PATHIAN IN A LO ZAANGFAH DING

“Na sualnak thuh na tum ahcun na hlawhtling dah lo ding; Na sualnak cu phuang in hlonhlo aw, Pathian in a lo zaangfah ding,” (Thufim 28:13).

Leitlun mi kan zatein misual kan si thluh. Cumi cu el theih a si lo. Rundamnak a co-ngahmi pawl cu himi thu hi kan nun in kan theifiang tukmi a si. Curuangah Saam cangantu in, “Ka suahthlak in mi ṭha lo ka si, Ka nu ih pum sung ihsin misual ka si zo,” a ti (Saam 51:5). Sikhalsehla mi tampi cu kan tuahṭhatnak, kan nuncan ziaza pawl zoh aw in sualnak a nei lomi bangin kan um ṭheu. Misual kan si timi kan pom duh lo. Jeremiah cun, “Van ih vaca hman in kir tikcu a thei ih thuro, peeleeng le ngathur khalin an rak umnak hmun ih kir sal caan an thei. Sikhalsehla ka minung pawl nannih cun ka thupekmi sungih kir sal nan thei lo,” tiah a ti (Jere. 8:7). Misual, mi ṭha lo kan si lam thei-aw in rundam ṭulmi kan si lam theifiang ding hi a thupi ngaingai.

1. Sualnak thuh cu hlawhtlin lonak a si.

Mi tampi in thil tisualmi kan nei tikah a si lole sualnak kan tuah tikah thuh kan tum ṭheu. Mi nih in thei ahcun ningzakza a siih kan mualpho ding ti kan phan ruangah a si. Sikhalsehla sualnak timi hi thuh a thei ringring lo, caan khatkhat ahcun a lang leh thotho. Paul in, “Ziangtin tile Pathian in zozo khal an tuahmi vekin tuahman a pe ding,” a ti (Rom 2:6). Thil ziangvek kan tuah khalle kan tuahmi sualnak in in ṭeemṭawn ringring. Midang in in thei lo hmanah kan tuahmi kan sualnak cu kanmahtein kan thei aw ringring fawn. Curuangah sualnak kan thuh tikah kan tuah duhmi pawl tluangtein kan tuah thei nawn lo ih hlawhtlin lonak ah in thlenpi thei a si.

2. Sualnak cu phuang in hlonhlo dingmi a si.

Minung cu kan sualnak thuh kan duh ruangah kan tlanlennak ah zalennak kan nei thei lo. Thinlung sungah ṭeemṭawntu a um ringring. Ziangtikah cuih ka thuhmi sualnak a lang pei maw tiah thinphang le donhar in in um ter. A hleice in ziangkim a theithluhtu Pathian hmai ah zianghman kan thuh thei lo timi cu kan thinlung thup tein kan thei ringring. Misual kan si hi ningzak lo tein Pathian hmaiah phuang in hlonhlo ding a ṭul. Saam cangantu cun, “Bawipa in mi tlasam pawlih ṭulnak cu a thei; Thawng sungih a minung pawl a hngilh lo a si,” (Saam 69:33). Kan thinlung rethei zonzai tertu sualnak ziangvek khal Pathian hmaiah phuang in hlonhlo thluh ding a ṭul. David hi mi ṭha lozet, mi sualzet a si ko nain Pathian hmaiah thinlung kekkuai thawn a sualnak a phuang ringring thei ruangah Pathian ih lungtong mi ah a cang a si.

3. Pathian ih zaangfahnak kan co ding a si.

Kan biakmi Pathian cu zaangfahnak thawn a khatmi Pathian a si. Misual duhdawttu khal a si. Isaiah in, “Bawipa cu mi run ding hiarzettu Pathian a si. Curuangah a daan le a thuzirhmi kha a sunloih ih, A minung pawl khalin upat hai seh ti a duh,” a ti (Isa. 42:21). Pathian ih zaangfahnak kan co duh ahcun kan sinak kan theifiang awk a ṭul. Kan natnak kan theifiang a ṭul. Jeremiah in, “Maw Bawipa, i damter awla, ka dam ngaingai ding; i run awla ka him taktak ding. Ka thangṭhatmi cu nangmah lawng na si,” a ti (Jere. 17:14). Paul cun, “Pathian ih simmi hi ngaihnik uh: Nan hnenih ka mithmai ṭha ka langter caan ahcun nan aw ka thei; Nanmah ka lo rundamnak ni a thlen tikah ka lo bawm hai, a ti. Ngaihnih uh! Pathian a mithmai ṭha ngah caan cu tuih caan hi a si; rundamnak co ni cu tuih ni hi a si,” tiah a simfiang (2 Kor. 6:2).

Thunetnak.

Paul in, “Khrih Jesuh cu misual pawl rundamsuak dingah leilungah a rung ṭum, timi hi a dikmi ṭong a siih famkim zetin pom tlak le zum tlak a si. Cuih misual pawl lakah kei hi misual bik ka si,” a ti (1 Tim. 1:15). Bawi Jesuh hi leitlun misual rundam dingah a rung ṭum. Mi ṭha, mi famkim thluh kan si ahcun Bawi Jesuh leitlun ah a ṭum ṭulnak a um lo ding. Mi dam hrangah sibawi a ṭul lo. Mi dam lo hrangah sibawi a ṭul. Mi famkim hrangah rundamtu a ṭul lo. Misual hrangah rundamtu a ṭul. Mi famkim kan si thluh ahcun Bawi Jesuh ṭum a ṭul lo ding. Mi sual, rundam ṭulmi kan si ruangah Bawi Jesuh hi leitlun ah a rung ṭum a si. Misual kan si lam pom in, kan sualnak pawl hlonhlo in Pathian zaangfahnak a cotu kan si cio theinak dingah hi thu hmangin kan nunnak in tharthawh cio hram seh!

~Rev. Dr. Hrang Hmung, D.Min., Ph.D.,

Toungphila, Kalaymyo.

December 3, 2016|Saturday|10:30pm.