KA ZUMMI CU KA THEI

“Hi bangtuk ih ka tuarnak cu cutiih in hrilnak ruangah a si. Sikhalsehla ka rinsan ngahmi hi zo a si ti ka theih ruangah hnangam lunghmuinak ka nei. Curuangah a kut sungih ka kiltermi thil cu cuih Ni a thlen tiangin himtein amah in a kilkhawi ding tiah fiangtein ka thei” (2 Tim.1:12)

Zumtu tampi cun mai’ zummi (rinsanmi) hi ziangbik a si timi a theifiang lo tampi kan um. Mai’ pommi ziangbik a si timi hman theifiang lo khal tampi kan um. Curuangah dinhmun hnget ngaingai nei loin kaing le kap um daan zoh in laiking bang ih ṭhawn aw rero mi zumtu khal an um rero. Zumtu hmaisa pawl cun an dinhmun fiangzet in an thei ruangah ralṭha zetin an um. Piter le Johan khal Khonsil upa pawlin Jesuh hmin in zohman zirh lo ding le zo hnen hmanah thu sim hrimhrim lo dingin an dawn. Sikhalsehla Piter le Johan cun an zummi an theifiang tuk. “Nanmah ih thu thlun maw Pathian ih thu thlun so Pathian hmaiah a dik sawn, nanmahte in ṭhen hnik uh. Ziangahtile kanmah rori in kan hmuhmi le kan theihmi cu sim loin kan um thei lo,” an ti (Tirh. 4:19-20; cf. 5:29). Zumtu kan ti-aw ko nain mai’ zummi theifiang lotu kan si pang lo ding a thupi zet.

1. Zummi a theifiangtu pawl cu an hnget ringring.
Daniel cu a zummi a theifiang tuk ruangah siangpahrang ih thupek thlun loin Pathian hnenah thla a cam ringring (Dan. 6:10). Cuih thu cu amah a huatu pawlin an thei tikah siangpahrang hnenah an sim. Siangpahrang khal in daan a um vekin kiosa thawng sungah a thlak ko nain Daniel cu a luat thotho. A zummi (rinsanmi) zo a si ti a theifiang ih hnget zetin Pathian a rinsan ruangah a him ih a luatnak a si (Dan. 6:23). Zumtu tampi kan hnget lonak cu kan zummi kan theifiang lo ruangah a si ṭheu.
Pathian thu cu kumkhua in a hmun ringring. Cuih Pathian thu parih a umtu cu an umnak a hnget vekin anmah khal an hnget ve a si. Kan zumnak hrampi a fek taktak ahcun kan hnget ringring thei ding. Kan zumnak hrampi hi a thupi zet. Mifim lungpi par ih innsaktu vekin kan zumnak a hnget ding a thupi ngaingai (Mat. 7:24-25). Kan zummi kan theihfiang lo ahcun kan hram a hnget lo ding.

2. Zummi a theifiangtu pawl cu tuar an ngam.
Kawhhran thuanthu kan zoh tikah zumtu hmaisa pawl cu an zummi an theifiang ruangah Jesuh Khrih hrangah ziangvek harsatnak khal ralṭha zetin an tuar ngam. Tirhthlah pawl khal a hmaisa ahcun an ṭihhrut zet nain an zummi an theifiang tik ahcun Jesuh hrangah ningzah mualpho tuar dingin ruah an si ruangah an lung a awi zet (Tirh. 5:41). Zummi a theifiangtu cun ziangvek harsatnak a um hmanah dungsip loin hmai an nor sinsin. Jesuh Khrih zumtu an si ruangih tuar ding khal an ṭih hrimhrim lo. Piter cun, “Khrih ih tuarnak a hlawm-awmi nan si ruangah nan lungawi sawn uh,” a ti (1 Pit. 4:13). Jesuh ruangih thluasuah co kan duh vekin tuar ding khal ngam dingmi kan si. “Khristian nan si ruangih nan tuar a si ahcun nan ningzak hlah uh; Khrih hmin a kengtu nan si ruangah Pathian hnenah nan lungawi sawn uh,” (1 Pit.4:16). Zummi a theifiangtu pawl ih tuar ngamnak cu a man khung zetmi tuarnak a si.

3. Zummi a theifiangtu pawl in an phatsan dah lo.
Babilon siangpahrang Nebuchadnezzar in sui thawn tuahmi milem biak dingah a rammi hmuahhmuah a fial hai. Sikhalsehla a nung Pathian a biatu Shadrak, Meshak, Abednego te pathum cun milem an bia duh hrimhrim lo. An simmi cu, “Meisa alh sungin in hum theitu Pathian a um a si ahcun kan biakmi le kan rinsanmi kan Pathian lawnglawng a siih amah cun in hum ko ding. In hum lo a va si hman ah… na khawzing pawl hmai khalah kan kun lo ding, ti cu in theisak cia aw,” ti a si (Dan. 3:17-18). Annih cun an zummi an theifiang tuk ruangah siangpahrang thu khal an ṭih lo, an el ngam mai. Tulai zumtu pawl teh hivek dinhmun kan thlen cun ziang kan bang pei? Zumtu hmaisa pawl cun ziangvek thu harsa a um khalle Jesuh hi an phatsan hrimhrim lo. Thawng thlak an tuar, hremnak an tuar ih thah tiangin an tuar ngam. An zummi an theifiang tuk ruangah a si. Zummi a theifiangtu pawl cu an biakmi hi ziangtik khalah an phatsan dah hrimhrim lo.

Thunetnak.

Paul cun a zummi a theifiang tuk ruangah, “Hi bangtuk ih ka tuarnak cu cutiih in hrilnak ruangah a si. Sikhalsehla ka rinsan ngahmi hi zo a si ti ka theih ruangah hnangam lunghmuinak ka nei. Curuangah a kut sungih ka kiltermi thil cu cuih Ni a thlen tiangin himtein amah in a kilkhawi ding tiah fiangtein ka thei,” a ti (2 Tim.1:12). Zummi a theifiangtu pawl cun ziang kan tuah ti khal an theifiang aw. An zummi parah hnget zetin an hmun. Tuar ding ziangvek a um khalle an tuar ngam. Ziangtik khalah an phatsan dah hrimhrim lo. Zumtu unau, nang teh na zummi na theifiang taktak maw?

~Rev. Dr. Hrang Hmung, D.Min., Ph.D.,

Toungphila, Kalaymyo.

November 26, 2016|Saturday|8:50pm.