ṬHANG VIVO UH

“Kan Bawipa le in Runtu Jesuh Khrih zaangfahnak le amah theihnak sungah ṭhang vivo uh. Amah hnenah sunlawinak cu atu le kumkhua in um camcin seh. Amen” (1 Piter 3:18).

Thingkung pakhat khat a nung maw a thi timi kan thei duh a sile cuih thingkung ih a ṭhannak zohin kan theifiang thei a si. A nung a si ahcun a ṭhang vivo ding, a thi ahcun ṭhannak ding a um nawn lo. Ṭhannak timi hi nunnak hrangah um tengteng ding a ṭul a si. Phundang in kan sim a sile nunnak a neimi cu amahkel in a awh ringring lo, a ṭhang vivo a si.

1. Ṭhannak.

Minung kan nunnak khal hi nu pum sungih kan seem ihsin thokin nitin tein a ṭhang rero zo a si. Cule a tikcu a kim cu leitlun ah kan piang. Cuticun kan taksa ruangpum cu a ṭhanglian vivo ih kumkul leng kan kim tiang a ṭhanglian vivo a si. Cuihhnu ahcun kan ṭhannak a fuung vivo tiah kan thei cio. Sikhalsehla kan thinlung lam cu pitling dingin ṭhang vivo ding a ṭul. Kan thinlung a pitling thei lo ahcun sambaunak a um ti a fiang. Kan theihnak lam khal a ṭhang vivo dingmi a si.

Minung pakhat kan si ruangah kan thinlung, taksa, thlarau ah kilkip in ṭhanlen vivo ding a ṭul. Zumtu kan si vekin Jesuh Khrih theihnak ah kan ṭhang ringring ding a thupi zet. Thlarau lam ṭhanlennak timi cu thlarau ih duhnak vekin famkim ter vivo ding kha a si. Culawngah Thlarau rah pawl kan congah thei ding (Gal. 5:22). Kan Piangthar hnu ah nitin ṭhang vivo ding a ṭul. Cutik lawngah nunnak thawn pehparmi ruahsannak a famkim dingih ṭhat lonak, borhhlawhnak pawl tla kan hrial thei ding.

2. Zaangfahnak sungah ṭhannak.

Zumtu pakhat cu Jesuh Khrih ih zaangfahnak ah ṭhang vivo ding a ṭul. Jesuh Khrih ih thinlung put vekin kan nun thei lawngah a zaangfahnak sungah kan ṭhang thei ding a si. Cuticun Jesuh Khrih ih zaangfahnak sungah kan ṭhangso vivo dingih thinlung sungah lungwinak le daihnak kan co thei ding a si (Rom 15:13; Efe. 4:13; Fil. 4:7).

Thinlung sungmuril ihsin a zaangfahnak kan co taktak tikah Thlarau ih rah pawl khal a langfiang thei vivo ding. Jesuh Khrih ih zaangfah duhdawtnak kan tep deuhdeuh ahcun thlacamnak, Baibal siar duhnak, thinlung sung thusia thuṭha ruat theinak khal a ṭhang vivo ding. Cuticun Pathian ih duhdawt zaangfahnak kan tep sinsin dingih Pathian ih sersiammi kan minungpi pawl parah duhdawt zawnruahnak kan nei thei sinsin ding a si. Cuticun piangthar nun a ṭhang sinsin dingih kan tuahmi tinkim hi Pathian sunlawinak hrangah a cang thluh thei ding a si.

3. Jesuh theihnak sungah ṭhannak.

Jesuh theihnak sungah ziangtin kan ṭhang thei ding? Pathian ih sersiammi kan si vekin Pathian ih minung pawl, Pathian a theitu kan innhnen pawl thawn pawlkom pehzomnak kan nei a ṭul. Cuticun anmah hnen ihsin Bawipai’ ṭhatnak pawl kan zir, kan thei vivo thei ding. Thil kan zir duhmi kan thiam theinak dingah ṭhatein kan zir a ṭul vekin Jesuh theihnak sungah kan ṭhang theinak dingah Amai’ minung pawl thawn pawlkom pehzomnak in kan zir vivo ding. Cule kan thinlung sungah Thlarau ih in burhmi Jesuh Khrih theinak sungah ṭhannak kan congah thei ding. Cutikah ziangkim hi kanmai’ ta an si lozia thei in Amah lawng rinsan in kan nun pumhlum kan ap aw thei ding a si.

Thunetnak.

Zumtu kan sinak hi kum a rei zet thlang vekin kan Khristian nun daan khal hi ṭhanlen pitlin lam pan rero ding a ṭul. Pathian ih duhdawt zaangfahnak kan theifiang deuhdeuh ahcun Amah theihnak sung khalah kan ṭhangso ringring ding. Paul in, “Nauhak ka rak si laiah cun ka ṭong daan, ka thil hmuh daan le ka thuruah daan cu an nauhak ngaingai. Asinain atu ahcun ka upa thlang ih nauhak daan cu ka thlun duh nawn lo,” (1 Kor. 13:11) a ti vekin Pathian sunlawinak hrangah Jesuh Khrih zaangfahnak le amah theihnak sungah ṭhang vivo ding hi a thupi ngaingai.

Duhsaknak le duhdawtnak thawn,

Rev. Dr. Hrang Hmung, D.Min., Ph.D.,

Toungphila, Kalaymyo

September 17, 2016|Saturday|7:45pm.