PATHIAN IH RUALPI

“Hlanlai ahcun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo. Pathian ih rualpi kan si zo ruangah Khrih ih nunnak in ziangtlukin so in runsuak sinsin ding” (Rom 5:10).

Minung hi Pathian in amai’ hmuihmel kengih a sersiammi kan si. Amah thangţhat in amah thawn pawlkomnak nei dingah sersiammi kan si. Sikhalsehla Satan duhnak thlun in Pathian duh lomi kan tuah. Curuangah Eden hmuan ihsin a dawi hngai. Cuticun Pathian ih ral ah kan cang. Cuih ni ihsin thokin Pathian le minung karlak ih pehzom awknak a cat. Pathian ih ral ah kan cang: “Rintlak lo milai pawl! Leikhawvel thawn rualpi ţha si cu Pathin thawn ral awknak a si ti nan thei lo maw? Zokhal leikhawvel a kom ţhatu cu Pathian ih ralah a tuah aw a si” (Jeim 4:4).

Asinain Pathian in amai’ hmuihmel kengih a sersiammi minung cu dung a tunsan men thei ringring lo. Ral-awknak ihsin rualremnak dingah Pathian amah thotho in a tawlrel. A hlan vekin a rualpi kan can theinak ding hrangah a si.

Rualremnak thawn pehpar aw in Bawi Jesuh Khrih ih tuahnak ruangah a si tiah Thukam Thar sungah kan hmu thei.

1. Kanmahtein Pathian thawn pehzomnak kan nei thei lo. Bawi Jesuh a thihnak ruangah ral ihsin a rualpi kan can theinak a si: “Hlanlai ahcun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo”, a ti (Rom 5:10). “Hlan ahcun thil ţha lo nan tuah ruangah le nan ruah ruangah Pathian thawn nan hlaat aw ih a ral nan rak si. Sikhalsehla a tu ahcun a Fapa taksa ruangpum rori in thihnak a tuarnak ruangah Pathian in a rualpi ah a lo tuah zo” (Kol. 1:21-22). Bawi Jesuh thihnak ruangah minung cu Pathian ih rualpi ah kan can thei salnak a si.

2. Kan nun hlun cu Pathian thawn a ţhen awk zo. Pathian thawn pehzomnak kan nei thei salnak ding ahcun nun thar neih a ţul. Cumi nun thar kan nei theinak dingah Khrih thawn pehzomnak kan nei a ţul. Cutik lawngah kan nun hlun a cem ding ih nun thar kan nei thei ding: “Zozo khal Khrih thawn a pehzom awk tik ahcun mithar a si; a nun hlun cu a cem ih nun thar a thok zo” (2 Kor. 5:17).

3. Minung le minung karlak ih ţhenţhek awknak khal remnak in tuahsak ih pumkhat ah in tuah zo. Miphun pahnih cu pakhat ah a cang ter: “Sikhalsehla atu ahcun Khrih Jesuh thawn pehzom awknak ruangah a hlatzet ih a ummi nannih tla cu Khrih thisen luannak ruangah a naizetah kawhkhawmmi nan si zo. Ziangahtile Judah mi le Zentail mi cu pumkhat ah in tuah zo ruangah Khrih amah cu kan remnak a si. Judah mi le Zentail mi pawl a ţhentertu le ralih a tuahtu pharsonmi cu amah ih taksa pum rori in a bal ţheh zo” (Efe. 2:13-14).

4. Van le lei doral a ummi cu Bawi Jesuh thihnak thawngin remnak in tuahsak zo. Cule minung pawl Pathian hnenah in hruaikir sal a si. “Cuticun a Fapa sung ihsin lei le van pumpuluk cu Pathian in a hnenah kirter sal a duh. Pathin in a Fapa thinglamtah parih a thihnak ruangin lei le vanih ummi thil hmuahhmuah thawn remnak a tuah ih cutiin a hnenah a hruaikir sal a si” (Kol. 1:20).

Pathian in leilung hi a duhdawt zet ruangah a Fapa neihsun a pekih amah a zumtu hmuahhmuah cu thi loin kumkhua nunak an co ding, a ti (Joh. 3:16). Minung ziangtluk kan sual khalle Pathian ih duhdawtnak cu a thleng aw dah lo. Cumi cu Pathian in minung parah dingnak, rin-umnak, ţhatnak le zaangfahnak a neih ringring ruangah a si. A ral rori in duhdawt ih rualpi ah in can saltu cu Pathian lawng a si. Paul in, “Cutiih remnak a tuahnak cu mi thianghlim, mawhnak nei lo le soiselnak um loin a hmaika ih thlenter a lo duh ruangah a si”, a ti (Kol. 1:22). Curuangah Pathian ih rualpi kan si zo ruangah Khrih kan zumnak hrampi kha hngetkhoh dingah kan ap awk ringring ding a ţul a si.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

September 24, 2016|Sat|8:55pm.