KAN HNANGAMNAK

“A thimmi thihnak horkuam sung zawh hman ningla, Maw Bawipa, ka ṭih lo ding; ziangahtile nang cu ka hnenah na um. Na talhtum le na kianghrol in ka hna in ngamter” (Saam 23:4).

Kan biakmi Pathian cu kan hnenah in umpi ringringtu Immanuel Pathian a si (Mat. 1:21). A sersiammi minung pawl hnenah “san a cem lai hlan lo nan hnenah ka um ringring ding,” a ti (Mat. 28:20). Curuangah cuih a nungmi Pathian a biaktu hmuahhmuah hrangah hnangamnak a si. Amai’ humhimnak hnuai ih a ummi zumtu hrangah ziangvek dinhmun le tikcu caan khalah ṭihphan ding zianghman a um lo. 

1. A thimmi thihnak horkuam.

“A thimmi thihnak horkuam” timi cu ziang a sim duhmi a si pei? Kawl ṭong cun “thihnak ih a khuhmi phenthlam” a ti. Phenthlam cun mi a siatsuah thei lo. Cuvekin minung pawlih kan tuar ṭheumi harsatnak, mangbang vansannak, natnak le thihnak pawl hi caan reipi kan tuarmi an si lo. Kan tuar caan hi “a langte” sung lawng a si. Sualnak ruangih kan tuar dingmi hmuahhmuah Bawi Jesuh in thinglamtah parah in tuarsak thluh zo. Kan ai-ih Bawi Jesuh tuarnak ruangah ziangkim a ṭheh thluh zo, kan hrangah ṭih ding zianghman a um nawn lo (Joh. 19:30). Saam cangantu cun Pathian in in umpi ti a theifiang tuk. Curuangah a thimmi thihnak horkuam sung zawh hman sehla phan ding a um nawn lo, ṭih ding khal a um nawn lo. Kan hrangah Jesuh Khrih in ziang hmuahhmuah a tuar ṭheh zo, ih nehtu a si zo (Rom 8:37).

2. Nang cu kan hnen ah na um.

Tuukhaaltu cu a tuu kiangah a um ringring ṭheu. Cumi cu tuu pawl hi khua hmuhtheinak an neih ṭhat lo tikah hmuhnak rinsan in an feh thei lo ih theihnak sawn rinsan in a feh ṭul ruangah a si. Tuukhaaltu ih “aw” ngai ringring an ṭul. Zumtu pawl khal tuu vek kan si. Kan hmai ah ziang a ra ding timi kan hmuban lo. Tuu pawlin tuukhaaltu ih aw an ngai vekin kan Bawipa Jesuh ih aw ngai in kan nun ih kan thlun a ṭul (Joh.10:3-4). Kannih cu rinnak in kan nung ih hmuhnak in kan nung lo (2 Kor. 5:7). Hmuh theimi thil rinsan loin hmuh thei lomi Pathian ih aw ngai ih nung dingmi kan si. Tuukhaaltu in a tuu pawl kha awsuak ih a biak ṭul ruangah a tuu kiang naite ah a um ringring. Tuupawl cu tuukhaaltu ih aw an thei lo tikah an thin a phang. Kannih zumtu pawl khal “Bawipa ih aw” a thei ngah lotu kan si ahcun thinphannak in a khat ding. Bawipa cu kan hnenah a um ringring timi thei in a aw kan thei theinak dingah nitin Baibal siar in thazaang kan lak ringring a ṭul. Thla kan cam ringring a ṭul.

3. Ka hna in ngamter.

Hnangamnak timi hi a thupi zetmi a si. Saam cangantu hrangah a nun hnangamtertu cu Bawipa ih “talhtum le kianghrol” a si. Himi thil pahnih hi tuukhaaltu ih kut ah a um ringring. “Talhtum” cu siatsuah ding ih a rami kiosa le sahrang pawl lak ihsin tuu pawl kilhimnak ding hrangih hmanmi a si. “Kianghrol” cu tuu pawl zin pial an zawh tikah zin dik lam an zawhsal theinak dingah an hngawng ih kawihkirnak ah an hmang. Himi talhtum le kianghrol hi “Thlarau Thianghlim le Baibal” a hmuhsak kan ti le a palh lo ding. Khristian nun ah kan ṭhanlen vivo theinak ding ah le kan nun kilhimtu dingah Thlarau Thianghlim le Baibal ih lamhruainak hi kan ṭul bik (2 Tim. 3:15-16). Pathian thu sungih kan ṭhanlen theinak dingah a ṭongkam Baibal in lam in hruai ih Thlarau Thianghlim Pathian cun in kilhim ringring a si.

Thunetnak.

Pathian cu hmun hlapi ah a um lo, kan hnenah a um ringring. Curuangah zumtu kan nunnak ah a thimmi thihnak horkuam sungah kan zawh caan a um hmanah ṭihphan ding zianghman a um lo. Ziangahtile ziangkim sersiamtu Pathian cu kan hnenah a um ringring ruangah amah rinsantu hrangah nun hnangamnak thawn a famkim a si. Pathian hmin sunglawi sinsehlaw.

~Rev. Dr. Hrang Hmung, D.Min., Ph.D.,
Toungphila, Kalaymyo.