian in Bawi Jesuh timi thutak thei thluh dingah in duhsak. Curuangah leitlun ah a rung ṭum ih in hawl a si. Rundamnak cu minung ih tuah theimi a si lo. Asinain cohlan ding hi minung ih tuah ṭulmi a si. Bawipa in rundam in duh ruangah kan thinlung sangka in king. Kannih in kan onsak a ṭul: “Ngaihnik! sangka kiangah ka dingih ka king. Zokhal ka aw a thei ih sangka i ontu cu a innah ka lut dingih a hnenah rawl ka ei ding; cule anih khal keimah thawn a ei ve ding” (Thup. 3:20).

Rundamnak maksak in petu a nung Pathian kumkhua in sunglawi sinsehlaw. Amen.

~Rev. Dr. Hrang Hmung, D.Min., Ph.D.,

Toungphila, Kalaymyo.

February 18, 2017|Saturday|10:00pm.