BAWIPA CU KA TUUKHAAL A SI

“Bawipa cu ka tuukhaal a si; Sammi zianghman ka nei lo. Tlimno lakah i bawhter ih a thiangmi tidai kiang ah i hruai” (Saam 23:1-2).

Saam hlabu hi David ih nganmi a si tiah kan thei bik. A hleice in Saam hlabu siar in zumtu tampi hrangah thazaang tampi in pe ṭheu. Saam hlabu kan siar tikah minung kan nunnak ih kan tonmi thuhla zate thawn pehparnak a neihzia kan thei thei. A hleice in Saam 23 hi zumtu pawlih kan nun a hip zetmi a si. Himi Baibal caang hmangin thazaang kan lak tlang ding.

1. Bawipa cu ka tuukhaal a si.

Leitlun ah “bawi” a phunphun a um. A hrek cu a kuttang pawl hrangah ziangkim tawlrel saktu an si. A hrek cu mai’ duhnak lawng ruatih tawlreltu an si. Saam cabu sungih kan hmu mi “Bawipa” cu a minung pawlih ṭulsammi hmuahhmuah, a hleice in thinlung, taksa le thlarau lam ih ṭulmi tiangin a pe theitu a si. Curuangah Saam cangantu ih simmi “Bawipa” cu amah a rinsantu pawl hrangah an nunnak ih ṭulsammi hmuahhmuah pe thluh theitu a sizia a langfiang ngaingai.

Cuih Bawipa cu a minung pawl khaaltu lole  tuukhaal a si. “Bawipa cu ka tuukhaal a si” a ti tikah Bawipai’ ta a sinak a langter. Midang ta a si hrimhrim lo. Tuukhaal timi cu tuu a khaal tikah hmunhla ihsin a khaal dah lo. Tuu pawl kiang ah a umpi, an lak ah a tlangleng ve. Tuu pawl ih tlaksammi a theisak ih a tuah sak thluh. Ziangtik hmanah a tuu pawl kha a mit in zoh men loin an ṭulnak vekin a bawm ih a kilhim ring ring. A tuu pawl ih fehnak ding lamzin cu an hmai ihsin kaihruai in a khihhmuh ringring ih a dung in tuurunrual khalin an thlun ve. Cuvekin kan Bawipa cu kan hnenah a um ih in kilveng. Kan ṭulmi hmuahhmuah in tuahsak thluh. Zinpial zawh lo dingah in kaihhruai ringring a si.

2. Sammi zianghman ka nei lo.

Kan umnak leitlun hi duhkim lonak ram a si. Curuangah leitlun ah kan ṭulmi lawngte an si. Sikhalsehla cuih leitlun ih tlangleng ve sisi, sammi zianghman ka nei lo timi cu ziangtin a si thei pei? Ziangruangah Saam cangantu in hitin hla a phuah thei? A si, nitin ṭulsammi pawl pe theitu Bawipa kha amai’ ta ih a neih ruangah a si. Cuih Bawipa cu in cawmtu a si, in petu a si, ka ṭulmi zate in pe theitu a si timi a theifiang tuk ruangah sammi zinghman ka nei lo tiah Saam cangantu in a sim theinak a si. Hlaphuahtu in “milian bik ih fahniang kan si” a ti bangin a Bawipa ih neihmi cu a fahniang kannih zumtu pawl hrangah a si. Curuangah amah a rinsantu hrangah sammi zianghman a um lo.

3. Tlimno lakah i bawh ter.

Palestine ram hi nelrawn ram a si ruang ah hmun tinkim ah hrampi a kheu thei ve lo. Hrampi a kheu theinak hmun lawngah an kheu thei. Tuukhaaltu in tuu a khalh tikah hrampi qhatnak hmun ah a hruai ṭheu. Cuih hmun ahcun a tuu pawl bok dingin thu a pek ṭheu. Cuvekin kannih zumtu pawl khal in tuukhaaltu Bawipa in kan nunnak hi a ṭhatnak hlir in in hruai ih in cawl ter ve. Kan nun ah duhham tuk ih um ding kan si lo. Sikhalsehla ziangkim a tluang zutzo ding tinak a si thluh lo. Harsat caan le buai caan a um ko ding nain Bawipa in in hum ringring. Ziangvek dinhmun kan um hmanah kan sinak le neihzat parah lungkim thiam ding hi a thupi ngaingai (Heb. 13:5).

4. A thiangmi tiva kiang ah i hruai.

Tuu pawl in tidai rim an thei thei lo, an hmailam hlapi khal an hmu thei lo. Tuukhal ih hruainak thlun vivo in an um. Cutik lawngah tihaal caan ah tiva kiangah in ding tidai a pek hngai. Kan nun hruaitu Bawipa ih in hruai lo ahcun kanmah tein a ṭha le a sia kan thei ban thei lo. Curuangah Bawipa in kan nunnak in hruai ringring ding a ṭul. Kan nun ih ṭulmi hmuahhmuah in pe theitu Bawipai’ dungah kan thlun ringring a ṭul. A thu sungih kan um ringring theinak dingah Thlarau Thianghlim in lam in hruai ringring (Joh.7:38-39).

Thunetnak.

Saam cangantu ih simmi vekin kan nun ah sammi zianghman nei lo dingah, tlimno lakah in bawh ter ih a thiangmi tidai kiangah in hruaitu Bawipa cu kan rinsan ding a ṭul. A fehnak lamah thlun vivo in a hruainak hmun ah kan feh ahcun lam kan pial dah lo ding. Bawipa cu ka tuukhaal a si, tiah kan ti vekin a hruainak ah thlun vivo ding kan ṭul.

~Rev. Dr. Hrang Hmung, Ph.D.,

 Camkhat Naypyidaw.

January 14, 2017|Sat|10:00 pm.