“Nanmah lakah fimnak a tlasammi nan
um ahcun Pathian hnenah dil sehla Pathian in a pe ding. Ziangahtile zohnen
khalah Pathian cun siangzet le zaangfahnak thawn a pe a si. Sikhalsehla cutiin
a dil tikah thinlung ṭhukṭhunnak um lo tein a dil pei ih ka ngah rori ding tiin a zum
pei. Thinlung ṭhukṭhunnak
a neitu cu thli in hmun kipih a semi tifinriat tisuar bangtuk a si” (Jeim
1:5-6).
Zumtu cun Pathian hnenah thla kan
cam ringring ko. Kan thlacam a kimmi
tampi a um vekin kan ngah lomi khal tampi a um ko ding. Baibal sung hmun tampi
ah Pathian in a minung pawl hrangah uimi zianghman a nei lo tiah a um. A
sersiammi minung hrangah ziangkim co thluh dingah in tuahsak. A sile ziang
ruangah kan thlacam a kim ṭheu lo a si pei? Jeim in Pathian hnenah dil sehla Pathian in
a pe ding, a ti rori fawn. Himi thu ah a tanglam vekin thazang lak cio uhsi.
1.
Pathian ih sinak.
Pathian in amah le amah tuukhal ṭha thawn a tahṭhim aw (Joh. 10). Cuihtlunah pa sinak dinhmun khal in a
tarlang aw (Luk. 15). Minung ih ṭulsammi pawl, tuartehmi pawl kha a hnong dah hrimhrim lo.
Midang cun kan ṭulmi a tamtuk tikah mawhthluk awknak a um ṭheu ko nain Pathian cun amah rinsan le a hnenah a diltu pawl
cu ziangtik khalah a el dah lo. A pek tik khalah pek menmen lawng si loin
duhdawtnak taktak thawn in pe ringring. Curuangah Paul in, “Kan sungah a huham
in hna a ṭuantu cun kan dil theimi le kan ruah theimi hnak hmanih let
tampi in a ṭuan thei a si” a ti (Efe. 3:20).
Kan dil theimi le kan ruah theinak
hnakih ṭha sawn in pe theitu a si. Curuangah Pathian hnenih kan dil
tikah rinsan taktak a ṭul.
Pathian in kan dilmi ruangah in mawhthluk lo ding, siangzet le zaangfahnak
thawn in pe rori ding a si. A co dingmi ro hmuah lakin nomnak a hawltu fapa
nautasawn kha siirnak taktak thawn a kirsal tikah lungkimzet in a cohlang.
Culawng si loin a ṭhabik zate thawn a hmuak hai. Sualnak sungah ziangtluk
hloral in kan pil rero hmanah siirnak thawn a kirtu fapa hlo bangin in cohlang
ringring lai. Thilṭha famkim ui loin in pe siangtu le in cohlangtu a si.
2.
Thinlung ṭhukṭhunnak ih
umzia.
Kan thlacammi a kim le kim lo thu
kan zoh tikah Pathian a buai lo nain minung in kan buaipi ṭheu. Pathian cun nan dil le nan ngah ding, tiah fiangzet in
a sim cia zo (Mat. 7:7). Dil ih ngah thei lomi tampi a um sisi kan ti men ding.
Bawi Jesuh ih ṭongkam kan zoh tikah dil uhla nan ngah ding timi lawngin a
cem lo, hawl uhla nan tong ding a ti hrih. Curuangah kan dil ih kan ngah lo
ahcun kan hawl a ṭul. Jeim cakuat sungah Pathian ih simmi cu thinlung ṭhukṭhunnak
a nei ahcun Pathian hnen ihsin zianghman a ngah lo ding, a ti. Cutin a sile kan
thlacammi a kim lomi hi Pathian kan zumnak a famkim lo ih thinlung ṭhukṭhunnak
kan nei ruangah a si tengteng ding.
Thinlung ṭhukṭhunnak
a neitu cu Baibal ih a simcia vekin thli in hmun kipih a semmi tifinriat tisuar
bangtuk a si, a ti. “Tisuar” hi kan zoh a sile tikap ih ummi lungto vek a si
lo. Lungto cu ziangtluk thlisia hraang hmanah a hnin hrimhrim lo. Tisuar cu thli
hrannak lam panin a fen vivo. Curuangah kan zumnak hi thli ih a hranmi vekin a
fen vivo ahcun na thinlung a hnget lo, ṭhukṭhunnak
na nei tinak a si. Na tuahmi tinkim hi a hnget dah hrimrhim lo ding. Kiangkap
dinhmun zoh in a vaivuanter ṭheu. Cuvek thinlung ṭhukṭhunnak
a neitu cu Pathian in a duh lo. Cuih thinlung cun Pathian hnen in zianghman a
ngah dah lo ding. Thla na cam tikah na zumnak kha cekfel hmaisa aw. Pathian cu
zumnak vekin petu a si (Mat. 8:13). Na zum taktak lomi cu na co ngah dah lo
ding.
Thunetnak:
Pathian hnenah kan dil tikah Pathian
ih thil titheinak kan zum taktak ding a ṭul. A zum ngamtu hrangah a zumnak
vekin Pathian cun a pe ringring ko. Ngah lo ding le famkim lo ding zum cianak
thawn kan dil ahcun zianghman a famkim dah lo ding. Mi pakhat ih thlacam cu
hitin a si: “Pathian, nang cu ziangkim tuahtu na si, ziangkim pe theitu na si.
Ka thlacammi khal in pe thei rori tiah ka zum. Himi ka lo dilmi hi atu rori ah
na famkimter thei tiah ka lo zum… Amen” a ti. Thinlung takin thla ka cam a
tiih thlacam a ṭheh in a mit a meng tikah a dilmi zianghman a um lo. Cutikah
“a um lo ding ka zum cia tho” a ti. Cutin ngah lo ding zumcia ih thla kan cammi
cu ziangtin a duhmi a kim thei pei? Thinlung ṭhukṭhunnak
nei loin ngah rori ding timi zumfeknak thawn thlacam ringring uhsi.
A thu kan phuangmi hmangin Pathian
sunglawi sinsehlaw. Amen.
~Rev. Dr. Hrang Hmung, DMin., PhD.,
Toungphila, Kalaymyo.
November 12, 2016|Saturday|6:06 pm.
No comments:
Post a Comment