PATHIAN IN A PE DING

“Nanmah lakah fimnak a tlasammi nan um ahcun Pathian hnenah dil sehla Pathian in a pe ding. Ziangahtile zo hnen khalah Pathian cun siangzet le zaangfahnak thawn a pe a si. Sikhalsehla cutiin a dil tikah thinlung ṭhukṭhunnak um lo tein a dil pei ih ka ngah rori ding tiin a zum pei. Thinlung ṭhukṭhunnak a neitu cu thli in hmun kipih a semi tifinriat tisuar bangtuk a si” (Jeim 1:5-6).

Kan biakmi Pathian cu ziangkim sersiamtu a nungmi Pathian a si. Curuangah kan ṭulsammi hmuahhmuah cu Pathian hnenah kan dil ding. Kan ṭulnak vekin kan dil ahcun Pathian cun in pe ding a si. Ziangkim neitu Pathian a biatu kan si ruangah kan tlasammi le kan ṭulmi hmuahhmuah cu Pathian hnenah zumnak thawn kan dil thiam ding a ṭul.

Pathian hnenah dil seh.

Pathian in amah le amah tuukhal ṭha thawn a tahṭhim aw (Joh. 10). Cuihtlunah “pa” sinak dinhmun khal in a tarlang aw: a pa in inn ihsin a tlantu fapa hrangah sangka a ong ringring (Luk. 15). Minung ih ṭulsammi pawl, tuartehmi pawl kha a hnong dah hrimhrim lo. Midang cun kan ṭulmi a tamtuk tikah mawhthluk awknak a um ṭheu ko nain Pathian cun amah rinsantu le a hnenah a diltu pawl cu ziangtik khalah a el dah lo. A pek tik khalah pek menmen lawng si loin duhdawtnak taktak thawn a pe ringring. Curuangah Paul in, “Kan sungah a huham in hna a ṭuantu cun kan dil theimi le kan ruah theimi hnak hmanih let tampi in a ṭuan thei a si,” a ti (Efe. 3:20). Kan dil theimi le kan ruah theinak hnakih ṭha sawn in pe theitu a si. Curuangah Pathian hnenih kan dil tikah rinsan taktak a ṭul. Pathian in kan dilmi ruangah in mawhthluk lo ding, siangzet le zaangfahnak thawn in pe rori ding a si. A co dingmi ro hmuah lakin nomnak a hawltu fapa nautasawn kha siirnak taktak thawn a kirsal tikah lungkimzet in a cohlang. Culawng si loin a ṭhabik zate thawn a hmuak hngai. Sualnak sungah ziangtluk hloral in kan pil rero hmanah siirnak thawn a kirtu fapa hlo bangin in cohlang ringring lai. Thilṭha famkim ui loin in pe siangtu le in cohlangtu a si.

Ṭhukṭhunnak um loin dil seh.

Kan thlacammi a kim le kim lo thu kan zoh tikah Pathian a buai lo nain minung in kan buaipi ṭheu. Pathian cun nan dil le nan ngah ding, tiah fiangzet in a sim cia zo (Mat. 7:7). Dil ih ngah thei lomi tampi a um sisi kan ti men ding. Bawi Jesuh ih ṭongkam kan zoh tikah dil uhla nan ngah ding timi lawngin a cem lo, hawl uhla nan tong ding a ti hrih. Curuangah kan dil ih kan ngah lo ahcun kan hawl a ṭul. Jeim cakuat sungah Pathian ih simmi cu thinlung ṭhukṭhunnak a nei ahcun Pathian hnen ihsin zianghman a ngah lo ding, a ti. Cutin a sile kan thlacammi a kim lomi hi Pathian kan zumnak a famkim lo ih thinlung ṭhukṭhunnak kan nei ruangah a si tengteng ding.

Thinlung ṭhukṭhunnak a neitu cu Baibal ih a simcia vekin thli in hmun kipih a semi tifinriat tisuar bangtuk a si, a ti. “Tisuar” hi kan zoh a sile tikap ih ummi lungto vek a si lo. Lungto cu ziangtluk thlisia hrang hmanah a hnin hrimhrim lo. Tisuar cu hli hrannak lam panin a fen vivo. Curuangah kan zumnak hi thli ih a hranmi vekin a fen vivo ahcun na thinlung a hnget lo, ṭhukṭhunnak na nei tinak a si. Na tuahmi tinkim hi a hnget dah hrimrhim lo ding. Kiangkap dinhmun zoh in a vaivuan ter ṭheu. Cuvek thinlung ṭhukṭhunnak a neitu cu Pathian in a duh lo. Cuih thinlung cun Pathian hnen in zianghman a ngah dah lo ding. Thla na cam tikah na zumnak kha cekfel hmaisa aw. Pathian cu zumnak vekin a petu a si (Mat. 8:13). Na zum taktak lomi cu na co ngah dah lo ding.

Thunetnak.

Zumtu u le nau kan ṭulmi le kan tlasammi pawl Pathian hnenah kan dil ahcun Pathian cun in pe ding. Ziangahtile zohnen khalah Pathian cun siangzet le zaangfahnak thawn a pe a si tiah Baibal in a sim. Thinlung ṭhukṭhunnak um lo tein kan dil pei ih kan ngah rori ding tiin zumfeknak kan nei ding a thupi.

~Rev. Dr. Hrang Hmung, D.Min., Ph.D.,

 Toungphila, Kalaymyo.

January 21, 2017|Sat|11:00 pm.