LAKSAWNG SUNGLAWIBIK

“Inn sungah an vung lut ih naute cu a nu Mari thawn an vung hmuh tikah khukbil in an biak. An laksawng kengmi sui, frankincense rimhmui le mura zihmui an suah ih an pek” (Mat. 2:11).

Runtu Bawi Jesuh a suah lai ah nisuahnak lam ihsin mifim pawlin an kengmi laksawng an pek timi thu kan thei cio. Chrismas hi pakhat le pakhat lungawi zetin laksawng pek awk caan a si. Cumi sungah laksawng hmuahhmuah hnakih a sunglawibik ih a man khal a khung sawn, Pathian ih zaangfah duhdawtnak laksawng “Bawi Jesuh” cu kan thinlung sungin kan mang cio a ṭul. Pakhat le pakhat laksawng kan pek awkmi hi sullam a neizetmi laksawng si ter ding a thupi ngaingai.

1. Kumkhua nunnak laksawng a si.

Pathian le minung karlak ih pehzomnak cu minung ih sualnak ruangah a cat ta, pehzom theih a si nawn lo. Minung kan sualnak ruangah kumkhua thi dingmi kan si zo. Sikhalsehla Pathian amah hmuihmel keng ih sersiammi kan si ruangah kumkhua thi ding in siang hrimhrim lo. Curuangah vancung sunlawinak tanta in minung ah a cang ih kan hrangah rundamnak lamzin in ong sak. Minung hmuahhmuah hrangah kumkhua nunnak laksawng in pek. Paul in, “Ziangahtile nnnih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si” a ti (Efe. 2:8). Curuangah “Sim cawk loin a sunglawimi Pathian laksawng hrangah lungawi thu a hnenah sim uhsi” tiah Paul in in forh bet (2 Kor. 9:15).

2. A famkimmi laksawng a si.

Pathian pekmi kumkhua nunnak laksawng cu kan hrangah a famkimmi a si. Jeim in, “A ṭhami le a famkimmi laksawng hmuahhmuah cu vancung ihsin a rami an si. Vancung tleunak a tuahtu Pathian hnen ihsin a rami an si. A siammi thil pawl cu an thleng aw nain Pathian cu a thleng aw dah lo; tikcu a her awk khalle Pathian hnenah khawthim ti a um dah lo” a ti (Jeim 1:17). Kanmah ten kan tuah thei lomi nunnak laksawng sunglawi cu Bawi Jesuh thawngin in co ter. Pathian in leilung hi a duhdawtzet ruangah Fapa neihsun in pek zo (Joh. 3:16). Bawi Jesuh ih kengmi rundamnak laksawng siar lo kan hrangah a ṭhami le a famkimmi laksawng dang zianghman a um nawn lo.

3. Midang hrangah zem ve dingmi laksawng a si.

Bawi Jesuh ih rundamnak cu midang hnenah man loin zem sal dingmi a si. Bawi Jesuh in, “Man loin nan ngahmi kha man loin va pe uh,” a ti (Mat. 10:8). Mi tampi in rundamnak kha sumsaw thawn kan zuar ṭheu hi riahsiatza ngaingai a si. Pathian Thuthangṭha phuangtu kan si hi Pathian ih pekmi laksawng a si ti kan thei a ṭul. Paul cun, “Cuih Thuthangṭha riantu ka si hi Pathian ih i pekmi laksawng a si. Cuih laksawng cu a cahnak huham ih hnaṭuanmi a si” a ti (Efe. 3:7). Piter khalin, “Pathian laksawng dangdang kengtu ṭha nan si bangtuk in a hnen ihsin nan ngahmi laksawng cu midang ṭhatnak hrangah hmang fingfing uh” tiah in forh hngai (1 Pit. 4:10).

Thunetnak.

Kan ram ah Christmas caan a kim cun thilri man an khung sinsin. Thungaite kan sim ahcun Christmas caan hi thilri kan neihmi pawl hman a lakih zem ding caan a si. Nisuahnak lam mifim pawlin an kenmi laksawng mankhung zetzet pawl Bawi Jesuh hnenah pekin an lawm. Tuukhal pawlin pek ding zianghman an nei lo nain runtu Bawi a suahnak thu an theih vetein anmah rori feh in khukbil in an biak. An kengmi an thinlung laksawng Bawipa hnenah an pek. Saam cangantu in, “Ka par ih a ṭhat ruang ahhin Bawipa cu ziangso ka pek ve ding?” (Saam 116:12) a ti. Kannih teh kanmah rundam dingah van sunlawinak taantain in hawlsuaktu Bawipa hrangah ziang kan pek ve ding? Kan thinlung takin amah hmuak ding hi Bawipa ih duhmi a si. Kan thinlung laksawng Bawipa hrangah pe cio ding hi a duhmi a si. Kanmah le kanmah kan pek awkmi laksawng khal hi duhdawtnak thawn kan pek awkmi laksawng sunglawi sihram seh. 

 

~Rev. Dr. Hrang Hmung, D.Min., Ph.D.,

Toungphila, Kalaymyo.

December 10, 2016|Saturday|6:30 pm.