THUTAK SUNGAH NUNGCANG

“Thutak cu nan thei dingih cuih thutak cun a lo luatter ding” (Joh. 8:23).

Zumtu cu rundamtu Jesuh Khrih timi Thutak kha thei, cohlang ih a zumtu pawl kan si. Curuangah zumtui’ nitin kan nunnak ah thutak thawn nung ding hi a thupi ngaingai. Baibal ih zirhmi thutak thei in kan nunnak nunpi cio ding hi a thup zet. Bawi Jesuh in, “Thutak cu nan thei dingih cuih thutak cun a lo luatter ding” (Joh. 8:23) a ti. Thutak sungah nungcang daan pawl zoh in thazang lak tlang cio uhsi.

1. Nu le pa upat peknak.

Nu le pa upat pek hi Baibal ih zirhmi sungah a thupizetmi zirhnak pakhat a si. Thukam pahra sungah nu le pa upat ding thu a tel (Suahlan 20:12). Cuih thu cu Paul in, “Nan nu le nan pa upat uh, timi thukham hi Na lam a tlung dingih leitlunah na nun a sau ding, timi thutiamnak an beetmi thukam hmaisa bik a si” a ti (Efe. 6:2-3).

2. Thil ṭha tuah ringring.

Minung cu a sia le a ṭha thleidang thiam in nung ding hi a thupi zet. Paul in, “Mi ṭhenkhat in thil ṭha an tuah ringring ih sunlawinak, hminṭhatnak le kumkhua nunnak an hawl. Cu pawl cu Pathian in kumkhua nunnak a pe ding” a ti (Rom 2:7).

3. Thinsaunak.

Thinsaunak hi kan nunnak ah a thupi zetmi a si ko nain a tak ih nunpi dingah a harzetmi a si. Paul in, “Thinlung neemnak nei uh; tangdor le thinsau in um uh. Duhdawtnak nan neihmi kha pakhat le pakhat nan zawiawk theinak in langter uh” tiah thu in tiam a si (Efe. 4:2).

4. Rintlak sinak.

Pakhat le pakhat parah rintlak zet ih nung ding hi man a nei zetmi a si. Rintlaknak hi kan nunnak ah kan pomhnget ringring a ṭul. “Khuapi kotka pawl cu on uhla, Rintlakzet miphun cu luh ter uh. a dikmi lawng a tuahtu miphun cu! Maw Bawipa, daihnak famkim cu nangmah in na pe. An tumtahmi ah a hngetmi le nangmah a lo ringtu hnen ahcun!” (Isa. 26:2-3).

5. Felnak.

Felnak le rintlak sinak hi hmunkhat ah an fehtlang ringring. Thufim ngantu in, “Na hnen ihsin felnak le rintlak sinak khan ziangtik hmanah lo suahsan hlah seh. Na hngawng ah ngerh awla, na thin sungah ngan aw,” tiah in zirh (Thuf. 3:3).

6. Thinlung tangdornak.

Minung hi kan thinlung a hak ih kan puarthau thei zet. Bawi Jesuh Khrih in, “Thlarau lamah ka farah ti a thei awtu pawl cu mi thluasuak an si. Ziangahtile vancung Uknak cu anmah ih ta a si,” tiin thinlung tangdornak nei dingah in cah ta a si (Mat. 5:3). Piter in, “Curuangah a cakmi Pathian ih kut hnuai ah tangdorte in um uhla amah in caan a kim a ti tikah a lo khaisang leh ding,” a ti (1 Pit. 5:6).

7. Dingfelnak.

Bawi Jesuh in leitlun thilri ah buai loin Pathian Uknak le a felnak hawl hmaisa dingah in cah (Mat. 6:33). Saam cangantu in, “Miding pawlin hi ram cu an luah dingih hnangamte in kumkhua in an um ding… Miding pawlih runnak cu Bawipa hnen in a ra. Harsatnak caan ah an beunak lungpi a si” a ti (Saam 37:29, 39).

8. A netnak tiang dinghnget theinak.

Thil kan tuahmi pawl hi caan tawite hrangah si loin a netnak tiang kilkhawi ding hi a thupi ngaingai. Bawi Jesuh in, “Sikhalsehla a netnak tiang a dinghnget theitu cu rundam a si ding,” tiah a net tiang dinghnget theinak a thupizia a simmi kan hmu thei (Mat. 24:13).

9. Cat loin lungawinak.

Minung hi lungawi thei, riahsia theimi kan si. Cumi cu kan nunnak ah a thleng aw rero. Paul in, “Bawipa thawn nan pehzom awknak ahhin nan lungawi ringring hram uh; ka nolh sal hrih ding: nan lungawi hram uh!” tiah cat loin lungawinak nei ringring dingah in forh a si (Fil. 4:4).

10. Midang parah tuahnak.

Minung timi cu mai’ zawn lawng a ruattu kan si tlangpi. Sikhalsehla Bawi Jesuh in, “Mi in kan parah tuah hai seh ti nan duh vekin midang parah tuah ve uh. Himi hi Moses Daan le profet pwl thuzirhnak ih sim duhmi taktak cu a si,” tiah midang parih kan tuah ṭulmi kha a simfiang a si (Mat. 7:12).

Thunetnak.

Tirhthlah Johan in, “Ka faale pawl thutak sungah an nungcang ti ka theih hnakih ka lung i awitertu thu dang a um nawn lo,” tiah thutak sungih nung thawn pehpar aw in thu in cah hai (3 Joh. 4). Curuangah Thutak kha a theitu men lawng si loin kan nun ah nung camcin ding hi a thupi zet a si.

~Rev. Dr. Hrang Hmung, D.Min., Ph.D.,

Toungphila, Kalaymyo.

February 11, 2017|Saturday|11:00pm.