MAN NEIH DING IN DUHSAK RUANGAH

Christmas ni a nai vivo thlang ih kan thinlung sungah Bawi Jesuh in duhdawt tuk ruangih minung ah piang in in hawlnak thu hi kan ruat cio ko ding. Asi, Christmas hi Pathian in minung pawl hnenah a thu lawng ih um si nawn loin Amah rori minung tisa ih a suah caan a si (Joh. 1:14). Bawi Jesuh in a suah ni lawm dingah in fial lo nain cuih a duhdawtnak a theitu pawlin Pathian ih duhdawtnak thu ruat salin lungawinak thawn Christmas puai tiah sunglawi zet in kan hmang cio a si.

Bawi Jesuh leitlun ih a ratnak san hi kan thei cio ko. Minung ih sualnak ruangah Pathian thawn ṭhen awknak a suak. Pathian thawn pehzomnak a um nawn lo, a cat zo. Cuih a cat zomi cu pehzom sal theinak dingah Pathian amah rori minung hnenah tisa ah cangin a rung ṭum ih in hawl. Minung in kan thil titheinak in Pathian hnenah kan thleng sal thei nawn lo rungah a si. Minung kan nunnak hi Pathian tel lo cun zianghman man a nei lo. Man neih kan si theinak ding hrangah Pathian minung ah cangin in hawlsuak caan hi Christmas tiah sunglawi zetin kan hmannak a si.

1. Tuahmawh kan si nain siatsuah kan si lo.

Minung ih sualnak ruangah Pathian in Eden hmuan ihsin a dawisuak (Seem. 3:23). Cuticun leitlun ah harsatnak sungah rethei zonzai a phunphun tuar in an um. Sikhalsehla Pathian in a hmuihmel kengin a sesiammi minung hi a tansan thei lo. Curuangah amah rori minung tisa cangin a hawlsuak sal a si. Satan ṭemṭawnnak sungih a ummi minung pawl a humhim sal. Curuangah Paul in, “Kilkipin in rial nasa nain kan kekzaam lo; a caancaan ah awloksong in kan um, asinain kan bei a dong lo. Hrem kan si nain tansan kan si lo; tuahmawh kan si nain siatsuah kan si lo. Jesuh ih nunnak cu kan taksa parah lang hrimhrim seh tiah catbang loin a thi theimi kan ruangpum parah hin Khrih thihnak kan phur ringring a si” a ti (2 Kor. 4:8-10). Mangbang vansang ih kan um lai khalah in umpi ringringtu Immanuel Pathian a si. Christmas cu tuahmawh a si zomi minung pawl siatsuahnak tong loin kumkhua nunnak ngah theinak dingah lamzin ong sak caan a si.

2. Kan farahzet nain mi tampi milian kan si ter.

Pathian tel lo nunnak cu farah zonzaih hlir in a khat. Bawi Jesuh ta ka si tiah a theifiangtu hrangah cun farahzet kan si hmanah milian kan si. Bawi Jesuh minung tisa ah cangin a tlanlennak hi mi tampi milian kan si theinak ding hrangah a si. Paul in, “Upatnak kan tong ih mualphonak khal kan tuar; zomtaihmi kan si tawk a um ih thangqhatmi kan si tawk khal a um. Thuphanper in puh nain thutak kan sim. Zohman ih theih lomi ah in ruat, sikhatsehla mi hmuahhmuah ih theihmi kan si fawn. Mithi vekah in ruat, asinain in hmuh vekin kan nungzet ko. Hremmi kan si nain in that lo. Kan riah in siatter ṭheu nain kan lung a awi ringring. Kan farahzet nain mi tampi milian kan si ter. Zianghman nei lo kan si nain zianghmuahhmuah neitu kan si,” tiah a nunnak ih a hmuhtonmi pawl a simfiang (2 Kor. 6:8-10).

3. Nun daan in thiam ter.

Bawi Jesuh tel lomi nunnak cu vaivuannak a si. Asinain rundamnak a co ngah zotu hrangah kan famkim lo hmanah kan nun in uktu Bawi Jesuh thawngin nun daan thiam dingah in zirh. Kan sinak le dinhmun parah kan lung a kim thei. Paul in, “…Thungai ti ahcun ka neih zatte thawn lungkim zetih um ding ka thiam zo. Tlasam ih nun daan ka thiam ih neinung zetih um khal ka thiam zo. Cutiih um daan thupte cu ka zir ngah zo ruangah khuitawk hmun hmanah le ziangtik caan khalah ka pumpuar in siseh, ka rilrawng in siseh, malte ka neih ah siseh, tampi ka neih khalah siseh, thinlung nuamte ih um ka thiam zo,” a ti (Fil. 4:11-12). Bawi Jesuh leitlun a ratnak hi amah a zumtu pawl nun daan thiam theinak dingah nun in zirh a si.

Thunetnak.

Rundam fa kan si hnu ah ziangkim a tluang thluh lo. Harsatnak le buainak tampi kan tong thotho. Bawi Jesuh amah rori khal lei tisa ih a tlanlen laiah buainak le harnak tampi a tong. Pathian in harsatnak lamzin ah in fehtermi hi man neih ding in duhsak ruangah a si. Bawi Jesuh tel lomi kan nunnak hi zianghman man nei lomi a si timi kan fiang ringring a ṭul. Bawi Jesuh ruangah kan nung, kan famkim thei, luatnak kan ngah, lungawinak kan co, dingfelnak kan co. Cuticun nun man neimi ah in cang ter a si. Tuahmawh kan si zo hmanah siatsuah in kan um lo. Farahzet kan si hmanah mi tampi milian in si ter ih kumkhua nunnak ah in hruai. Nitin kan nun daan ding khal in zirh a si. Man neih ding in duhsak ruangah Bawipa leitlun ah a rung ṭum a si.

~Rev. Dr. Hrang Hmung, D.Min., Ph.D.,

Toungphila, Kalaymyo.

December 17, 2016|Saturday|11:00 pm.