THUPHANPER KAN SI MAW?

“Pathian kan duhdawt cu amah ih in duhdawt hmaisa ruangah a si. Zokhal Pathian ka duhdaw ticing in a unau a huatu cu thuphanper a si. Ziangahtile a mit in a hmuhmi a unau hman a duhdawt lo a si ahcun a hmu lomi Pathian cu a duhdaw thei hrimhrim lo ding. Khrih ih in pekmi thukham cu hiti in a si: zokhal Pathian a duhdawtu cun a unau khal a duhdaw ve ding” (1 Johan 4:19-21).

Zumtu tampi in Pathian kan duhdawt kan ti. Pathian cu duhdawtnak a si timi thu khal kan phuang nasa. Asinain cutin kan simmi pawl hi kan thinlung sung ihsin a ra taktakmi a si maw ti hi kan cekfel a ṭul. Kaa ih a suakmi men a si ahcun zianghman ṭhathnemnak a um lo. Pathian ih duhdawtnak thu hi thinlung takin kan cohlang lo a si ahcun thuphanper kan si pang ding phan a um.

1. Pathian in in duhdawt hmaisa ruangah a si.

Pathian kan duhdawtmi hi amah in in duhdawt hmaisa ruangah a si timi cu a fiangzet. Thukham pahra sungah minung in a Pathian le a innhnen a duhdawt ding timi a um. Asinain Pathian in in duhdawt hmaisa ruangah a si timi dinhmun tiang a thleng deuh lo. Pathian ih duhdawtnak kan tep theinak dingah Pathian ih dingfelnak le a duhdawtnak kha kan theifiang a ṭul. Pathian ih duhdawtnak cu a lamdang duhdawtnak a siih mangbangza duhdawtnak a si fawn. Minung ih kan ruahban theimi duhdawtnak phun a si fawn lo. Minung ih kan ruahban thei lomi duhdawtnak a si vekin a man a khung zetmi khal a si.

Lei tisa duhnak vekih a nungtu hnenah a thianghlimmi Thlarau lam duhdawtnak a um thei lo. Pathian in kan thinlung sungah a dikmi duhdawtnak in pek lo a si ahcun duhdawtnak dik kan nei thei dah lo ding (Rom 5:5). Pathian in in duhdawt ih a Thlarau Thianghlim in pek ruangah Amah le midang pawl kan duhdawt theinak a si (Rom 5:8).

2. Pathian ka duhdaw ticing in a unau a huatu cu thuphanper a si.

Pathian kan duhdawtnak le midang parih kan duhdawtnak hi ṭhen dingmi a si lo. Pathian kan duhdawt taktak ahcun Pathian ih sersiammi kan minungpi pawl kan duhdawt hrimhrim ding. Minung in amah le amah a duhdawt vekin midang khal duhdawt ding a ṭul. Cutik lawngah Pathian kan duhdawt timi cu a langfiang thei ding.

Phun dang in kan sim a sile Pathian duhdawt ding cu a ol zet. Pathian cu Thlarau a siih kan hmu thei lo. A aw khal kan thei thei lo. Curuangah Pathian ka duhdawt tiah ol tein sim theih a si. Sikhalsehla minung duhdawt timi a phun dang. Minung cun harsat in pe thei. Kan ral ah an cang thei. Kan thin in heng ter thei. Cuih kan minungpi pawl duhdawt ding timi cu a ol lo. Curuangah Pathian cu kan duhdawt nain kan minungpi cu duhdawt ding a har.

Johan cun, kan minungpi duhdawt loin Pathian ka duhdawt kan timi cu thuphanper a si, a ti fawn. Kan minungpi kan duhdawt tik lawngah Pathian kan duhdawt a si timi langternak tetti a si. Kan minungpi parah duhdawtnak kan langter thei ahcun Pathian kan duhdawt timi a lang ve mai. Hmu theimi minung kan duhdawt lo ahcun Pathian kan duhdawt timi cu thuphan ah a cang.

Kan thei ṭulmi cu kan zatein Pathian ih hmuihmel vekin sersiammi kan si thluh (Seem. 1:27). Curuangah kan zate sungah Pathian ih sinak pakhat ciar a um thluh. Pathian hmuihmel a cuangmi le kan hmu theimi minung pawl kan duhdawt lo ahcun Pathian kan duhdawt thei lo ding ti a fiang tuk. Ziangahtile kan hmu theimi kan minungpi kan duhdawt lo ruangah a si.

3. Pathian a duhdawttu cun a unau khal a duhdaw ve ding.

Pathian a duhdawttu kan si taktak ahcun kan unau kan duhdawt tengteng ding. Duhdawtnak hi a thupituk. Bawi Jesuh in, “Bawipa nan Pathian cu nan thinlung zate, nan nunnak zate, nan ruahnak zate le nan thazang zate thawn nan duhdaw pei… Na innhnen kha nangmah na duh awk vekin na duhdaw pei, ti hi a si Hi thukham pahnih hnakih a thupi sawnmi thukham a um nawn lo,” a ti (Mar. 12:30-31). “Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei. Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si” (Joh. 13:34-35; zohṭhim -1 Joh. 3:23).

Thunetnak.

Pathian kan duhdawt ti cingin midang ṭhat lonak tuah rero, midang siatnak ding tawlrel rero hi thuphan kan si. Pathian kan duhdawt taktak ahcun kan minungpi kan unau kan duhdawt tengteng ding. Himi kan minungpi kan duhdawt thei lo thu kan fiang ahcun Pathian duhdawt ding timi hi thil ol a si lozia kan hmu thei ko ding. Thungai kan sim a sile Pathian kan duhdawt taktak timi cu leitlun ah dinhmun sangbik, a thupibik le a harbikmi hnaṭuan pakhat a si. Pathian ka duhdawt ti cingin thuphanper kan si lonak dingah thuthuk kan ruat cio a ṭul.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

October 15, 2016|Saturday|10:00am.