THUTAK CUN A LO LUATTER DING

“Thutak cu nan thei dingih cuih thutak cun a lo luatter ding” (Joh. 8:32).

“Annih cu thutak in na ta siter hai aw; na ṭongkam cu thutak a si… Anmah tla thutak ih thianter an si theinak dingah keimah khal ka thiangter aw a si” (Joh. 17:17, 19).

Pathian in a sersiammi minung pawl kha Amai’ hmuihmel kengin sersiammi kan si ruangah siatral thluh ding hi in siang hrimhrim lo. Curuangah Amah thawn pehzomnak kan neih theinak dingah a phunphun in a tawlrel. Sualnak sal ih tang ringring ding hi a duhmi a si lo. Cuticun minung hnenah a rung ṭum ih rundamnak in tuahsak. Mi hmuahhmuah thutak thei in rundamnak kan ngah thluh ding hi Pathian ih duhmi a si. Pathian ṭongkam cu a thutak ṭongkam a siih cuih thutak cun luatnak in pek, kan nunnak in thiangter.

1. Jesuh Khrih cu Thutak a si.

Bawi Jesuh in, “Keimah cu Thutak ka si” a ti (Joh. 14:6). Cuih thutak a simi Bawi Jesuh cu minung ah a cang (Joh. 1:14). Curuangah minung pawl thawn a tlangleng ih kan hawl theimi a si. Kan thinlung duhnak taktak thawn kan hawl tikah kan hmu tengteng theimi a si. Tikpan fimnak in siseh, leitlun thiamnak a phunphun hmangin siseh thutak a hawltu cun a netnak ah an tong ngah dingih an theifiang thei ding a si.

Pathian cu duhdawtnak a si (1 Joh. 4:8). Leitlun ih thilcangmi sunralnak pawl, ninghang riahsiatnak pawl hi duhdawttu Pathian ih duhmi an si lo. Curuangah Pathian in a faate pawl kha dung a tun dah hrimhrim lo ding. Pathian cu dingfelnak khal a si. Curuangah a faate pawl hrangah dingfelnak thawn lam in hruai ringring ding. Thuphan le dingfel lomi thu ah in fehpi hrimhrim lo ding. Thutak a simi Bawi Jesuh kha kai-hnget in cuih thutak thawn fehtlang ding a ṭul. Thutak dung kan thlun ahcun lamzin kan palh thei lo ding. Thutak a simi Bawipa thawn pehzom pawlkom in kan um ringring ahcun thutak ihsin kan pial dah hrimrhim fawn lo ding.

2. Thutak cu in thiangtertu a si.

Kan taksa ruangpum lenglam cu tidai in a thiangter thei nain kan thinlung le thlarau hrang ahcun tidai in a thiangter thei lo. Thutak lawngin in thiangter thei. Thutak lawng hi kan thinlung le thlarau thiantertu a sizia Johan in sim (Joh. 17:17, 19). Bawipai’ thutak cu a famkim ih kan nunnak remthar tertu a si (Saam 19:7). Ziangtik khalah kanmai’ tuahṭhatnak in famkimnak in pe thei dah lo ding. A hleice in kan nun a borhhlawh mi thiangtertu umsun cu thutak lawng a si. Thutak in kan nun in thiangter thei a si. Thutak sungah um cingin kan thiang lo ahcun ṭhatein cekfel awk ding kan ṭul.

3. Thutak cu in luattertu a si.

A dikmi thutak cu ṭemṭawntu si loin luatnak in petu sawn a si. Thutak kan theifiang tikah minung hrangah phurrit a si nawn lo (Mat. 11:28). Sualnak bawmrit ihsin luatnak in pek. Thutak thawn a tlanglengtu hrangah zalennak famkim a um. Josef thlemnak a tong laiih luatnak a petu cu thutak a si (Seem. 39:2, 3, 9). Daniel le a rualpi pawl siangpahrang thupek hnakin thutak lam ah dingin a thiang lomi rawl a ei duh lo (Dan. 1:8). Thutak cun a thiang lomi ihsin luatnak a pek. A thimnak hmun ihsin luattnak a pek. Saam cangantu in thutak cu a thimmi lamzin ah tleunak a si a ti (Saam 119:105). Curuangah thutak kan thei taktak ahcun kan hrangah in luattertu a si, timi fiangtein kan thei thei ding.

Thunetnak:

Thutak cu sunnak, natnak, camsiatnak le ziangkim ihsin in luattertu a si. Curuangah luatnak kan co taktak lo ahcun thutak a simi Bawi Jesuh kan nei taktak maw tiah cekfel awk kan ṭul. Mi hmuahhmuah thutak theifiang in luatnak ngah thluh dingah Pathian in a duh: “Cule mi hmuahhmuah thutak thei hai sehla, rundammi si hai seh ti a duhtu, in rundamtu Pathian a lung a awi ding” (1 Tim. 2:3-4). Thutak cu kan hrangah luatnak a si. Kan thianhlimnak khal a si. Thutak in Bawipai’ ta in siter hai zo.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

October 29, 2016|Saturday|7:30pm.