ṬIHHRUTMI AH IN TUAH LO

“Ziangahtile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si” (2 Tim. 1:7).

Hlanlai zumtu hmaisa pawl hi Bawi Jesuh an zumnak ruangah harsatnak le hremnak a phunphun an tuar. Sikhalsehla Bawi Jesuh ruangih an comi rundamfa an sinak an fiang awk tuk ruangah ral ṭhazet in an nunnak tiang liam hman sehla an tuar ngam thei. Himi Martar pawl ih tuarnak ruangah Khristian zumnak khal a karhzai sinsin a si. Tuini tiang hi leitlun ah Khristian kan um ringring nak hi Martar pawl ih ralṭhatnak ruangah a si. Cumi cu Pathian ih pekmi Thlarau Thianghlim thawngin a si. Curuangah Paul in Timote hnenah, “Pathian ih in pekmi Thlarau in ṭihhrutmi ah in tuah lo” tiah thu a sim hngai. Pathian ih in pekmi Thlarau in a tanglam bangin in tuah a si.

1.Cahnak huham in pek.

Zumtu pawlin Pathian hnaṭuannak ah hmual neizet le hlawhtlingzet ih kan ṭuan theinak dingah cahnak huham kan nei a ṭul. Cumi cu Thlarau Thianghlim hmangin Pathian in kan hnenah hna a ṭuan ṭheu. Mi cakzet Goliath kha nauhakte David in a neh theinak hi Pathian Thlarau ih cahnak thawngin a si (1 Sam. 17:41-51). Mi lunghak zetmi Paul ih nun a thlengtu khal Thlarau ih cahnak huham thawngin a si. Bawi Jesuh in, “… nan hnenah Thlarau Thianghlim a rung thlen tikah cahnak huham thawn nan khat ding…” a ti (Tirh. 1:8). Pathian ih in pekmi Thlarau in ṭihhrutnak le ṭonṭaihnak pawl tlunah nehnak in pek thazaang cahnak, thil titheinak le hlawhtlinak pawl in pek thei a si.

2. Duhdawtnak in pek.

Zumtu cun duhdawtnak thu hi kan thei ringring ko. Cuih duhdawtnak cu Thlarau Thianghlim ih in pekmi a si. Paul in, “…ziangahtile Thlarau Thianghlim sung ihsin Pathian in a duhdawtnak cu kan thinlung sungah a burh zo. Cuih Thlarau Thianghlim cu Pathian ih in pekmi laksawng a si,” a ti (Rom 5:5). Duhdawtnak cu Thlarau ih a rahsuahmi khal a si (Gal. 5:22). Curuangah Pathian ih pekmi duhdawtnak taktak kan neih ahcun zonzaih retheinak le harsatnak pawl kan tuar thei tengteng ko ding. Cuticun ziangvek minung kan si khalle Pathian hmuihmel keng ih sersiammi kan si thluh timi kan theifiang thei dingih mi zovek khal kan duhdawt thei ding a si. Duhdawtnak kan neih lo ahcun thuphan per kan si (1 Joh. 5:19-21).

3. Mah le mah uk-awk theinak in pek.

Minung hi mah le mah uk-awk thei lomi kan si. Curuangah kan thinlung duhnak vekin kan feh vivo ih a netnak ah ṭhat lonak ah in thleinpi ṭheu. Sikhalsehla Pathian a zumtu rundamfa pakhat ih nunnak cu a biakmi le a ṭihzahmi Bawipa ih uknak tangah ka um tiah a thei-awk thei ding. Thlarau Thianghlim ih fimzirhnak, humhimnak le kaihhruainak hnuaiah hnangam tein a um thei ding. A nunnak cu Thlarau in a uk ruangah ṭihhrutnak, mi huatnak, mah duhduh in tisa nomceennak sungah a pil hlo thei nawn lo ding. Cuticun ningzahnak, vaivuannak, hmukhmak zetih nunnak tivek pawl a um lo ding. A thinlung a uk thei dingih a nunnak cu hlawhtlingzet in a liampi thei ding a si. Cutin kan ngah theinak hi Pathian ih in pekmi Thlarau thawngin a si.

Thunetnak.

Zumtu hmaisa pawlin an zumnak parah ralṭhazetin an dinpi ruangah Khristian a karhzai theinak a si. Tuini zumtu tampi cu nomceennak le ol zawng ih nung ding lawng kan duh. Buainak le harsatnak kan tong tikah kan ral a ṭha thei nawn lo. Zumtu tampi cu kan ṭihhrut ruangah kan zumnak tiang kan tlansan. Zumtu hmaisa pawl dinhmun vekin kan nung bang sehla tuini ah zumtu kan karhzai hrimrhim lo ding. Zumtu kan zatein kan dinhmun ṭhate’n cekfel awk sal ding kan cu tuk zo. Kan biakmi Pathian hi a nungmi a si. Ziangkim tithei Pathian a si. Curuangah zumtu kan nunnak ah ṭihhrutmi si sawn loin cahnak huham, duhdawtnak le mah le mah uk-awk theinak in a khatter sawnmi kan si timi thu hi kan cingkeng ringring ding a ṭul ngaingai.

A thu kan phuangmi hmangin Pathian sunglawi sinsehlaw. Amen.

~Rev. Dr. Hrang Hmung, D.Min., Ph.D.,

Toungphila, Kalaymyo.

November 19, 2016|Saturday|11:30pm.