NAN HNENAH KA RA SAL DING

“Cule ka feh ih nan umnak ka rem ngah hnuah ka ra sal dingih ka hnenah ka lo hruai ding; cuticun ka umnak ah nan um ve ding… Ka feh tikah nanmahte lawng in ka lo tanta lo ding; nan hnenah ka ra sal ding” (Johan 14:3, 18).

Bawi Jesuh veihnih ratsalnak ding thu hi Baibal sungah a thupi bikmi pakhat a si ve. A ratsalnak ding thuhla kan zoh tikah thlarau ih rat kha si loin mit hmuh in le taksa pum rori ih ratnak ding thu hi Baibal ih simmi a si. Himi a ratsalnak ding thuhla zirhnak hi kawhhran hramthok ihsin tuini tiang kan zirh awkmi khal a si. Himi a ratsalnak ding thuhla ruangah zumnak tansan in a umtu mi tampi khal an um zo. Ziang a si khalle Baibal ca hi Pathian ih thawkhummi ttongkam a si tiah a zumtu pawl hrangah cun a ratsalnak ding thuhla hi zumtlak le rintlak a si tengteng ko. Bawi Jesuh a ratsalnak ding thuhla hi amah rori ih simmi a si. Cuihtlun ah Paul khalin thupi zetin a sim bet vivo mi a si. Paul cakuat sungah Jesuh ratsal ding thu thawn peh aw in “parousia” timi Grik ttongfang vei (14) a hmang. Curuangah Bawi Jesuh ratsal ding thu hi a fiangzetmi a si. Tuini leitlun dinhmun kan zoh tik khalah a nai deuhdeuh tiah kan hmu thei rero a si (Mat. 24)

1. Nanmahte lawng ka lo tanta lo ding.

Mibur thawn um tlang zomi pawl hrangah mahte lawng um sal ding timi hi thil harsa zet pakhat a si. Hruaitu ttha cun a dungthluntu pawl hi a tansan dah lo, tthat le tthansonak ruatin a cangthei tawkin a umpi ringring ding. Bawi Jesuh khalin amah thawn kum thum sung tlangleng tlangmi a dunghtlun pawl kha ngakttah bangin tanta ding cu a siang hrimhrim lo, a seherh ringring. Zianghman ti theinak a nei lomi naute cu rin lopin ngakttah an cang tikah harsatnak tampi an tong. Bawmtu ttha an tong lo ahcun an hmai lam hrangah ruah ngam ding a si lo. Bawi Jesuh Khrih in a dungthluntu pawl lawng si loin zumtu kan zate ngakttah vekin tanta ding a siang hrimhrim lo. Curuangah amah a um thei lo sungah a Thlarau Thianghlim in tuini tiang in umpi ringring a si. Immanuel Pathian a sinak a famkim ter (Mat. 1:23; 28:20).

2. Nan hnenah ka ra sal ding.

Bawi Jesuh van a kai tikah dungthluntu pawl le zumtu pawl cu anmah lawng an tangta. Cu hnu ah a Thlarau Thianghlim a thlah ih a umpi. Sikhalsehla Thlarau Thianghlim ih hnattuannak tampi cu mit hmuh theimi a si lo. Curuangah amah rori rat sal dingah a tiamkamnak a si. Ziangahtile Bawi Jesuh cu a nungmi a si ruangah amah a zumtu pawl khal a nungmi an si ve theinak ding hrangah a si (Joh. 14:19). Bawi Jesuh cu thihnak ihsin a thosal ih a nungmi Bawi a si. Cule a ratsalnak tikcu a thlen tikah cun kan sungah Bawi Jesuh a um vekin amah sungah kan um ve timi kha kan theifiang ding a si (Joh. 14:20).

Thunetnak.

Baibal thiam tampi in Pentikos ni Thlarau Thianghlim a thlen caan hi Bawi Jesuh a ratsal ni a si. Curuangah a ra sal nawn lo ding tiah a ruattu mi tampi an um. Sikhalsehla Baibal thiam tampi le zumtu tampi cu Bawi Jesuh van a kai lai hmu thei a si vekin a rat salnak khal mithmu thei rori in a si ding (Tirh. 1:11; 1 Thess. 1:9-10; 2:19;3:13; 4:16; 5:23). Bawi Jesuh cu a ttumsal tengteng ding tiah ruahsannak thawn a hngakhlapmi tampi kan um. Baibal ih a sim cia vekin Bawi Jesuh cu amah a zumtu pawl amah umnak hmunih um ve dingin hruai dingah hi leitlun ah a ra sal tengteng ko ding (Joh. 14:3, 18). Curuangah ruahsannak, zumfeknak thawn kan hngakhlap ringring a si.

Duhdawtnak le duhsaknak thawn,

Rev. Dr. Hrang Hmung, D.Min., Ph.D.,

Toungphila, Kalaymyo.

August 6, 2016|Sat|7:30pm.