I KO AWLA KA LO LET DING

“I ko awla ka lo let ding. Na theih lomi thil khuaruahhar le mangbangza ka lo sim ding” (Jer. 33:3).

Minung kan nun lam tluanah harsatnak, buainak, mangbang vansannak, lungawinak ti in a phunphun kan tong ringring. Zumtu kan si khalle kan tong thotho ih zohman in kan luat lo. Khui hmun, khui ram ih kan um khalah luat a theih lo. Cuvek caanah minung hnenah sim loin Pathian hnenih sim lohli hi a ṭha bik a si. Cutin kan ti tikah minung kan sim lo lawlaw ding tinak si sawn loin Pathian kan sim hmaisabik ding tinak a si. Ziangahtile Pathian cun in tuahsak thluh thei ih cutin tuahsak dingah minung a fial thei a si.

1. Abraham ih hnenum pa.

Abraham in a fapa Isaak hrang nupi hawl dingah a hnenum pa a fial. Theih dah lonak hmun ih nupi hawl ding hi thil ol a si hrimhrim lo. Cuih hnenum pa hrangah cun harsatnak tumpi a si. Sikhalsehla Abraham ih hnenum pa cun a harsatnak hi midang hnenah sim hmaisa loin Pathian hnenah a sim. Thinlung tak thawn a thlacamnak aw cu Pathian in a thei sak. Isaak hrang nupi dingah Rebekah cu a pek hngai tiah Baibal sungah fiangtein kan hmu thei (Seem. 24:12-21; 42-49).

2. Hezekiah Siangpahrang.
Judah siangpahrang Hezekiah a ṭuan laiah Assiria siangpahrang Sennakherib cun an ram lak tumin a hro ciamco. Cuih caan ah Hezekiah cun Pathian hnenah a sim lohli. Pathian in Hezekiah cu a bawm hngai ih a neh sak thluh. Ramdang siangpahrang hnenah bomnak dil hmaisa loin Pathian a sim lohli ruangah Pathian in a ṭulnak a tuahsak ih himtein an um thei a si (2 Siang. 19:14-15, 2 San. 32:20-22, Isa.37:21-36). Pathian a rinsantu cu Pathian in a hngilh ve ce lo tiah kan hmu thei.

3. Dungthlun pawl.
Bawi Jesuh le a dungthlun pawl cu lawng thawn tili khatlam ralih an feh. An feh rero laiah Jesuh cu a itthat. Rin lo pi ah thlisia le tisuar in an lawng a nuai ciamco. Buainak nasa zet an ton tikah dungthlun pawl cun Jesuh an sim lohli. Cutikah Jesuh in an buaipi mi thlisia le tilet cu thu a pek (Mat. 8:23-27; Mar. 4:35-41; Luk. 8:22-24). Zumtu pawlin buainak kan ton canah Pathian sim lohli uhsi. Kan Pathian cu a fa le pawl in ngaihsaktu a si. Amai’ duhnak vekin kan ṭulnakah bawm dingin a khul a fung lo. Nitin kan nunnak ah kan tonmi buainak pawl hi mahtein tawlrel hmaisa loin Pathian kan sim hmaisa a ṭul. Cutik lawngah Pathian in a ṭulnak vekin a mihman pawl in thlahsak ding a si.

Thunetnak.

Zumtu unau pawl, kan buainak le harsatnak pawl in tawlrel saktu dingah Pathian kan nei. Minung hnenah sim hmaisa loin Pathian hnenah sim hmaisa aw a lo bawm ding a si. Pathian in, “I ko awla ka lo let ding. Na theih lomi thil khuaruahhar le mangbangza ka lo sim ding” a ti (Jer. 33:3). Kan Pathian cu zumtu pawl ih kawhnak ngai in kan lam ah a ṭang ringring a si. “Bawipa cu nanmah runtu si dingah a ṭawnṭai tuk lawmmam lo. Bomnak dilih nan aunak thei lo tiangin a hna a set lo” (Isa. 59:1). Ziangtik khalah, ziangvek thubuai kan ton khalah Pathian sim lohli hi a ṭha bik a si. “Harsatnak a thlen tikah keimah i ko uhla ka lo run hai dingih nannih in in thangṭhat ding” a ti (Saam 50:15).

Duhdawtnak le duhsaknak thawn,

Rev. Dr. Hrang Hmung, D.Min., Ph.D.,

Toungphila, Kalaymyo.

September 4, 2016|Sunday|8:15 am.