IN RUNTU BAWIPA

“Mi zonzai pawl in amah cu an zoh ih an lung a awi. Ziangtik hmanah an ning a zak nawn lo. Bawmtu nei lo pawlin amah an ko ih a sawn hai. Bawipa a ṭihzahtu pawl cu a vancungmi in an kil ih, ṭihphannak in a run hai a si” (Saam 34:5-7).

Leitlun minung kan zatein zonzai kan tuar thluh. Baibal in, “Nunau sungsuak milai hmuahhmuah an nun a tawi ih zonzaih an tuar,” a ti (Job 14:1). Minung kan zatein nunau sungsuak kan si ruangah zonzaih kan tuarnak a si timi a fiang zet. Kanmahtein kan tungding thei lo ruangah bawmtu kan ṭul. Ṭihphan dingmi kan nei thluh. Kan zonzai tuarnak, bom ṭulnak le ṭihphannak ihsin in luatter theitu cu Bawipa lawng a si. Pathian hmin thangṭhat in um seh! Kan tuah thei lomi pawl ihsin thazang in neiter ih luattnak in petu, ziangkim in tuahsaktu cu amah Pathian thotho a si. Saam cangantu in cuih thu a theifiangtuk ruangah himi Baibal caang hi a ngan suak a si.

1. Bawipa ah kan lungawinak a um.

Minung ih sualnak ruangah nun hnangamnak a cem. Cuticun nun lungawinak nei a thei nawn lo. Baibal in, “lung tluang lo in lungawinak a tong thei lo,” a ti (Thuf. 17:20).  Kan lungawinak le kan riahsiatnak pawl cu kanmai’ ta a si. Zohman in in ṭawmpi thei lo (Thuf. 14:10). Sikhalsehla Bawipai’ mi pawl ih lungawinak cu leitlun thil ihsin a rami an si lo. Bawipa ah kan lungawinak a um. Saam cangantu in, “Bawipa ah na lungawinak hawl awla, na lungthlitum a lo pe ding,” a ti (Saam 37:4). Hosea in, “Bawipa hnenah kirsal uhsi. In bauhthlek ṭheh zo nain amah thotho in in damter ding. In tuahmawh zo nain kan hma in tuamsak ding,” tiah in sim (Hosea 6:1). Hebru ngantu in, “Cuti a si ruangah lungawi aipuang in um uhsi. Ziangahtile hnin a theih lomi uknak kan co a si. Pathian hnenah kan lungawinak langter uhsila a lungawi zawngin Amah cu upatnak le ṭihzahnak thawn bia uhsi,” (Heb. 12:28). Bawipa kan zoh tikah kan lung a awi ringring dingih ziangtik khalah kan ning a zak nawn lo ding a si.

2. Bawipa cu in bawmtu a si.

Israel pawl thuanthu kan zoh tikah Bawipa in an lamtluan ah a hruai hngai ih a bawm vivo tiah kan hmu thei. Curuangah Samuel in lungto a lak ih Mizpah le Shen khua karlak ah a phun ih, “Bawipa in lamzin tluan in bawm a si,” a tiih “Ebemnezer,” tiah hmin a sak. “Ebenezer” ti cu “Bomnak lungto” tinak a si (1 Sam. 7:12). Misual pawl in duhdawttu le in zaangfahtu cu Bawipa a si. Curuangah kan sualnak cu Pathian hmaiah thup loin phuang a ṭul:  “Na sualnak thuh na tum ahcun na hlawhtling dah lo ding; Na sualnak cu phuang in hlonhlo aw, Pathian in a lo zaangfah ding,” (Thuf. 28:13). Bawipa cu kan sualnak ihsin luatnak dingah in runtu, in bawmtu a si. Sual ruangih donhar in kan um ahcun “Donharnak in na lungawinak a dawi hlo ding…,” (Thuf. 12:25) timi kan mang hram pei. Piter cun, “Nan donharnak hmuahhmuah cu Amah ih hnenah ṭhum cu, ziangahtile Amah cu nan zawn a lo ruattu a si,” a ti (1 Pit. 5:7). Bawipa cu kan sual thlahnak hrangah in bawmtu umsun a si.

3. Bawipa cu ṭihphannak lakin in runtu a si.

Leitlun kan nun hi ṭihphan ding lawngin a khat. Cuih ṭihphannak cu kanmah tein kan hlon thei lo. Sikhalsehla Bawipa cu ṭihphannak lakin in runtu a si. Bawipa in, “Zianghman ṭih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding. Ka lo hum dingih ka lo run ding,” a ti (Isa. 41:10). Thinphang ih kan um tikah Bawipa kan thlir thiam ding a thupi. Mikah cun, “Sikhalsehla kei cun Bawipa ka thlir ding. Thlangamtein i runtu Pathian cu ka hngak dingih amah in i hum ding. Ka Pathian cun ka aw a ngai ding,” a ti (Mikah 7:7). Bawi Jesuh in, “Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding,” in ti (Mat. 11:28). Bawipa in, “Nan Pathian ka si ih ka lo kil ringring ding. Na ṭuakpar le na tarkun tiang ka lo cangcawi ding a si. Ka lo tuah ih ka lo kilveng ringring ding. Bomnak ka lo pe dingih ka lo hum ding,” a ti (Isa. 46:4).

Thunetnak.

Kan biakmi Pathian cu ziangkim tithei, sersiamtu, kumkhua a nungmi, huham nei Pathian a si: “Keimah cu Bawipa ka si, mi hmuahhmuah ih Pathian ka si. Ka hrangah zianghman a harmi a um lo,” (Jere. 32:27). Mi zonzai pawl hrangah Bawipa ah kan lungawinak a um. Kan hrangah bawmtu ṭhabik a siih ṭihphannak sungin in runtu a si (Saam 34:5-7). In runtu Bawipa lawng hi kan lungawinak famkim a si. Kan ṭulnak vekin in bawmtu a si. Ṭihphannak lakin in runtu a si. A hmin kumkhua in thangṭhat in um seh!

~Rev. Dr. Hrang Hmung, D.Min., Ph.D.,

Toungphila, Kalaymyo.

February 4, 2017|Sat|9:40 pm.