RUNTU BAWI JESUH

“Amah in fapa a hring dingih a hmin ah Jesuh tiah na sak pei. Ziangahtile a minung pawl kha an sualnak ihsin a runsuak ding a si” (Mat. 1:21).

Bawi Jesuh suahni cekci zohman in kan thei lo. A suahni lawmnak tuah ding khal in fial lo. Sikhalsehla zumtu pawlin kan biakmi Pathian cu van sunlawinak tanta in hi leitlun ah a qum. Minung sinak in a piang ih kannih misual pawl rundamtu dingah a suak timi hi thupi zetih kan retmi a si. Curuangah Bawi Jesuh ih suahni cu zumtu hmuahhmuah in lungawi le sunglawi zetin kan hmuak ih kan lawmnak a si. “Christmas” ih a laimuril cu “Pathian in leilung hi a duhdawtzet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding,” timi a si (Joh. 3:16). “Christmas” hi Pathian in a hmuihmel kengih sersiammi minung pawl a duhdawt tuk ruangih a rahsuahmi a si.

1. Pathian a sinak.

“Kan hnenah naute a suak zo; kan hrangah fapa pek a si zo…” (Is. 9:6) timi Baibal caang kan siar tikah Bawi Jesuh minung sinak a lak hlanah Pathian sinak thawn a khah zia a lang ter. Minung ah a cannak ding thu hi khuahlan lai, a liam zomi san ihsin a rak thok zo tiah kan hmu thei (Mikah 5:2). Minung tisa ih a cannak thu cu Thukam thar sungah fiangtein kan hmu thei fawn: “A hramthokah Thu a rak um. Cuih Thu cu Pathian thawn a um ih Pathian a si… Cuih Thu cu minung ah a cangih kan lakah a um…,” tiah Johan in a simfiang (Joh. 1:1, 14). Paul in a sim bet ve – “Khrih cu Pathian sinak a nei ringring…” (Fil. 2:6), “Khrih cu hmuh theih lomi Pathian ih hmuihmel langnak a si…” (Kol. 1:15-17).  Pathian sinak cu Khrih a minung sinak sungah famkim zetin a um (Kol. 2:9). Alfa le Omega a si (Thup. 1:8). Himi lawng si loin Pathian a sinak thuhla tampi Baibal sungah hmuh ding a um.

2. Minung a sinak.

Bawi Jesuh cu suahkehnak cithlah felfai zetin a neitu a si (Mat. 1:1-17; Luk. 3:23-38). Mari pum sung in a suak (Mat. 1:20; Luk. 1:26-37). Minung vekin a suak (Mat. 1:25; Luk. 2:1-7). A suah hnu ni riat a kim tikah serhtan mi a si (Luk. 2:21). Nauhak lai ihsin biakinn sungah an fehpi (Luk. 2:41-51). Minung vekin a ṭhanglian (Luk. 2:52). Christmas hi minung a sinak a famkim caan a si. Curuangah leitlun ih tlanglengmi a si ruangah minung a sinak a suahni cu sunglawi zetin kan hman cionak a si. Christmas hi Pathian sinak nei cingin a duhdawtmi minung pawl runsuah dingah minung pianzia a laknak caan sunglawi a si.

3. Pa le Fapa pehzomnak.

Bawi Jesuh in Pathian cu ka Pa a si, a ti ruangah Judah mi hotu pawl cun Pathian tlukah a tuah aw a si tiah an huatnak a si (Joh. 5:18; 10:33). Pathian ah pakhat an si: “…Ka Pa, nangmah cu ka sungah na um ih kei khal na sungih ka um vekin annih khal kan sungah um ve hram hai seh… Nangmah le keimah cu pakhat kan si vekin…” tiah pumkhat a sinak fiangzetin ngankhummi a um (Joh. 17:21-22).

Thunetnak.

Tuini ah sunglawi zetin kan hmuak ih kan sunloihmi Bawi Jesuh ih suahni lawmnak Christmas hi sullam nei zetin hmang cio uhsi. Misual kanmah pawl kumkhua nunnak kan ngah theinak ding hrangah vancung sunlawinak tanta in leitlun ah a ṭum ih minung ah cangin in hawlsuaktu suahni a si. Hi thu hi khuahlan kum 2000 lenglo ih thilcangmi a si ko nain tuini tiangah sullam a nei ringring. A zumtu hrangah a thupi zetmi a si. Kan hnenah in umpi ringringtu Immanuel a si (Mat. 1:23: Is. 7:14). San a cem hlan tiang in umpi ringring ding a si (Mat. 28:20). Bawi Jesuh leitlun ah suak lo ta sehla kan hrangah rundamnak a um lo ding. “Christmas” hi a ṭhen aw zomi Pathian le minung kom-awk salnak caan a si.

“Christmas” lungawi hnangamnak, remnak daihnak cu a siartu nan zate parah hmun ringring ko seh. Amen.

~Rev. Dr. Hrang Hmung, D.Min., Ph.D.,

Toungphila, Kalaymyo.

December 24, 2016|Saturday|11:00pm.