NA LUNGTHLITUM A LO PE DING

“Bawipa ah na lungawinak hawl awla, na lungthlitum a lo pe ding. Bawipa hnenah na nunnak pe aw, Amah rinsan awla a lo bawm ding” (Saam 37:4-5).

Mi zovek khalin lungawi ringring in kan lungthlitum, kan thinlung duhmi pawl kim thluh dingah kan duh cio. Cuih kan lungthlitum a kim theinak dingah a phuanphun in kan zuam. Saam cangantu cun kan lungawinak cu Bawipa ah hawl dingah in fial. Cuticun kan lungthlitum in pe ding a si. Vei tampi ah kanmah le kan ti theinak rinsan in Bawipa ṭul lo vekin kan um ṭheu. Ziangkim ah in bawmtu cu Pathian a si ruangah Amah rinsan ding hi zumtu pawl hrangah a thupi ngaingai.

1. Bawipa hnenah na nunnak pe aw.

Zumtu hin Bawipa hnenah kan nunnak ziangkim pe in kan ap thiam ding hi a thupi zet (Saam 37:5). Pathian cu ziangkim tithei a siih kannih cu a sersiam copmi kan si. Pathian hnenah kan nun kan ap hnuhnu cun kan nunnak hi A kut sungah a um, kanmai’ kut ah a um nawn lo. Ziangkim titheitu Pathian kut ih kan nunnak a um ahcun hnangamnak a si. Curuangah kan um daan ding, kan nunnak, kan faate pawl, kan neihmi thilri pawl cu Pathian hnenah ap thluh cio uhsi. Pathian hnenih ziangkim ap thluh ding hi Saam in in zirhmi a si. Zumtu tampi cu Bawipa hnen ih dil le ngahlam cu kan duh zet ih kan ngah tikah nuam kan ti zet. Asinain in pekmi pawl Bawipa hnenah apsal ding ti tikah cun kan siang nawn lo. Bawipa hnenah kan nunnak ziangkim kan pe ahcun a ṭhatnak bikah Pathian in a hmang ding a si. Kan nunnak kan pe duh lo ahcun ziangtin in hmang thei ding? Kanmai’ ṭha kan ti daan hnakin Bawipa ih ṭha a ti daan ahhin ṭawmpi sawn ding hi a ṭha bik a si.

2. Amah rinsan awla a lo bawm ding.

Pathian kan biak ruangah Amah kan rinsan ding a ṭul. Baibal in Pathian rinsan dingah in fial. Baibal in milian le mifim rinsan dingah in fial lo. Zumtui’ hrangah Pathian rinsan hi a thupi tukmi a si. Pathian rinsantu pawl cu a bawm hngai ih a tansan men dah lo. Pathian in amah rinsantu pawl hmangin a kutcak langter ding a duh. Baibal sungah Pathian rinsantu pawl ih zumnak an hngeh zia le a kutcak an langter zia hmun tampi ah kan hmu thei. Cumi ih langtermi cu ziangkim ah Pathian rinsan ih a thupi zia hmuhnak a si. Minung sinak ah milian, mifim, micak pawl kan rinsan sawn. Thubuai le harsatnak pakhat khat a thlen tikah minung kan rinsan sawn pang ṭheu. Rinsan a ṭulnak zawn khal a um ko. Asinain Pathian rinsan in kan ap hmaisa hnu ah kan minungpi kha rinsan leh ding a ṭha. Amah rinsantu pawl cu Pathian in a tlansan dah lo ih Amah rinsantu hmangin a kutcak a langter ṭheu. Pathian in minung hmangin a kutcak a langter ṭheu. Pathian kan rinsan ahcun in bawm tengteng ding a si (Saam 37:5).

3. Amah ih cangvaihnak cu thinsau in hngak aw.

Minung pawl hrangah hngah hi thil harzet pakhat a si. Ziangahtile a hngaktui’ hrang ahcun hngah caan hi a rei duh tuk. Mi tampi cu kan hngah thei lo ruangah kan mual a pho ṭheu. Zumtu pawlin kan mang ringring ding a ṭulmi pakhat a um. Pathian cu amai’ tikcu le caan vek ih cangvai ṭheutu Pathian a si. Saam cangantu in “Bawipa ih hmaiah daite’n um aw, Amah ih cangvaihnak cu thinsau in hngak aw,” (Saam 37:7) a ti ruangah hngah thei dingin kan zuam a ṭul. Pathian kutcak lang ding a hngak theitu cu a caan a kim tikah Pathian kutcak a langmi a ngah tengteng ding. Mi tampi cu Pathian kutcak a lang ding hi thinsau le daite’n kan hngak thei ṭheu lo ruangah sunralnak kan tong ṭheu. Ziang a si khalle Pathian hmaiah daitein um in Amah ih cangvaihnak cu thinsau in kan hngak ahcun kan hlawhtling tengteng ding.

Thunetnak.

Kan duhmi le lungthlitum a famkim theinak dingah Bawipa hnenah kan nun kan pe ding a ṭul, cuticun amah in lam in hruai ding. Amah kan rinsan a ṭul, cuticun in bawm camcin ding. Amah hmai ah daitein kan um a ṭul, a cangvaihnak cu thinsau in kan hngak a ṭul, cuticun kan duhmi a kim thluh ding a si. Kan lungthlitum kimtein a pe theitu cu Pathian lawng a si.

Duhdawtnak le duhsaknak thawn,

Rev. Dr. Hrang Hmung, D.Min., Ph.D.,

Toungphila, Kalaymyo, Myanmar.

July 10, 2016|Sunday|4:00pm.